សម្តេច ហ៊ុន សែន ៖ កិច្ចប្រជុំអាស៊ាន-អាមេរិក នឹងត្រូវលើកពេល ព្រោះមិនទាន់ឯកភាពគ្នា

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានលើកឡើងថា កិច្ចប្រជុំកំពូលអាស៊ាន-អាមេរិកដែលគ្រោងធ្វើឡើងនៅថ្ងៃទី២៦ និងទី២៧ ខែមីនា ខាងមុខនេះ អាចនឹងត្រូវលើកពេល ព្រោះអាមេរិក និងប្រទេសសមាជិកអាស៊ាន មិនទាន់ឯកភាពគ្នានៅឡើយ។ សម្តេចតេជោ ហ៊ុន សែន បានលើកឡើងបែបនេះនៅក្នុងសម្ពោធដាក់ឱ្យប្រើប្រាស់មន្ទីរពេទ្យមិត្តភាពកម្ពុជា-ចិនត្បូងឃ្មុំ រួមជាមួយនឹងពិធីសម្ពោធព្រមគ្នានូវអាគារសាលាបឋមសិក្សា និងវិទ្យាល័យតេជោសែនត្បូងឃ្មុំ នៅខេត្តត្បូងឃ្មុំ នាពេលព្រឹកថ្ងៃចន្ទនេះ។

សម្តេចនាយករដ្ឋមន្រ្តីកម្ពុជា បានអះអាងថា ការដែលមិនទាន់ឯកភាពគ្នានេះ គឺដោយសារតែនៅថ្ងៃទី២៦ និង២៧ ខែមីនា មានប្រទេសជាសមាជិកអាស៊ានចំនួន៣ មិនអាចទៅចូលរួមបាន។ ដូច្នេះហើយ កិច្ចប្រជុំកំពូលអាស៊ាន-អាមេរិក នឹងត្រូវលើកពេល។ ប៉ុន្តែ សម្តេចតេជោ ហ៊ុន សែន ក៏បានបញ្ជាក់ហើយថា កិច្ចប្រជុំអាចធ្វើឡើងពេលវេលាក៏បានដែរ លើកលែងតែពីចន្លោះពាក់កណ្តាលខែឧសភា ដល់ខែកណ្តាលខែមិថុនា ព្រោះពេលនោះ ជាពេលកម្ពុជាត្រូវរៀបចំការបោះឆ្នោតក្រុមប្រឹក្សាឃុំ សង្កាត់។ សម្តេចតេជោ គូសបញ្ជាក់ថា សម្តេចមិនអាចចាកចេញពីប្រទេសកម្ពុជា ស្របពេលដែលកម្ពុជារៀបចំការបោះឆ្នោតបានឡើយ៕

ដោយ ​៖ វណ្ណ សុគន្ធា