គណៈកម្មាធិការនាយកហ្វ៊ុនស៊ិនប៉ិចថា ព្រះអង្គម្ចាស់ ចក្រាវុធ អាចជាប្រធានបក្សបាន ទាល់តែបំពេញគ្រប់លក្ខខណ្ឌសិន

ការិយាល័យអ្នកនាំពាក្យគណៈកម្មាធិការនាយកគណបក្សហ្វ៊ុនស៊ិនប៉ិច បានអះអាងថា ព្រះអង្គម្ចាស់ នរោត្តម ចក្រាវុធ អាចក្លាយជាប្រធានគណបក្សហ្វ៊ុនស៊ិនប៉ិចបាន នៅពេលដែលព្រះអង្គម្ចាស់បានបំពេញគ្រប់លក្ខខណ្ឌដូចមានចែងក្នុងច្បាប់ លក្ខន្តិកៈគណបក្សហ្វ៊ុនស៊ិនប៉ិច។ នេះបើតាមសេចក្តីថ្លែងការណ៍របស់ការិយាល័យអ្នកនាំពាក្យគណៈកម្មាធិការនាយកគណបក្សហ្វ៊ុនស៊ិនប៉ិចកាលពីថ្ងៃទី២៩ ខែធ្នូ ឆ្នាំ២០២១។

ការលើកឡើងបែបនេះ បន្ទាប់ពីលោកប៉ោ ប៊ុនស្រ៊ឺ អនុប្រធាន និងជាសមាជិកគណៈកម្មាធិការនាយកគណបក្សហ្វ៊ុនស៊ិនប៉ិច បានធ្វើលិខិតគាំទ្រ ព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សហ៊្វុនស៊ិនប៉ិច។ ការិយាល័យអ្នកនាំពាក្យគណៈកម្មាធិការនាយកគណបក្សហ្វ៊ុនស៊ិនប៉ិច យល់ថា ការគាំទ្រនេះ គឺបានឆ្លើយតបទៅនឹងស្មារតីនៃកិច្ចប្រជុំវិសាមញ្ញគណៈកម្មាធិការនាយកកាលពីថ្ងៃទី១៣ ខែធ្នូ ឆ្នាំ២០២១ដែលបានសម្រេចថា រៀបចំបេក្ខភាពមួយរូបដែលមានលេខរៀងបន្ទាប់ពីសម្តេចក្រុមព្រះ ឬព្រះញាតិវង្សរបស់ព្រះអង្គ ដើម្បីជ្រើសតាំងជាប្រធានគណបក្សហ្វ៊ុនស៊ិនប៉ិច។

ជាមួយគ្នានេះ ការិយាល័យអ្នកនាំពាក្យគណៈកម្មាធិការនាយកគណបក្សហ្វ៊ុនស៊ិនប៉ិច បានលើកឡើងថា ការគាំទ្រនេះទៀតសោត គឺស្របទៅនឹងយន្តការរបស់គណៈកម្មាធិការនាយកដែលបាន និងកំពុងអនុវត្តសមត្ថកិច្ចរបស់ខ្លួន តាមលក្ខន្តិកៈ ដើម្បីសម្របសម្រួលដោះស្រាយបញ្ហានានាក្នុងពេលដែលគណបក្សហ្វ៊ុនស៊ិនប៉ិចគ្មានប្រធានដឹកនាំ៕

អត្ថបទ ៖ វណ្ណ សុគន្ធា