នយោបាយ

ហ៊្វុនស៊ិនប៉ិច អំពាវនាវឲ្យអ្នកពាក់ព័ន្ធដាក់ភ្នាក់ងារសង្កេតការណ៍ ដើម្បីឲ្យការបោះឆ្នោតឃុំ សង្កាត់ មានសុក្រឹតភាព

បានផុស

៣ years មុន

នៅ

ថ្ងៃអង្គារ ១២ មេសា ២០២២

ដោយ

អ្នកនាំពាក្យគណបក្សហ៊្វុនស៊ិនប៉ិច លោក ញឿន អារ៉ាដែន បានអំពាវនាវឲ្យអ្នកពាក់ព័ន្ធដាក់ភ្នាក់ងារសង្កេតការណ៍ ដើម្បីជាភ្នែកជាច្រមុះក្នុងការឃ្លាំមើលដំណើរការបោះឆ្នោតក្រុមប្រឹក្សា ឃុំ សង្កាត់ ឲ្យមានសុក្រឹតភាព និងយុត្តិធម៌។

លោក ញឿន អារ៉ាដែន បានថ្លែងប្រាប់កម្ពុជាថ្មីថា ដើម្បីហើយការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ បានប្រព្រឹត្តទៅដោយសេរី ត្រឹមត្រូវ និងយុត្តិធម៌ គណបក្សហ៊្វុនស៊ិនប៉ិច ក៏បានដាក់ភ្នាក់ងារ ដើម្បីសង្កេតការណ៍ឃ្លាំមើលផងដែរ ហើយលោកបានអំពាវនាវសង្គមស៊ីវិល ក៏ដូចជាគណបក្សនយោបាយដាក់ភ្នាក់ងារសង្កេតការណ៍ឲ្យបានច្រើន ដើម្បីជាភ្នែកជាច្រមុះ ចូលរួមក្នុងការឃ្លាំមើលដំណើរការបោះឆ្នោតនេះ ឲ្យមានសុក្រឹតភាព និងយុត្តិធម៌។

ទាក់ទងទៅនឹងដំណើរការបោះឆ្នោតនេះដែរ លោក ញឿន រ៉ាដែន បានអះអាងថា គណបក្សហ៊្វុនស៊ិនប៉ិចបានដាក់បេក្ខភាពដោយផ្ដោតទៅលើ ឃុំ សង្កាត់ ជាអាទិភាពមួយចំនួន ពីព្រោះបន្ទគណបក្សបន្ទាប់ពីធ្វើសមាជ ប្រកាសទទួលស្គាល់ជាផ្លូវការព្រះអង្គម្ចាស់ នរោត្តម ចក្រាវុឌ្ឍ ជាព្រះប្រធានគណបក្សហ៊្វុនស៊ិនប៉ិច ក៏បានជួបព្យុះភ្លៀងជាច្រើន នាពេលកន្លងមក ធ្វើឲ្យគណបក្សមានពេលវេលាខ្លី ដើម្បីរៀបចំឯកភាពចូលរួមដំណើរការបោះឆ្នោតនេះ។ តែទោះជាយ៉ាងណាគណបក្សមានរចនាសម្ព័ន្ធចាស់ស្ទើរតែគ្រប់ ឃុំ សង្កាត់ ទៅហើយ គ្រាន់តែថា គណបក្សមានពេលវេលាខ្លីប៉ុណ្ណោះ ធ្វើអោយការរៀបចំបេក្ខភាពមានកម្រិត និងជួបបញ្ហាក្នុងការរៀបចំ។

លោក ញឿន រ៉ាដែន បានអះអាងថា បើទោះបីជាមានបញ្ហាខ្លះៗក្នុងការដាក់បេក្ខជនក៏ដោយ ប៉ុន្តែគណបក្សបានដោះស្រាយ នៅថ្នាក់ឃុំ សង្កាត់ មិនបានបន្តពាក្យបណ្ដឹងទៅ គ.ជ.ប ទេ ហើយគណបក្ស ក៏មានទំនាក់ទំនងល្អជាមួយគណៈកម្មការរៀបចំការបោះឆ្នោតឃុំ សង្កាត់ ផងដែរ ផ្សំជាមួយមន្ត្រីគណបក្សបានយល់អំពីគោលការណ៍នៃការដាក់បេក្ខភាពនេះ។

គួររំលឹកថា ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ នឹងប្រព្រឹត្តិនៅថ្ងៃទី០៥ ខែមិថុនា ឆ្នាំ២០២២ ខាងមុខ។ ក្នុងនោះមានគណបក្សចំនួន១៧ ដែលបានចុះបញ្ជីនៅក្រសួងមហាផ្ទៃ បានដាក់បេក្ខភាពចូលរួមនៅក្នុងការបោះឆ្នោតនេះ៕

ដោយ ៖ កោះកែវ