ប្រមុខការទូតកម្ពុជា និងឥណ្ឌា ជួបពិភាក្សាគ្នាតាមទូរស័ព្ទនិយាយពីបញ្ហានៅមីយ៉ាន់ម៉ា

លោកឧបនាយករដ្ឋមន្ត្រី​ ប្រាក់​ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា​ កាលពីរសៀលថ្ងៃទី១០ ខែមករា ឆ្នាំ២០២២​ បានជួបពិភាក្សាការងារតាមទូរស័ព្ទជាមួយលោក ស៊ូប្រាម៉ានយ៉ាំ ចៃហ្សានកា រដ្ឋមន្ត្រីការបរទេសឥណ្ឌា ដោយផ្តោតលើបញ្ហាធំៗមួយចំនួនដែលជាផលប្រយោជន៍រួម។

លោកឧបនាយករដ្ឋមន្ត្រី​ ប្រាក់​ សុខុន​ បានឲ្យដឹងថា​ កម្ពុជា បានកោតសរសើរចំពោះការរួមចំណែកយ៉ាងសកម្មរបស់ឥណ្ឌាដល់តំបន់មេគង្គ ហើយកម្ពុជាសង្ឃឹមយ៉ាងមុតមាំថា ឥណ្ឌានឹងយកឈ្នះលើការឆ្លងមេរោគបំប្លែងថ្មី  អូមីក្រុង។ ក្នុងនាមជាប្រទេសជិតខាង ជាមួយមីយ៉ាន់ម៉ា ឥណ្ឌាកំពុងតាមដានស្ថានការណ៍នៅទីនោះយ៉ាងយកចិត្តទុកដាក់ ព្រមទាំងវាយតម្លៃខ្ពស់ដល់តួនាទីដ៏សំខាន់របស់កម្ពុជាដែលជាប្រធានអាស៊ាននៅឆ្នាំនេះ។ 

ជាមួយគ្នានោះ លោក ក៏បានឆ្លៀតឱកាសនេះជម្រាបជូនរដ្ឋមន្ត្រីការបរទេសឥណ្ឌា អំពីលទ្ធផលវិជ្ជមាន ក្រោយពីដំណើរទស្សនកិច្ចការងាររបស់សម្តេចតេជោនាយករដ្ឋមន្ត្រីទៅកាន់ប្រទេសមីយ៉ាន់ម៉ាកាលពីសប្តាហ៍មុន។​ កម្ពុជា និងឥណ្ឌា ទន្ទឹងរង់ចាំខួបលើកទី៧០ នៃទំនាក់ទំនងការទូតនៅឆ្នាំនេះ៕

អត្ថបទ ៖ កោះកែវ