ឧត្តមសេនីយ៍ហ៊ុន ម៉ាណែត ៖ ការការពារសន្តិសុខ សុវត្ថិភាព និងអាយុជីវិតថ្នាក់ដឹកនាំជាតិ គឺជាកិច្ចការចាំបាច់បំផុតរបស់កងកម្លាំង

វរសេនាតូចលេខ២៤៦ អតីតយោធាក្រុងភ្នំពេញ (បញ្ជាការដ្ឋានអង្គរក្ស) នាព្រឹកថ្ងៃទី១២ ខែមីនា ឆ្នាំ២០២២ បានរៀបចំប្រារពខួបអនុស្សាវរីយ៍លើកទី៣០ឆ្នាំ នៃបេសកកម្មជាប្រវត្តិសាស្ត្រ ក្នុងការបំពេញភារកិច្ចការពារសន្តិសុខ សុវត្ថិភាពជូនប្រមុខរាជរដ្ឋាភិបាល និងក្រុមគ្រួសារ ដែលពិធីនេះ រៀបចំឡើងក្រោមអធិបតីភាពលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នាក្រុងតាខ្មៅ។

ក្នុងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន លោកឧត្តមសេនីយ៍ឯក ហ៊ុន ម៉ាណែត បានសម្តែងនូវការអបអរសាទរចំពោះការប្រារព្ធខួបអនុស្សាវរីយ៍ដ៏មានអត្ថន័យ និងមនោសញ្ចេតនាស្និទ្ធស្នាលនេះ ដើម្បីរំឭកដល់វីរភាពរបស់ឥស្សរជនឆ្នើមទាំង១២រូប ក៏ដូចជានាយទាហាន នាយទាហានរង និងពលទាហាននៃវរសេនាតូចលេខ២៤៦ អតីតយោធាក្រុងភ្នំពេញទាំងអស់ ដែលបានប្តូរផ្តាច់លះបង់ខិតខំបំពេញភារកិច្ចការពារសន្តិសុខ សុវត្ថិភាពជូន សម្តេចទាំងពីរ និងក្រុមគ្រួសារ បានសុខសាន្តតរៀងមក ដែលជាកត្តាចូលរួមចំណែកមួយយ៉ាងសំខាន់ក្នុងធានានូវលំនឹងស្ថិរភាព និងនិរន្តរភាព នៃការដឹកនាំប្រទេសជាតិ។ ការការពារសន្តិសុខ សុវត្ថិភាព និងអាយុជីវិតថ្នាក់ដឹកនាំជាតិ គឺជាកិច្ចការចាំបាច់បំផុត ពីព្រោះនេះ គឺជាកត្តាកំណត់ជោគវាសនា និងភាពនឹងនរទាំងបច្ចុប្បន្ន និងអនាគតរបស់ជាតិ។

បើតាមលោកឧត្តមសេនីយ៍ឯក ហ៊ុន ម៉ាណែត ក្នុងរយៈពេល៣០ ឆ្នាំកន្លងមកនេះ បញ្ជាការដ្ឋានអង្គរក្សបានខិតខំបំពេញតួនាទី និងភារកិច្ចរហូតក្លាយជាកងឯកភាពឆ្នើមមួយ នៃកងយោធពលខេមរភូមិន្ទ ដោយសម្រេចបាននូវស្នាដៃ និងសមិទ្ធផលជាច្រើនទាំងលើការងារអភិវឌ្ឍ និងអភិរក្ស ដូចបណ្តាស្ថាប័ន កងឯកភាពនានា នៃកងយោធពលខេមរភូមិន្ទផងដែរ។

ពាក់ព័ន្ធនឹងការងារអភិវឌ្ឍ អង្គភាពមានការបោះជំហានទៅមុខរឹងមាំលើគ្រប់វិស័យ ទាំងរចនាសម្ព័ន្ធដឹកនាំបញ្ជា, ចំនួនទ័ព, មធ្យោបាយគ្រឿងបំពាក់ និងការកសាងជំរំជម្រក ក៏ដូចជាហេដ្ឋានរចនាសម្ព័ន្ធនានាបម្រើឱ្យការបំពេញភារកិច្ច និងការលើកកម្ពស់ជីវភាព សុខុមាលភាព របស់យោធិន និងគ្រួសារយោធិន។ អង្គភាពក៏បានសម្រេចបានស្នាដៃលើការហ្វឹកហ្វឺនយោធិនទាំងនៅក្នុងអង្គភាពផ្ទាល់ និងការជួយកសាងពង្រឹងសមត្ថភាពនៅទូទាំងកងយោធពលខេមរភូមិន្ទ ហើយក៏បានពង្រឹងពង្រីកប្រសិទ្ធភាព និងវិសាលភាពប្រតិបត្តិការ ដោយក្រៅពីភារកិច្ចស្នូល ក៏បានចុះជួយដោះស្រាយការលំបាកជូនប្រជាពលរដ្ឋនៅតាមមូលដ្ឋាន ដូចជាបូមទឹកដាក់ស្រែដោះស្រាយគ្រោះរាំងស្ងួត និងចូលរួមក្នុងប្រតិបត្តិការសង្គ្រោះគ្រោះមហន្តរាយផ្សេងនៅទូទាំងប្រទេស ស័ក្តិសមជា “កម្លាំងដែលមានសមត្ថភាព លទ្ធភាព អាចឆ្លើយតបគ្រប់ពេលវេលា ទាន់ពេលវេលា និងដោយប្រសិទ្ធភាពខ្ពស់តាមបទបញ្ជារបស់ប្រមុខរាជរដ្ឋាភិបាល។

ក្នុងការងារអភិរក្ស អង្គភាពតែងបានគោរពអនុវត្តយ៉ាងម៉ឺងម៉ាត់នូវអភិក្រមទាំង០៣ គឺស្មោះត្រង់ ការពារ បម្រើ ហើយយោធិនគ្រប់រូប និងគ្រប់ជំនាន់នៃបញ្ជាការដ្ឋានអង្គរក្ស តែងបានប្តេជ្ញាចិត្តប្រកាន់ខ្ជាប់នូវស្មារតីនេះចំពោះជាតិ ប្រជាជន ប្រមុខរាជរដ្ឋាភិបាល និងក្រុមគ្រួសារ តាំងពីអតីតកាល បច្ចុប្បន្ន និងតទៅអនាគត ស័ក្តិជាកម្លាំងដ៏រឹងមាំ និងពិតប្រាកដរបស់ជាតិ។

លោកឧត្តមសេនីយ៍ ហ៊ុន ម៉ាណែត មានប្រសាសន៏ដែរថា គ្រប់បណ្តាស្ថាប័ន កងឯកភាពទូទាំងកងយោធពលខេមរភូមិន្ទ តែងបានខិតខំបំពេញតួនាទី និងភារកិច្ច ដែលមានកំណត់ក្នុងច្បាប់។ នៅក្នុងកងទ័ព កងឯកភាពនីមួយៗ ត្រូវបានប្រគល់ទាំងភារកិច្ចស្នូល និងភារកិច្ចពិសេស។ ជាក់ស្តែងបញ្ជាការដ្ឋានអង្គរក្ស គឺដូចនឹងបណ្តាកងឯកភាពផ្សេងទៀត មានភារកិច្ចស្នូលក្នុងការការពារ ជាតិ សាសនា ព្រះមហាក្សត្រ និងប្រជាជន ដោយឡែក ក្នុងនាមជាអង្គភាពទ័ពជំនាញ បញ្ជាការដ្ឋានអង្គរក្ស ក៏ត្រូវបានប្រគល់ភារកិច្ចពិសេសបន្ថែមមួយទៀត គឺការពារប្រមុខរាជរដ្ឋាភិបាល សម្តេចតេជោ ហ៊ុន សែន ព្រោះលោកជានាយករដ្ឋមន្ត្រី កើតចេញពីការបោះឆ្នោតស្របតាមរដ្ឋធម្មនុញ្ញ ច្បាប់ និងគោលការណ៍ប្រជាធិបតេយ្យ។

ជាទិសដៅទៅមុខទៀត លោកឧត្តមសេនីយ៍ឯក ហ៊ុន ម៉ាណែត បានផ្តាំផ្ញើឲ្យកងទ័ព ត្រូវបន្តការងារអភិវឌ្ឍ តាមរយៈការពង្រឹងរចនាសម្ព័ន្ធ និងការហ្វឹកហ្វឺន ដោយច្នៃប្រឌិតធ្វើយ៉ាងណាឱ្យកងទ័ពកាន់តែក្លាយកម្លាំងដែលមានសមត្ថភាពខ្ពស់ ក្នុងការបម្រើជាតិ និងប្រជាជន ហើយអ្វីដែលត្រូវអភិរក្សឱ្យបានជាដាច់ខាតក្នុងគ្រប់កាលៈទេសៈ គឺស្មារតីស្មោះត្រង់ចំពោះជាតិ សាសនា ព្រះមហាក្សត្រ ការពាររដ្ឋធម្មនុញ្ញ រាជរដ្ឋាភិបាលស្របច្បាប់ និងប្រមុខរាជរដ្ឋាភិបាលរបស់យើង ដើម្បីឱ្យលោកអាចបំពេញភារកិច្ចដឹកនាំដោយឈរលើផលប្រយោជន៍រួមរបស់ជាតិ៕ កោះកែវ