សម្តេច ហ៊ុន សែន ប្រាប់ លោក ជេម សុខ ឲ្យ«បិទមាត់» ក្រោយអត្ថាធិប្បាយប្រមាថជាតិសាសន៍ខ្មែរ

សម្តេចតេជោនាយករដ្ឋមន្រ្តី ហ៊ុន សែន នៅព្រឹកថ្ងៃចន្ទនេះ បានបញ្ចេញប្រតិកម្មខ្លាំងៗទៅកាន់លោក ជេម សុខ ហៅ សុខ សាគុន អ្នកវិភាគបញ្ហាសង្គម និងនយោបាយ ដែលបានធ្វើអត្ថាធិប្បាយក្នុងន័យប្រមាថជាតិសាសន៍ខ្មែរខ្លួនឯង។ សម្តេច បានអះអាងថា លោក ជេម សុខ បើមិននិយាយ ក៏គ្មានអ្នកណាថា លោកគរ នោះដែរចំពោះការនិយាយ​ប្រមាថជាតិសាសន៍ខ្លួនឯងនេះ។

ប្រតិកម្មរបស់ប្រមុខរាជរដ្ឋាភិបាលកម្ពុជានេះ គឺបន្ទាប់ពីលោក ជេម សុខ ហៅ សុខ សាគុន បានធ្វើអត្ថាធិប្បាយ ដោយហ៊ាននិយាយថា បើអាមេរិកធ្វើសង្រ្គាមជាមួយកម្ពុជា នោះរូបលោក នឹងកាន់កាំភ្លើងមកវាយកម្ពុជាដែរ។ ការលើកឡើងបែបនេះ បានរងនូវប្រតិកម្ម និងការរិះគន់យ៉ាងច្រើនពីសំណាក់ប្រជាពលរដ្ឋទាំងនៅក្នុងស្រុក និងក្រៅស្រុក។ ចំណែក សម្តេចតេជោ ហ៊ុន សែន វិញ បានចាត់ទុកការលើកឡើងនេះថា ជាការប្រមាថដល់ជាតិសាសន៍ខ្លួនឯង។

ពីខេត្តក្រចេះ នៅក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ សម្តេចតេជោ ហ៊ុន សែន បានអះអាងបែបនេះថា ៖ «បងមិនជេរប្អូនទេ តែប្អូនឯងនិយាយ ខុសហើយ! ឧទាហរណ៍ថា បើមានសង្រ្គាម សុខចិត្តកាន់អាវុធ មកវ៉ៃខ្មែរ។ ប្អូន! បងផ្តាំទៅប្អូនណាស់ ​ប្អូនអន់ជាងតិរច្ឆាន តិរច្ឆានគង់ស្គាល់សំបុករបស់វា ប៉ុន្តែប្អូនបែរជា បើទោះបានចូលសញ្ជាតិបរទេស​ ប្អូនមិនគួរប្រើភាសាហ្នឹងនោះទេ។ បើទោះបី ប្អូនមិននិយាយ ក៏គ្មានអ្នកណា គេថា ប្អូនគរដែរ»។

បើតាមសម្តេចតេជោ ការលើកឡើងរបស់លោក ជេម សុខ បែបនេះ ក្នុងន័យចង់ឲ្យសម្តេចជេររូបលោក ដើម្បីជាច្រកចូលមួយនៃពួកប្រឆាំង និងថា ចង់ឲ្យសម្តេចបង្ហោះហ្វេសប៊ុកនូវប្រតិកម្មរបស់សម្តេចចំពោះការលើកឡើងនេះ។ ប៉ុន្តែ សម្តេចប្រមុខរាជរដ្ឋាភិបាលកម្ពុជា បានគូសបញ្ជាក់ថា សម្តេចមិនបង្ហោះទៅតាមការចង់បានរបស់លោក ជេម សុខ នោះទេ។

ក្រោយរងនូវប្រតិកម្មខ្លាំងៗពីសំណាក់សម្តេចនាយករដ្ឋមន្រ្តីដូច្នេះ លោក ជេម សុខ ហៅ សុខ សាគុន ដែលកំពុងរស់នៅអាមេរិក បានថ្លែងអំណរគុណចំពោះសម្តេចតេជោ ហ៊ុន សែន។ តាមរយៈទំព័រហ្វេសប៊ុក លោក ជេម សុខ បានសរសេរថា ៖«ខ្ញុំត្រេកអរ និង សូមថ្លែងអំណរគុណសម្ដេចដែលបានស្ដីឲ្យខ្ញុំ។ ខ្ញុំមានសេចក្ដីរីករាយ ដោយបានឱកាសបញ្ចេញមតិជាសាធារណៈ»៕

ដោយ ៖ វណ្ណ សុគន្ធា