នយោបាយ

គ.ជ.ប នឹងបង្ហាញពីដំណើរការបោះពុម្ពសន្លឹកឆ្នោតនៅថ្ងៃសុក្រខានស្អែកនេះ

បានផុស

៣ years មុន

នៅ

ថ្ងៃពុធ ៤ ឧសភា ២០២២

ដោយ

គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងនាល្ងាចនេះថា នៅព្រឹកថ្ងៃទី០៦ ខែឧសភា ឆ្នាំ២០២២ គ.ជ.ប នឹងរៀបចំកម្មវិធីបង្ហាញអំពីដំណើរការបោះពុម្ពសន្លឹកឆ្នោត សម្រាប់ប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅរោងពុម្ព សួន វឌ្ឍនៈ ដែលស្ថិតនៅផ្ទះលេខ ៩ ផ្លូវលេខ៣៤៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។

បើតាម គ.ជ.ប ការបង្ហាញអំពីដំណើរការបោះពុម្ពសន្លឹកឆ្នោតនេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់លោក ប្រាជ្ញ ចន្ទ ប្រធាន គ.ជ.ប ហើយតំណាងគណបក្សនយោបាយ អ្នកសង្កេតការណ៍ជាតិ និងអន្តរជាតិ និងប្រព័ន្ធផ្សព្វផ្សាយព័ត៌មានជាតិ និងអន្តរជាតិ ក៏ត្រូវបានអញ្ជើញឲ្យចូលរួមពិនិត្យមើល និងយកព័ត៌មានផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ។ ក្នុងនោះមានគណបក្សចំនួន១៧ បានចុះឈ្មោះដើម្បីចូលរួមប្រកួតប្រជែងនៅក្នុងការបោះឆ្នោតនេះ។

សូមបញ្ជាក់ថា ចាប់តាំងពីឆ្នាំ២០០២មក រាជរដ្ឋាភិបាលកម្ពុជាបានធ្វើកំណែទម្រង់ការគ្រប់គ្រងរដ្ឋបាលនៅថ្នាក់ ឃុំ សង្កាត់ តាមបែបវិមជ្ឈការ ហើយចាប់ពីពេលនោះមក កម្ពុជាបានរៀបចំការបោះឆ្នោតជាសកល ដើម្បីជ្រើសរើសក្រុមប្រឹក្សាឃុំ សង្កាត់ យ៉ាងទៀងទាត់រៀងរាល់៥ ឆ្នាំម្តង បានចំនួន៤ លើករួចមកហើយ៕

ដោយ ៖ កោះកែវ