នយោបាយ

គណបក្សទាំងអស់ នឹងទទួលបានការផ្សព្វផ្សាយពីគោលនយោបាយតាមវិទ្យុ និងទូរទស្សន៍ជាតិកម្ពុជាដោយឥតគិតថ្លៃ

បានផុស

៣ years មុន

នៅ

ថ្ងៃចន្ទ ១១ មេសា ២០២២

ដោយ

ថ្លែងនៅក្នុងកិច្ចប្រជុំ ស្ដីពីការរៀបចំកម្មវិធីផ្សព្វផ្សាយអប់រំអ្នកបោះឆ្នោត និងផ្សព្វផ្សាយគោលនយោបាយរបស់គណបក្សនយោបាយ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ លោក ម៉ុក ដារ៉ា អគ្គលេខាធិការរង គ.ជ.ប បានអះអាងថា គណបក្សទាំងអស់ ដែលចូលរួមនៅក្នុងការបោះឆ្នោតនេះ នឹងទទួលបានការផ្សព្វផ្សាយដោយឥតគិតថ្លៃ ពីគោលនយោបាយតាមវិទ្យុ និងទូរទស្សន៍ជាតិកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ុក ដារ៉ា បញ្ជាក់យ៉ាងនេះថា “គណបក្សនយោបាយទាំងអស់ទទួលបានឱកាសដោយស្មើភាព តម្លាភាព និងឥតគិតថ្លៃ ក្នុងការផ្សព្វផ្សាយពីគោលនយោបាយរបស់គណបក្ស សម្រាប់ផ្សាយតាមវិទ្យុ និងទូរទស្សន៍ជាតិកម្ពុជា រួមទាំងការផ្សព្វផ្សាយអត្ថបទឃោសនារបស់គណបក្សក្នុងព្រឹត្តិបត្រគោលនយោបាយ ដែលចេញផ្សាយដោយ គ.ជ.ប”។

សូមបញ្ជាក់ថា នៅព្រឹកថ្ងៃទី១១ ខែមេសា ឆ្នាំ២០២២នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំកិច្ចប្រជុំ ស្ដីពីការរៀបចំកម្មវិធីផ្សព្វផ្សាយអប់រំអ្នកបោះឆ្នោត និងផ្សព្វផ្សាយគោលនយោបាយរបស់គណបក្សនយោបាយ ដើម្បីផ្សព្វផ្សាយជូនសាធារណជន ក្នុងអំឡុងពេលយុទ្ធនាការឃោសនាបោះឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលកិច្ចប្រជុំនេះ ក្រោមអធិបតីភាពលោក ម៉ុក ដារ៉ា អគ្គលេខាធិការរង គ.ជ.ប និងជាប្រធានគណៈកម្មការសម្របសម្រួលកម្មវិធីផ្សព្វផ្សាយអប់រំអ្នកបោះឆ្នោត និងផ្សព្វផ្សាយគោលនយោបាយរបស់គណបក្សនយោបាយ ដែលហៅកាត់ថា “គណៈកម្មការសម្របសម្រួល”។

កិច្ចប្រជុំខាងលើនេះ មានការអញ្ជើញចូលរួមពីតំណាងគណបក្សនយោបាយ សរុបចំនួន១៧ ដែលសុទ្ធតែជាគណបក្សនយោបាយបានចុះបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់។

បើតាមលោក ម៉ុក ដារ៉ា កិច្ចប្រជុំនេះធ្វើឡើង ដើម្បីជម្រាបជូនដល់គណបក្សនយោបាយទាំងអស់ឱ្យបានជ្រួតជ្រាបពីប្រធានបទសម្រាប់កម្មវិធីផ្សព្វផ្សាយគោលនយោបាយគោលការណ៍ និងលក្ខណៈបច្ចេកទេស នៃការផលិតស្ប៉តគណបក្សនយោបាយ និងការរៀបចំអត្ថបទសម្រាប់ព្រឹត្តិបត្រគោលនយោបាយ៕

ដោយ ៖ កោះកែវ