ព្រះអង្គម្ចាស់ ចក្រាវុធ អំពាវនាវឲ្យសមាជិក-សមាជិកា គណបក្សហ៊្វុនស៊ិនប៉ិច រួបរួមសាមគ្គីគ្នា

ព្រះអង្គម្ចាស់ នរោត្តម ចក្រាវុធ ព្រះប្រធានស្តីទី គណបក្សហ៊្វុនស៊ិនប៉ិច បានអំពាវនាវឲ្យ​សមាជិក-សមាជិកា គណបក្សហ៊្វុនស៊ិនប៉ិច រួបរួមសាមគ្គីគ្នា ដើម្បីត្រៀមខ្លួនសម្រាប់ការបោះឆ្នោត នាពេលខាងមុខនេះ។

ការអំពាវនាវនេះ គ្រាដែលព្រះអង្គម្ចាស់ នរោត្តម ចក្រាវុធ បានយាងចុះជួបសំណេះសំណាល ជាមួយថ្នាក់ដឹកនាំខេត្ត/ស្រុក និងរចនាសម្ព័ន្ធគណបក្ស ទូទាំងខេត្តសៀមរាប នៅរសៀលថ្ងៃទី ១៩ ខែមករា ឆ្នាំ ២០២២នេះ នៅទីស្នាក់ការគណបក្សខេត្ត ស្ថិតនៅភូមិវាល សង្កាត់គោកចក ក្រុងសៀមរាប ដែលមានសមាជិក-សមាជិកា ចូលរួមសរុបជាង ៣០០នាក់។

នៅក្នុងឱកាសនោះ ព្រះអង្គម្ចាស់ ចក្រាវុធ បានមានបន្ទូលទៅកាន់សមាជិក-សមាជិកា ឲ្យរួបរួមសា​មគ្គីគ្នា ដើម្បីគណបក្សហ៊្វុនស៊ិនប៉ិច ទទួលបានអាសនៈសម្រាប់ការបោះឆ្នោត នាពេលខាងមុខ ហើយនឹងជាគណបក្សមានកម្លាំងដ៏រឹងមាំ សម្រាប់ចូលរួមការអភិវឌ្ឍន៍ប្រទេសជាតិ ផងដែរ។

បើតាមលោក ញឿន រ៉ាដែន អ្នកនាំពាក្យ នៃគណបក្សហ៊្វុនស៊ិនប៉ិច បានឲ្យដឹងថា នេះជារាជធានី-ខេត្តទី ៨ហើយ ដែលព្រះអង្គម្ចាស់ នរោត្តម ចក្រាវុធ បានយាងចុះជួបសំណេះសំណាល ជាមួយសមាជិក-សមាជិកា គណបក្សហ៊្វុនស៊ិនប៉ិច។

សូមជម្រាបថា ព្រះអង្គម្ចាស់ ចក្រាវុធ បានប្រកាសថា នឹងចុះទៅតាមបណ្ដារាជធានី-ខេត្ត ដើម្បីប្រមែប្រមូលអ្នករាជានិយម និងអ្នកគាំទ្រឡើង ដើម្បីធ្វើឲ្យគណបក្សហ៊្វុនស៊ិនប៉ិច ក្លាយជាកម្លាំងជាតិដ៏រឹងមាំ ហើយនិងបន្តចូលរួមថែរក្សា ការពារសន្តិភាព ស្ថេរភាព នយោបាយ និងការអភិវឌ្ឃន៍ ដែលជាសេចក្តីត្រូវការ របស់ប្រជាពលរដ្ឋ៕  

អត្ថបទ៖ ឃួន សុភ័ក្រ