ប្រេសិតពិសេសប្រធានអាស៊ាន៖ វិបត្តិ​មីយ៉ាន់ម៉ា នៅតែមានសង្ឃឹមដរាបណា​យើងរួមគ្នាដោះស្រាយ

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ក្នុងឋានៈជាប្រេសិតពិសេសរបស់ប្រធានអាស៊ាន កាលពីយប់ថ្ងៃទី២៧ ខែឧសភា ឆ្នាំ២០២២ បានផ្ដល់ព័ត៌មានជូនសមាជិកក្រុមប្រឹក្សាសន្តិសុខអង្គការសហប្រជាជាតិ (UNSC) ស្តីពីស្ថានភាពនៅមីយ៉ាន់ម៉ា តាមប្រព័ន្ធវីដេអូ។

បើតាមលោកឧបនាយករដ្ឋមន្ត្រី ប្រាក់ សុខុន ការផ្តល់ព័ត៌មានជូនសមាជិកក្រុមប្រឹក្សាសន្តិសុខអង្គការសហប្រជាជាតិ (UNSC) នេះ គឺជាលើកទី២ហើយ ដែលកាលពីលើកទី១ នៅខែមករា ដើមឆ្នាំ២០២២។ លោកថា ប្រទេសមីយ៉ាន់ម៉ា នៅតែបន្តប្រឈមមុខនឹងបញ្ហាស្មុគស្មាញជាច្រើន ដូចជាវិបត្តិនយោបាយ និងសេដ្ឋកិច្ច ជំងឺរាតត្បាតកូវីដ-១៩ និងវិបត្តិមនុស្សធម៌ដ៏ធ្ងន់ធ្ងរ។

យ៉ាងណាក្តី លោកឧបនាយករដ្ឋមន្ត្រី ប្រាក់ សុខុន អះអាងថា ការលើកឡើងនេះ មិនមែនមានន័យថា អស់សង្ឃឹមនោះទេ ដរាបណាយើងទាំងអស់ រួមទាំងអាស៊ាន និងសហគមន៍អន្តរជាតិ បន្តប្រាស្រ័យទាក់ទងជាមួយមីយ៉ាន់ម៉ា ប្រកបដោយការស្ថាបនា ផ្ទុយពីនយោបាយឯកោនិយម។ “កម្ពុជាទទួលស្គាល់ថា វិបត្តិមីយ៉ាន់ម៉ា គឺមានលក្ខណៈចាក់ស្រែះជ្រៅ។ ស្របពេលដែលយើងកំពុងប្រឹងប្រែងអស់ពីសមត្ថភាពក្នុងនាមជាប្រធានអាស៊ាន។ យើងនៅតែសង្ឃឹមថា កិច្ចប្រឹងប្រែងនោះ នឹងចូលរួមចំណែកកសាងមូលដ្ឋានគ្រឹះដ៏រឹងមាំមួយ ដើម្បីស្វែងរកសន្តិភាព ស្ថិរភាព និងវិបុលភាពសម្រាប់ប្រទេសមីយ៉ាន់ម៉ា ទាំងមូល។

ឧបនាយករដ្ឋមន្ត្រី ប្រាក់ សុខុន បានឲ្យដឹងដែរថា លោកកំពុងទន្ទឹងរង់ចាំដំណើរទស្សនកិច្ចលើក​ទីពីរទៅកាន់ប្រទេសមីយ៉ាន់ម៉ា​នៅពេលដ៏ខ្លីខាងមុខនេះ ហើយមានចំណុចសំខាន់ៗចំនួន៥ ដែលលោកបានគិតទុកជាមុនគឺ៖ ១, ការបញ្ឈប់អំពើហិង្សា ២, ការចូលរួមប្រាស្រ័យទាក់ទងគ្នាក្នុងន័យស្ថាបនា ៣, យុទ្ធនាការចាក់វ៉ាក់សាំងកូវីដ-១៩ ៤, ជំនួយមនុស្សធម៌ និងជាពិសេសចុងក្រោយ ៥, សុទិដ្ឋិនិយម៕ កោះកែវ