ប្រធានបក្សយុវជន ៖ ដំណើរការចុះបញ្ជីបេក្ខជន​ឈរឈ្មោះបោះឆ្នោត ​​​​មិនមានបញ្ហាអ្វីជាដុំកំភួន​​នោះទេ

ប្រធានគណបក្សយុវជនកម្ពុជា លោក ពេជ្រ ស្រស់ ​ដែល​បាន​ចុះបញ្ជីបេក្ខជន ដើម្បីចូលរួមនៅក្នុងការបោះឆ្នោត ជ្រើស រើសក្រុមប្រឹក្សាឃុំ-សង្កាត់ផងដែរនោះ បានលើកឡើងប្រាប់​កម្ពុជាថ្មីនៅ​ថ្ងៃនេះ​ថា ដំណើរ​ការចុះបញ្ជីបេក្ខជន ឈរឈ្មោះ​បោះឆ្នោត​ក្រុមប្រឹក្សាឃុំ- សង្កាត់ អាណត្តិនេះ ​មិនមានបញ្ហាអ្វីជាដុំកំភួននោះទេ ​តែ​​មានកិច្ចការមួយចំនួន មន្រ្តី​ថ្នាក់ក្រោម​របស់ គ.ជ.ប មិនទាន់​​យល់កិច្ចការខ្លះ ដែលធ្វើឲ្យខាង​គណបក្សពន្យល់វិញ​។​

លោក​ ពេជ្រ ស្រស់ មានប្រសាសន៍​យ៉ាងដូច្នេះថា «ដំណើរការចុះបញ្ជីបេក្ខជន បោះឆ្នោត​​ក្រុមប្រឹក្សាឃុំ-សង្កាត់ ខាងខ្ញុំសង្កេត​សង្កេត​ឃើញថា មិនមានបញ្ហាអ្វីជាដុំកំភួននោះទេ គ្រាន់តែថា មានកិច្ចការមួយចំនួន​ ថ្នាក់ក្រោមជាតិរបស់ គ.ជ.ប មិនទាន់យល់កិច្ចការខ្លះ ដែលធ្វើឲ្យខាងភ្នាក់ងារគណបក្សធ្វើការសម្របសម្រួល ដែល​យើង​អាចនិយាយបានថា យើង​ពន្យល់ពួកគាត់វិញ តែយើង​អាចដោះស្រាយបាន”។

ដោយឡែកទាក់ទងនឹង ដំណើការ​ដោះស្រាយបណ្តឹងរបស់ គ.ជ.ប​ លោក ​ពេជ្រ ស្រស់​ បានមានប្រសាសន៍ថា លោកមិនមាន​យោបល់ទេ ដោយសាតែ​គណបក្សរបស់លោក ​មិនមានពាក្យបណ្ដឹង ឬមិនមានទំនាស់អ្វី​ទេ​។​

ឆ្លើយតបនឹងសំណួររបស់កម្ពុជាថ្មី ​ប្រធានគណបក្សយុវជនកម្ពុជា ក៏បានស្នើដល់គណៈកម្មាធិការជាតិរៀបចំការបោះ ឆ្នោត (គ.ជ.ប) ​ក៏ដូចជាភាគីពាក់ព័ន្ធទាំងអស់ ដែលពាក់ព័ន្ធទៅនឹងការបោះឆ្នោតឃុំ-សង្កាត់ សូមធានាឲ្យបាននូវ​សេរីភាពពេញលេញ ក្នុងការធ្វើនយោបាយដោយស្មើភាព រវាងគណបក្សនយោបា​យទាំងអស់នៅកម្ពុជា។

គួររំលឹកថា មានគណបក្សនយោបា​យ​សរុបចំនួន ១៧ បាន​ដាក់បេក្ខជនឈរឈ្មោះ​បោះឆ្នោត​ជ្រើសរើស​ក្រុមប្រឹក្សាឃុំ-សង្កាត់អាណត្តិ​ ៥ ឆ្នាំ​ ២០២២នេះ​។ ក្នុងនោះ គណបក្សយុវជនកម្ពុជា​​ដាក់​បេក្ខជន​​ចូលរួម​ បានចំនួន ១៨ រាជធានី-ខេត្ត ស្មើ ១១៦ ឃុំ-សង្កាត់ ដែល​មាន​​បេក្ខជន​សរុប​ចំនួន ១៨២៤​រូប៕

អត្ថបទ៖ កោះកែវ​