គ.ជ.ប ជូនដំណឹងពីការផ្សាយលទ្ធផលបោះឆ្នោតឃុំ-សង្កាត់ផ្លូវការ នៅថ្ងៃទី ២៦ មិថុនា

គណៈកម្មាធិការជាតិរៀបចំការបោះឆ្នោត (គ.ជ.ប) បាន​ឲ្យដឹងនៅរសៀលថ្ងៃទី ២៣ ខែមិថុនា នេះថា​ គ.ជ.ប នឹងផ្សាយលទ្ធផលផ្លូវការ នៃការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ នៅថ្ងៃអាទិត្យទី ២៦ ខែមិថុនា ឆ្នាំ ២០២២ ចាប់ពីវេលា​ម៉ោង​ ១ និង០០នាទីរសៀល។

បើតាម គ.ជ.ប​ លទ្ធផលផ្លូវការនឹង​ផ្សព្វផ្សាយ​តាម ទូរទស្សន៍ជាតិកម្ពុជា (ទទក), វិទ្យុជាតិកម្ពុជា (វិទ្យុ AM 918 KHz វិទ្យុ FM 96 MHz និងវិទ្យុវត្តភ្នំ FM 105.70 MHz), ទីភ្នាក់ងារសារព័ត៌មានកម្ពុជា – AKP, គេហទំព័រ គ.ជ.ប៖ www.nec.gov.kh និង electresult.nec.gov.kh, កម្មវិធីទូរស័ព្ទដៃ៖ NEC KH និង CamNEC News, Facebook៖ គណៈកម្មាធិការជាតិរៀបចំការបោះឆ្នោត National Election Committee និង YouTube៖ គណៈកម្មាធិការជាតិរៀបចំការបោះឆ្នោត National Election Committee។

សូមបញ្ជាក់ថា ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ បានប្រព្រឹត្តិទៅកាលពីថ្ងៃអាទិត្យទី ៥ ខែមិថុនា ឆ្នាំ ២០២២ ដោយមាន​គណបក្ស​ចំនួន ១៧ បាន​ចូលរួម​ប្រកួតប្រជែង។

ក្រោយពីបញ្ចប់ការបោះឆ្នោត ក៏ដូចជាការរាប់សន្លឹកឆ្នោត អ្នកសង្កេតការណ៍ជាតិ-អន្តរជាតិ បានវាយតម្លៃថា ដំណើរការបោះឆ្នោតនេះ បានប្រព្រឹត្តទៅដោយជោគជ័យ ក្នុងបរិយាកាសស្ងប់ស្ងាត់ មានសន្តិសុខសុវត្ថភាព និងសណ្ដាប់ធ្នាប់សាធារណៈ គ្មានអំពើហិង្សា និងគ្មានការគំរាមកំហែងឡើយ។ តំណាងគណបក្សនយោបាយភាគច្រើន ដែលចូលរួមនៅក្នុងការបោះឆ្នោតនេះ ក៏បានធ្វើសេចក្តីថ្លែងការណ៍ទទួលយកលទ្ធផល នៃការបោះឆ្នោតនេះផងដែរ៕

អត្ថបទ៖ កោះកែវ​