នយោបាយ

គ.ជ.ប ស្នើអាជ្ញាធរមានសមត្ថកិច្ចស៊ើប អង្កេត និងចាត់វិធានការតាមច្បាប់លើអ្នកនិពន្ធបទចម្រៀង “ផ្កាយរះកណ្ដាលថ្ងៃ”

បានផុស

៣ years មុន

នៅ

ថ្ងៃពុធ ១៥ មិថុនា ២០២២

ដោយ

គណៈកម្មាធិការជាតិរៀបចំការបោះឆ្នោត (គ.ជ.ប) ស្នើអាជ្ញាធរមានសមត្ថកិច្ចស៊ើប អង្កេត និងចាត់វិធានការតាមច្បាប់លើអ្នកនិពន្ធបទចម្រៀងមួយបទ ដែលមានចំណងជើងថា “ផ្កាយរះកណ្ដាលថ្ងៃ” ដែលបទចម្រៀងនេះ មានខ្លឹមសារប្រមាថ តិះដៀល បន្ទាបបន្ថោក ធ្វើឲ្យប៉ះពាល់យ៉ាងធ្ងន់ធ្ងរទៅលើស្ថាប័ន គ.ជ.ប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមសេចក្តីប្រកាសព័ត៌មានរបស់ គ.ជ.ប ដែលទទួលបាននាល្ងាចថ្ងៃទី១៥ ខែមិថុនា នេះ។ គ.ជ.ប បញ្ជាក់ថា បានឃើញទំព័រហ្វេសបុក (Facebook) ឈ្មោះ “ វីរភាព សម រង្ស៊ី “ចាក់ផ្សាយបទចម្រៀងមួយ ដែលមានចំណងជើងថា “ផ្កាយរះកណ្ដាលថ្ងៃ” ដែលបានផ្សព្វផ្សាយកាលពីថ្ងៃទី១៤ ខែមិថុនា ឆ្នាំ២០២២ ដោយច្រៀងបង្អួចកេរ្តិ៍ឈ្មោះ គ.ជ.ប ថាជា “ ចោរ គ.ជ.ប. និងបង្កប់ដោយន័យអសុរោះ អសីលធម៌ ប្រមាថ តិះដៀល បន្ទាបបន្ថោកដែលប៉ះពាល់យ៉ាងធ្ងន់ធ្ងរទៅលើស្ថាប័ន គ.ជ.ប និងដែលអាចធ្វើឱ្យមានការភាន់ ច្រឡំ និងបាត់ទំនុកចិត្តលើការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលបានប្រព្រឹត្តទៅកាលពីថ្ងៃទី៥ ខែមិថុនា ឆ្នាំ២០២២” ។

គ.ជ.ប មានការសោកស្តាយ និងមិនអាចទទួលយកបាន ហើយបានថ្កោលទោសយ៉ាងដាច់អហង្ការ ចំពោះទង្វើរបស់ជនអគតិមួយចំនួន ដែលមានចេតនាទុច្ចរិត ក្នុងគោលដៅបម្រើផលប្រយោជន៍ និងមហិច្ឆតារបស់ខ្លួន ។ ជាមួយគ្នានោះ គ.ជ.ប បានស្នើឲ្យបុគ្គលដែលពាក់ព័ន្ធ បញ្ឈប់សកម្មភាពចែកចាយ បទចម្រៀងនេះ ជាបន្ទាន់។

អនុលោមតាមមាត្រា៤២ នៃច្បាប់ស្តីពីការរៀបចំ និងការប្រព្រឹត្តទៅនៃ គ.ជ.ប និងមាត្រា១៧១ នៃ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ គ.ជ.ប បានស្នើសុំអាជ្ញាធរមាន សមត្ថកិច្ច មេត្តាស៊ើបអង្កេត និងចាត់ វិធានការតាមច្បាប់ជាបន្ទាន់ ដើម្បីធានាឯករាជ្យភាព អព្យាក្រឹត សច្ចៈ យុត្តិធម៌ និងតម្លាភាព របស់ស្ថាប័នជាតិ គជ.ប៕

ដោយ ៖ កោះកែវ