បក្សខ្មែរស្រឡាញ់ជាតិ ៖ ដំណើរការបោះឆ្នោតមានភាពល្អប្រសើរ ហើយពលរដ្ឋមានភាពចាស់ទុំជាងអាណត្តិមុនៗ

គណបក្សខ្មែរស្រឡាញ់ជាតិ បានអះអាងថា ដំណើរការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥នេះ មានភាពល្អប្រសើរ ទាំងមន្ត្រីរៀបចំការបោះឆ្នោត និងសកម្មជនគណបក្ស ក៏ដូចជាប្រជាពលរដ្ឋម្ចាស់ឆ្នោត មានភាពចាស់ទុំជាងអាណត្តិមុនៗ។ នេះបើតាមសេចក្តីការណ៍ របស់គណបក្សខ្មែរស្រលាញ់ជាតិ នៅថ្ងៃទី ៧ ខែមិថុនា ឆ្នាំ ២០២២នេះ។

បើតាមសេចក្តីថ្លែងការណ៍ គណបក្សខ្មែរស្រឡាញ់ជាតិ បានថ្លែងអំណរគុណយ៉ាងជ្រាលជ្រៅ ចំពោះកិច្ចខិតខំប្រឹងប្រែង និងការទទួលខុសត្រូវរបស់ថ្នាក់ដឹកនាំគ្រប់លំដាប់ថ្នាក់ ដែលបានបំពេញបេសកម្មដឹកនាំ ចាត់ចែងរៀបចំការងារទាំងឡាយក្នុងដំណើរ ការចូលរួមប្រកួតប្រជែងបោះឆ្នោតជ្រើស រើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ ប្រកបដោយជោគជ័យ។

ជុំវិញដំណើរបោះឆ្នោត គណបក្សខ្មែរស្រឡាញ់ជាតិ បានលើកឡើងថា ប្រជាពលរដ្ឋមានការយល់ដឹងអំពីសិទ្ធិ កាតព្វកិច្ច និងសារៈសំខាន់នៃការបោះឆ្នោត និងបានទៅចូលរួមបោះឆ្នោតដោយស្មារតីទទួលខុសត្រូវ ហើយដំណើរការបោះឆ្នោតនេះ មានការល្អប្រសើរ ទាំងមន្ត្រីរៀបចំការបោះឆ្នោត និងសកម្មជនគណបក្ស ក៏ដូចជាប្រជាពលរដ្ឋម្ចាស់ឆ្នោត មានភាពចាស់ទុំជាងអាណត្តិមុនៗ។

ទោះជាយ៉ាងណា គណបក្សខ្មែរស្រឡាញ់ជាតិ បានអះអាងថា ឥរិយាបទរបស់អាជ្ញាធរមូលដ្ឋានមួយចំនួន នៅតែមិនផ្លាស់ប្តូរទម្លាប់ មិនគោរពសេចក្តីណែនាំរបស់ គ.ជ.ប។ គណបក្សខ្មែរស្រឡាញ់ជាតិ បានបញ្ជាក់ចុងក្រោយថា «គណ បក្សខ្មែរស្រឡាញ់ជាតិ សូមប្រកាសគោរពទៅតាមច្បាប់ បទបញ្ជានិងនីតិវិធី និងឆន្ទៈរបស់ប្រជាពលរដ្ឋម្ចាស់ឆ្នោត នៅថ្ងៃទី ៥ ខែមិថុនា ឆ្នាំ២០២២»៕

អត្ថបទ៖ កោះកែវ