គណបក្ស LDP ប្រកាសមិនដាក់បេក្ខជនឈរឈ្មោះសម្រាប់ការបោះឆ្នោតឃុំ សង្កាត់នាពេលខាងមុខឡើយ

គណបក្សសម្ព័ន្ធដើម្បីប្រជាធិបតេយ្យ ហៅកាត់ថា LDP បានប្រកាសមិនចូលរួមដាក់បញ្ជីឈ្មោះបេក្ខជន ដើម្បីឈរឈ្មោះក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់នាពេលខាងមុខនេះឡើយ។ នេះបើតាមសេចក្តីជូនដំណឹងរបស់គណបក្សនេះកាលពីថ្ងៃទី០៥ ខែមីនា ឆ្នាំ២០២២។

បើតាមសេចក្តីជូនដំណឹងដដែលនេះ មូលហេតុដែលគណបក្សនយោបាយមួយនេះមិនចូលរួមដាក់បញ្ជីបេក្ខជនសម្រាប់ឈរឈ្មោះក្នុងការបោះឆ្នោតឃុំ សង្កាត់នោះ គឺដោយសារតែគណបក្សនេះយល់ថា គណៈកម្មាធិការជាតិរៀបចំការបោះឆ្នោត(គ.ជ.ប) រឹតត្បិតយ៉ាងខ្លាំងនូវលទ្ធភាពរបស់គណបក្សនយោបាយក្នុងការទទួលបាននូវទម្រង់លទ្ធផលឆ្នោតបឋមនៅតាមការិយាល័យបោះឆ្នោត ដោយមិនប្រគល់ឲ្យដោយផ្ទាល់នូវទម្រង់លទ្ធផលឆ្នោតបឋមមកភ្នាក់ងារគណបក្សនយោបាយភ្លាមៗនៅក្រោយការរាប់សន្លឹកឆ្នោតរួចរាល់ទេ។ ផ្ទុយទៅវិញ គ.ជ.ប តម្រូវឲ្យភ្នាក់ងារគណបក្សទៅយកទម្រង់លទ្ធផលឆ្នោតបឋមនេះនៅគណៈកម្មការឃុំ សង្កាត់ រៀបចំការបោះឆ្នោត ដែលនេះខុសប្លែកពីការបោះឆ្នោតនាពេលកន្លងមក។

លើសពីនេះទៅទៀត គណបក្សសម្ព័ន្ធដើម្បីប្រជាធិបតេយ្យ ហៅកាត់ថា LDP បានអះអាងថា អ្វីដែលគណបក្សនេះធ្លាប់ស្នើទៅគ.ជ.ប អំពីការកំណត់សុពលភាពសន្លឹកឆ្នោតបានការនោះ ក៏គ.ជ.ប នៅតែបន្តអនុវត្តការទទួលស្គាល់សុពលភាពសន្លឹកឆ្នោតតាមវិធីចាស់ដដែល។ នេះ គឺជាមូលហេតុសំខាន់មួយដែលគណបក្សសម្ព័ន្ធដើម្បីប្រជាធិបតេយ្យ បានសម្រេចមិនដាក់បេក្ខជនរបស់ខ្លួន ដើម្បីឈរឈ្មោះនៅក្នុងការបោះឆ្នោតនាពេលខាងមុខ។

ជាការកត់សម្គាល់ បន្ទាប់ពីអតីតបក្សប្រឆាំងត្រូវបានរំលាយចោលទៅ គណបក្សសម្ព័ន្ធដើម្បីប្រជាធិបតេយ្យ គឺជាគណបក្សនយោបាយមួយដែលមានបញ្ហាច្រើនជាមួយនឹងគណៈកម្មាធិការជាតិរៀបចំការបោះឆ្នោត(គ.ជ.ប)។ កាលពីបោះឆ្នោតជាតិក្នុងឆ្នាំ២០១៨កន្លងទៅ គណបក្សនយោបាយនេះ ធ្លាប់មានបញ្ហាទាក់ទងនឹងការរាប់សន្លឹកឆ្នោតដ៏ចម្រូងចម្រាសជាមួយគ.ជ.ប ហើយកាលពីពេលថ្មីៗនេះទៀត ក៏មានបញ្ហាជាមួយ គ.ជ.ប ដែរ។ បញ្ហាទាំងអស់នេះ ធ្លាប់ត្រូវបានប្តឹងផ្តល់ឡើងទៅដល់ក្រុមប្រឹក្សាធម្មនុញ្ញកម្ពុជា ប៉ុន្តែក្រុមប្រឹក្សាធម្មនុញ្ញកម្ពុជាបានចាត់ទុកការសម្រេចទាំងប៉ុន្មានរបស់គ.ជ.បថា ជាការត្រឹមត្រូវ និងបិទបញ្ចប់ការតវ៉ា៕

ដោយ ៖ វណ្ណ សុគន្ធា