នយោបាយ

មានគណបក្សនយោបាយចំនួន៤៥ ត្រូវបានចុះបញ្ជីផ្លូវការនៅក្រសួងមហាផ្ទៃ

បានផុស

៣ years មុន

នៅ

ថ្ងៃសៅរ៍ ១២ កុម្ភៈ ២០២២

ដោយ

គិតត្រឹមតែដំណាច់ខែមករា ឆ្នាំ២០២២នេះ មានគណបក្សនយោបាយចំនួន៤៥ ហើយ ត្រូវបានក្រសួងមហាផ្ទៃ សម្រេចចុះបញ្ជីជាផ្លូវការនៅក្នុងបញ្ជីគណបក្សនយោបាយនៅក្រសួងមហាផ្ទៃ នេះបើយោងតាមលិខិត សជណ របស់ក្រសួងចុះថ្ងៃទី០៧ ខែកុម្ភៈ ឆ្នាំ២០២២ ប៉ុន្តែគណបក្សនយោបាយ ដែលមានលទ្ធភាពចូលរួមប្រកួតប្រជែងនៅក្នុងការបោះឆ្នោតជ្រើសរើសក្រុមប្រឹក្សា ឃុំ សង្កាត់ ខែមិថុនា ខាងមុខ នៅមិនទាន់ដឹងនៅឡើយទេ។

ក្នុងចំណោមគណបក្សនយោបាយទាំង៤៥នោះ មានគណបក្សមិនច្រើនទេ ដែលជាគណបក្សលេចមុខលេខមាត់នៅក្នុងសង្គម និងធ្វើសកម្មភាព ក្នុងនោះមាន៖ គណបក្សប្រជាជនកម្ពុជា (កំពុងដឹកនាំប្រទេស), គណបក្សគណបក្សហ៊្វុនស៊ិនប៉ិច, គណបក្សខ្មែររួបរួមជាតិ, គណបក្សយុវជនកម្ពុជា, គណបក្សសំបុកឃ្មុំសង្គមប្រជាធិបតេយ្យ, គណបក្សភ្លើងទៀន, គណបក្សខ្មែរស្រឡាញ់ជាតិ, គណបក្សកម្ពុជានិយម និងគណបក្សសញ្ជាតិកម្ពុជា ជាដើម។

ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នឹងប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២ ខាងមុខ ហើយគណបក្សដែលបានប្រកាសចូលរួមប្រគួតប្រជែងមានគណបក្សប្រជាជនកម្ពុជា, គណបក្សហ៊្វុនស៊ិនប៉ិច, គណបក្សយុវជនកម្ពុជា, គណបក្សខ្មែររួបរួមជាតិ, គណបក្សខ្មែរស្រឡាញ់ជាតិ និងគណបក្សសំបុកឃ្មុំសង្គមប្រជាធិបតេយ្យជាដើម។

លោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិចបានប្រាប់កម្ពុជាថ្មីនៅថ្ងៃនេះថា គណបក្សបានត្រៀមខ្លួនរួចហើយ ដើម្បីចូលរួមការបោះឆ្នោតក្រុមប្រឹក្សា ឃុំ សង្កាត់ ដែលនឹងប្រព្រឹត្តទៅនាខែមិថុនាខាងមុខ។ លោកថា មកដល់ពេលនេះ គណបក្សហ្វ៊ុនស៊ិនប៉ិច ត្រៀមបេក្ខជនបានចំនួន៧០ ភាគរយហើយក្នុងចំណោម ឃុំ សង្កាត់ ទាំងអស់នៅទូទាំងប្រទេសចំនួន១៦៥២ ឃុំសង្កាត់ ហើយគណបក្សនឹងបន្តខិតខំធ្វើឲ្យបានច្រើនជាងនេះ។

ដោយឡែកលោក ញឹក ប៊ុនឆៃ ប្រធានគណបក្សខ្មែររួបរួមជាតិ ក៏បានប្រកាសរួចហើយ ដើម្បីចូលរួមការបោះឆ្នោតក្រុមប្រឹក្សា ឃុំ សង្កាត់ ហើយមកដល់ពេលនេះ គណបក្សរៀបចំបញ្ជីបានជាង៥០ ភាគរយហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា ដើម្បីមានសិទ្ធិចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ ខាងមុខ កាលពីថ្ងៃទី០៣ ខែកុម្ភៈ គ.ជ.ប បានជូនដំណឹងដល់គណបក្សនយោបាយ ដែលបានចុះបញ្ជីត្រឹមត្រូវនៅក្រសួងមហាផ្ទៃ ឲ្យត្រៀមខ្លួនដើម្បីចុះបញ្ជីបេក្ខជនសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សា ឃុំ សង្កាត់ រយៈពេល៣ ថ្ងៃ ដោយចាប់ពីថ្ងៃទី០៤ ដល់ថ្ងៃទី៦ ខែមីនា ឆ្នាំ២០២២៕

ដោយ ៖ កោះកែវ