នយោបាយ

លោក នេត ភក្រ្តា៖ តុលាការខ្មែរក្រហម រំពឹងប្រកាសសាលដីកាស្ថាពរបញ្ចប់ការតវ៉ា លើជនជាប់ចោទ ខៀវ សំផន នៅចុងឆ្នាំ២០២២

បានផុស

៣ years មុន

នៅ

ថ្ងៃចន្ទ ១៨ មេសា ២០២២

ដោយ

សំណុំរឿង ០០២/០២ ដែលនៅសល់តែជនជាប់ចោទលោក ខៀវ សំផន រំពឹងថានឹងប្រកាសសាលដីកាស្ថាពរបញ្ចប់ការតវ៉ា នៅចុងឆ្នាំ ២០២២ នេះ។

លោក នេត្រ ភក្ត្រា ប្រធានផ្នែកកិច្ចការសាធារណៈ និងជាអ្នកនាំពាក្យសាលាក្ដីខ្មែរក្រហមបានឲ្យដឹងថា លោក ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យបានប្ដឹងជំទាស់នឹងការរកឃើញពិរុទ្ធភាពក្នុងសំណុំរឿង ០០២/០២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្រ្តីអ្នកនាំពាក្យរូបនេះ អតីតមេដឹកនាំជាន់ខ្ពស់នៃរបបខ្មែរក្រហម នួន ជា និងខៀវ សំផន ត្រូវបានរកឃើញថាមានពិរុទ្ធភាពក្នុងបទចោទឧក្រិដ្ឋកម្មប្រឆាំងនឹងមនុស្សជាតិពាក់ព័ន្ធនឹងការជម្លៀសប្រជាជនដោយបង្ខំក្នុងសំណុំរឿង ០០២/០១ និងរកឃើញមានពិរុទ្ធភាពក្នុងសំណុំរឿង ០០២/០២ ក្នុងបទចោទឧក្រិដ្ឋកម្មប្រឆាំងនឹងមនុស្សជាតិ (សហករណ៍ ការដ្ឋានការងារ ការធ្វើទុក្ខបុកម្នេញលើពុទ្ធសាសនិក ការរៀបអាពាហ៍ពិពាហ៍ដោយបង្ខំជាដើម) ឧក្រិដ្ឋកម្មសង្គ្រាម (មន្ទីរសន្តិសុខ ការបោសសម្អាតផ្ទៃក្នុង ការធ្វើទុកបុកម្នេញលើអតីតមន្ត្រីរដ្ឋការនៃរបបសាធារណរដ្ឋ ជម្លោះប្រដាប់អាវុធជាដើម) និងឧក្រិដ្ឋកម្មប្រល័យពូជសាសន៍ប្រឆាំងជនជាតិចាម និងជនជាតិវៀតណាម។

ដោយឡែកសំណុំរឿង ០០២/០២ នៅសល់តែជនជាប់ចោទ ខៀវ សំផន ម្នាក់គត់ មានអាយុ៩០ ឆ្នាំ រំពឹងថានឹងប្រកាសសាលដីកាស្ថាពរបញ្ចប់ការតវ៉ា នៅអំឡុងចុងឆ្នាំ ដែលអតីតប្រមុខរដ្ឋនៃរបបកម្ពុជាប្រជាធិបតេយ្យរូបនេះបានប្តឹងជំទាស់នឹងការរកឃើញពិរុទ្ធភាពក្នុងសំណុំរឿង ០០២/០២។

សំណុំរឿង០០២/០២ បានចាប់ផ្ដើមតាំងពីឆ្នាំ២០១៤មកម្ល៉េះ ដោយផ្ដោតលើអំពើប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ប្រព្រឹត្តឡើងនៅតាមទីកន្លែងនានានៅក្នុងប្រទេសកម្ពុជា ក្រោមការគ្រប់គ្រងប្រទេសដោយរបបកម្ពុជាប្រជាធិបតេយ្យ ពីថ្ងៃទី១៧មេសា ឆ្នាំ១៩៧៥ ដល់ថ្ងៃទី០៦ មករា ឆ្នាំ១៩៧៩។ ក្រោយដំណើរការកាត់សេចក្ដីអស់រយៈពេល៤ឆ្នាំ ពោលគឺនៅថ្ងៃទី១៦វិច្ឆិកាឆ្នាំ២០១៨ សាលាដំបូងនៃសាលាក្ដីខ្មែរក្រហម បានសម្រេចផ្ដន្ទាទោសជនជាប់ចោទលោក ខៀវ សំផន និងលោក នួន ជា ដាក់ពន្ធនាគារអស់មួយជីវិត។

ដោយសារតែលោក នួន ជា អតីតបងធំទីពីរនៃរបបខ្មែរក្រហមបានស្លាប់ អំឡុងពេលជាប់ឃុំខ្លួនក្នុងខែសីហា ឆ្នាំ២០១៩ បទចោទនិងដំណើរការនីតិវិធីប្រឆាំងរូបលោកក្នុងសំណុំរឿង ០០២/០២ ត្រូវផុតរលត់ និងនៅសល់លោកខៀវ សំផន មិនសុខចិត្តចំពោះការសម្រេចនេះ ហើយបានប្រើសិទ្ធិប្ដឹងសាទុក្ខទៅកាន់តុលាការកំពូល។

នៅក្នុងបណ្ដឹងសាទុក្ខរបស់ខ្លួន ជនជាប់ចោទ ខៀវ សំផន បានដាក់សំណើចំនួន ៣ ចំណុចទៅកាន់តុលាការ៖ ទី១ ជាចម្បង ធ្វើមោឃភាពសាលក្រមរបស់អង្គជំនុំជម្រះសាលាដំបូងដែលបានប្រកាសនៅថ្ងៃទី ១៦ ខែវិច្ឆិកាឆ្នាំ២០១៨ ដោយសំអាងហេតុពីការរំលោភលើវិធានផ្ទៃក្នុង។ ទី២ ជាបន្ទាប់បន្សំ ធ្វើមោឃភាពសាលក្រមពីការគ្មានពិរុទ្ធភាពចំពោះបទចោទនីមួយៗ។ និងទី៣ ជាបន្ទាប់បន្សំបំផុត កែប្រែការផ្ដន្ទាទោស និងប្រកាសដាក់ទោសឲ្យជាប់ពន្ធនាគារក្នុងរយៈពេលកំណត់មួយ។

លោក ខៀវ សំផន ដែលជាអតីតមេខ្មែរក្រហមថ្នាក់ខ្ពស់តែម្នាក់គត់ដែលនៅរស់រាន ធ្លាប់ត្រូវបានកាត់ទោសជាប់ពន្ធនាគារមួយជីវិតរួចមកហើយ ក្នុងសំណុំរឿង០០២/០១ ទាក់ទិននឹងការជម្លៀសបណ្ដេញចេញដោយបង្ខំពីទីក្រុងភ្នំពេញ និងតំបន់ផ្សេងទៀត និងការសម្លាប់ ទាហានរបបសាធារណរដ្ឋខ្មែរ ក្រោយខ្មែរក្រហមចូលកាន់អំណាចនៅខែមេសា ឆ្នាំ១៩៧៥។

គួរបញ្ជាក់ថា ដោយសារតែការខ្វែងគំនិតគ្នានៅដំណាក់កាលអង្គបុរេជំនុំជម្រះ រវាងភាគីជាតិ និងភាគីអន្តរជាតិលើសំណុំរឿង០០៣ ប្រឆាំងនឹងមេទាហានជើងទឹកខ្មែរក្រហម មាស មុត និងសំណុំរឿង ០០៤ ប្រឆាំងនឹងអតីតលេខាតំបន់១៣របស់ខ្មែរក្រហម យឹម ទិត្យ ដំណើរការចុងក្រោយនៃសំណុំរឿង លោក ខៀវ សំផន នេះ អាចឈានទៅរកទីបញ្ចប់របស់សាលាក្ដីកូនកាត់នេះ ដែលបានចំណាយពេល ១៥ ឆ្នាំ និងចាយប្រាក់អស់៣៣០លានដុល្លារអាមេរិក៕

អត្ថបទ៖ វាសនា