ព្រឹកនេះ មេបញ្ជាការកងទ័ពជើងគោកថៃ អញ្ជើញមកបំពេញទស្សនកិច្ចផ្លូវការនៅកម្ពុជា

នៅព្រឹកថ្ងៃព្រហស្បតិ៍ទី០៣ ខែកុម្ភ ឆ្នាំ២០២២ នេះ គណៈប្រតិភូអគ្គមេបញ្ជាការកងទ័ពជើងគោកភូមិន្ទថៃ នឹងអញ្ជើញមកបំពេញទស្សនកិច្ចនៅកម្ពុជា ដើម្បីពង្រឹងពង្រីកកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ។

ដំណើរទស្សនកិច្ចរបស់គណៈប្រតិភូកងទ័ពថៃនេះ គឺដឹកនាំដោយនាយឧត្តមសេនីយ៍ NARONGPAN JITTKAEWTAE អគ្គមេបញ្ជាការកងទ័ពជើងគោកភូមិន្ទថៃ។ បើតាមកម្មវិធីដែលបានគ្រោងទុក គឺនឹងមានជំនួបពិភាក្សាការងារជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងលោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកកម្ពុជា។

ចំណែក នៅរសៀលនេះ គណៈប្រតិភូកងទ័ពថៃ ដឹកនាំដោយនាយឧត្តមសេនីយ៍ NARONGPAN JITTKAEWTAE នឹងចូលជួបសម្តែងការគួរសមជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕

ដោយ ៖ កោះកែវ