ព្រះអង្គម្ចាស់ នរោត្តម ចក្រាវុធ យាងសំណេះសំណាល និងសួរសុខទុក្ខ សមាជិក-សមាជិកា នៅខេត្តកំពង់ស្ពឺ

ព្រះអង្គម្ចាស់ នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច នៅព្រឹកថ្ងៃទី ២៦ ខែធ្នូ ឆ្នាំ ២០ ២១នេះ យាងសំណេះសំណាល និងសួរសុខទុក្ខ សមាជិក-សមាជិកា ដែលរចនាសម្ព័ន្ធថ្នាក់ខេត្ត-ស្រុក ឃុំជារចនាសម្ព័ន្ធ នៅទីស្នាក់ការគណបក្សខេត្ត ស្ថិតនៅសង្កាត់សុព័រទេព ក្រុងច្បារមន ខេត្តកំពង់ស្ពឺ។

នេះជាខេត្តទី ៣ហើយ ដែលព្រះអង្គម្ចាស់ នរោត្តម ចក្រាវុធ បានយាងសំណេះសំណាល និងសួរសុខទុក្ខដល់សមាជិក-សមាជិកា គណបក្សហ៊្វុនស៊ិនប៉ិច ក្រោយវិបត្តិជំងឺកូវីដ-១៩ នៅក្នុងប្រទេសកម្ពុជាធូរស្រាល។

លោក ញឿន រ៉ាដែន អ្នកនាំពាក្យ នៃគណបក្សហ៊្វុនស៊ិនប៉ិច ធ្លាប់ប្រាប់កម្ពុជាថ្មីថា សមាជិកា-សមា​ជិកា នៃគណបក្សហ៊្វុនស៊ិនប៉ិច នៅក្នុងខេត្តទាំងនោះ បានទទួលស្វាគមន៍ និងមានការប្ដេជ្ញាចិត្តខ្ពស់ សម្រាប់ការគាំទ្រការដឹក​នាំ របស់ព្រះអង្គម្ចាស់ នរោត្តម ចក្រាវុធ នាពេលបច្ចុបុ្បន្ន និងពេលខាងមុខទៀត។

ចំណែកឯ ព្រះអង្គម្ចាស់ នរោត្តម ចក្រាវុធ បានណែនាំដល់សមាជិក-សមាជិកា របស់ព្រះអង្គឲ្យមានការខិតខំធ្វើការបម្រើប្រជារាស្រ្ត និងប្រទេសជាតិបន្ថែមទៀត ក្នុងការរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ ឲ្យកាន់តែមានការរីកចំរើនបន្ថែមទៀត និងរូបរួមគ្នាស្តារកិត្តិយសគណបក្សហ៊្វុនស៊ិនប៉ិច ឡើងវិញផងដែរ។

ព្រះអង្គម្ចាស់ ក៏បានប្ដេជ្ញាចិត្តខ្ពស់ក្នុងការថែរក្សាមរតក ដែលបន្សល់ទុកពីសម្ដេចតា ដោយសម្ដេចតាបានព្រះប្រទាន ដល់សម្ដេចក្រុមព្រះ ហើយសម្ដេចក្រុមព្រះ ក៏បានព្រះប្រទានដល់ព្រះអង្គម្ចាស់ ចក្រាវុធ បន្ត។ ការយាងរបស់ ព្រះអង្គម្ចាស់ នរោត្តម ចក្រាវុធ ចុះទៅតាមបណ្ដាខេត្តទាំងនោះ ក៏មានគោលបំណងពង្រឹងនូវសាមគ្គីភាព ដើម្បីត្រៀមចូលរួមការបោះឆ្នោត ជ្រើសរើសក្រុមប្រឹក្សាឃុំ-សង្កាត់ នាពេល​ខាងមុខ។

លោក ញឿន រ៉ាដែន បានបញ្ជាក់ថា ការដែលព្រះអង្គម្ចាស់ នរោត្តម ចក្រាវុធ យាងទៅកាន់ខេត្តទាំងនោះ ពុំមែនទៅកៀរគរសមាជិក-សមាជិកា មកគាំទ្រព្រះអង្គ ជាប្រធានគណបក្សហ៊្វុនស៊ិនប៉ិចនោះទេ តែថាសមាជិក-សមាជិកាទាំងនោះ ជាអ្នកយាងព្រះអង្គទៅ ដើម្បីបង្ហាញការគាំទ្រព្រះអង្គតែម្ដង៕

អត្ថបទ៖ ឃួន សុភ័ក្រ