បណ្ឌិត សុខ ទូច ៖ ទង្វើរបស់រុស្ស៊ី គឺជាការឈ្លានពានអ៊ុយក្រែនដែលខុសនឹងច្បាប់អន្តរជាតិ

លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា នៅរសៀលថ្ងៃចន្ទនេះ បានចេញមកបកស្រាយពីបញ្ហាសង្រ្គាមរវាងរុស្ស៊ី និងអ៊ុយក្រែន។ លោកបណ្ឌិត សុខ ទូច បានអះអាងថា ការប្រើប្រាស់កម្លាំងយោធារបស់រុស្ស៊ីចូលទៅក្នុងប្រទេសអ៊ុយក្រែន គឺជាសកម្មភាពឈ្លានពាន ហើយវាខុសនឹងច្បាប់អន្តរជាតិ។

តាមរយៈទំព័រហ្វេសប៊ុក លោកបណ្ឌិតសុខ ទូច បានពន្យល់ថា៖ «ករណីប្រទេសអ៊ុយក្រែន ខ្ញុំធ្លាប់បានលើកឡើងថា នឹងមិនមានការផ្ទុះសង្រ្គាមទេ ព្រោះថារុស្ស៊ីបានដាក់សំណើរ៣ទៅអង្គការណាតូ (NATO)៖ ១- មិនអនុញ្ញាតឱ្យប្រទេសអ៊ុយក្រែនចូលជាសមាជិកសម្ព័ន្ធមិត្តណាតូ ហើយមកដល់ពេលនេះ ប្រទេសអ៊ុយក្រែនមិនទាន់ក្លាយជាសមាជិកអង្គការណាតូ (NATO) នៅឡើយទេ។ ២- រុស្ស៊ីបានស្នើដល់អង្គការណាតូ (NATO) កុំដាក់ខែលមីស៊ីលនៅលើទឹកដី អ៊ុយក្រែន។ ៣- រុស្ស៊ីបានស្នើកុំឱ្យមានវត្តមានកងទ័ពបរទេសនៅលើទឹកដីប្រទេសអ៊ុយក្រែន»។

លោកថា សំណើទាំង៣ចំណុចនេះ ទាំងសម្ព័ន្ធមិត្តអង្គការណាតូ និងរដ្ឋាភិបាលអ៊ុយក្រែន មិនទាន់ឆ្លើយតបថាយ៉ាងម៉េចទេ ហើយមកដល់ពេលនេះ នៅលើទឹកដីអ៊ុយក្រែនគ្មានទេវត្តមានកងទ័ពបរទេស ហើយគ្មានទេខែលមីស៊ីល ហើយសមាជិកភាពចូលណាតូរបស់អ៊ុយក្រែនក៏មិនទាន់មានចម្លើយដែរ។ ប៉ុន្តែរុស្ស៊ីបែជាលើកទ័ពចូលទឹកដីអ៊ុយក្រែនទៅវិញ។ដូចនេះ ការប្រើប្រាស់កំលាំងយោធាររបស់រុស្ស៊ី គឺជាការឈ្លានពានប្រទេសអ៊ុយក្រែន ព្រោះរុស្ស៊ីមិនបានប្រកាសជាមុន ហើយមកទល់ពេលនេះ ទាំងអង្គការណាតូនិងអ៊ុយក្រែន នៅមិនទាន់ប្រកាសសង្គ្រាមជាមួយរុស្ស៊ីនៅឡើយទេ អ៊ុយក្រែនត្រឹមប្រើប្រាស់កម្លាំងទ័ពដើម្បីការពារខ្លួន ត្បិតបើធ្វើសង្គ្រាមគឺត្រូវប្រកាសជាមុន ហើយបើសហរដ្ឋអាម៉េរិកឬណាតូប្រកាសសង្គ្រាមជាមួយរុស្ស៊ីនោះ សង្គ្រាមលោកលើកទី៣ច្បាស់ជាកើតឡើងមិនខាន។

សម្រាប់លោកបណ្ឌិត សុខ ទូច គឺទង្វើរបស់រុស្ស៊ីនាពេលនេះ វាខុសច្បាប់អន្តរជាតិ។ ការចូលឈ្លានពានអ៊ុយក្រែននាពេលនេះ ទំនងជារុស្ស៊ីធ្វើការវាយប្រហារជាមុន មិនឱ្យជាន់ដានប្រវត្តិសាស្ត្រដែលរុស្ស៊ីរងការវាយប្រហារពីគេមុន ដូចជាសង្គ្រាមណាប៉ូឡេអុង,សង្គ្រាមលោកលើកទី១ និងសង្គ្រាមលោកលើកទី២?៕

ទស្សនាវីដេអូ សូមចុចLink ខាងក្រោម៖

បណ្ឌិត សុខ ទូច ថា សង្រ្គាមនៅអ៊ុយក្រែន នឹងមិនផ្ទុះឡើងទេ (facebook.com)

ដោយ៖ វណ្ណ​ សុគន្ធា