បញ្ជីបេក្ខជន នៃគណបក្សចំនួន ៩ ទទួលបានអាសនៈក្រុមប្រឹក្សា សម្រាប់ការបោះឆ្នោតឃុំ-សង្កាត់អាណត្តិទី ៥

គណៈកម្មាធិការជាតិរៀបចំការបោះឆ្នោត​ (គ.ជ.ប)​ បានបង្ហាញអំពីបញ្ជីបេក្ខជននៃគណបក្សនយោ​បាយចំនួន ៩ បានទទួលអាសនៈក្រុមប្រឹក្សា សម្រាប់ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥។ ការបង្ហាញនេះ បន្ទាប់ពីគ.ជ.ប បានបើកកិច្ចប្រជុំក្រោមអធិបតីភាពលោក ប្រាជ្ញ ចន្ទ ប្រធាន គ.ជ.ប ដើម្បីពិនិត្យ និងសម្រេចលើឯកសារពាក់ព័ន្ធនឹងការប្រកាសលទ្ធផលផ្លូវការ នៃការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ ឆ្នាំ ២០២២ នាព្រឹកថ្ងៃទី ២៤ ខែមិថុនា ឆ្នាំ ២០២២នេះ។

សេចក្ដីប្រកាសព័ត៌មាន របស់ គ.ជ.ប បានឲ្យដឹងថា បន្ទាប់ពីបានពិនិត្យ និងពិភាក្សាយ៉ាងល្អិតល្អន់ រួចមក គ.ជ.ប បានឯកភាពលើខ្លឹមសារ ឯកសារទាំងអស់ខាងលើ ដែលអគ្គលេខាធិការដ្ឋាន គ.ជ.ប បានដាក់ជូន។

យោងតាមតារាងលទ្ធផលផ្លូវការ នៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិ ទី៥ ឆ្នាំ២០២២នេះ មានដូចខាងក្រោម ៖

-ប្រជាពលរដ្ឋចេញទៅបោះឆ្នោតសរុបចំនួន ៧.៣៩៤.៤២៧នាក់ ស្មើនឹង ៨០,៣២%

-សន្លឹកឆ្នោតបានការសរុបចំនួន ៧.២៣៧.០៣៧សន្លឹក

-សន្លឹកឆ្នោតមិនបានការសរុបចំនួន ១៥៧.៣៩០សន្លឹក

-បញ្ជីបេក្ខជន នៃគណបក្សនយោបាយចំនួន ៩ ក្នុងចំណោមគណបក្សនយោបាយចំនួន ១៧ ដែលបានចូលរួមប្រកួតប្រជែង បានទទួលអាសនៈក្រុមប្រឹក្សា សម្រាប់ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ២០២២ ក្នុងនោះមាន៖

១.បញ្ជីបេក្ខជននៃគណបក្សប្រជាជនកម្ពុជា ទទួលបាន ៩.៣៧៦ អាសនៈ

២.បញ្ជីបេក្ខជននៃគណបក្សភ្លើងទៀន ទទួលបាន ២.១៩៨ អាសនៈ

៣.បញ្ជីបេក្ខជននៃគណបក្សហ៊្វុនស៊ិនប៉ិច ទទួលបាន ១៩ អាសនៈ

៤.បញ្ជីបេក្ខជននៃគណបក្សខ្មែររួបរួមជាតិ ទទួលបាន ១៣ អាសនៈ

៥.បញ្ជីបេក្ខជននៃគណបក្សប្រជាធិបតេយ្យមូលដ្ឋាន ទទួលបាន ៦ អាសនៈ

៦.បញ្ជីបេក្ខជននៃគណបក្សខ្មែរស្រឡាញ់ជាតិ ទទួលបាន ៥ អាសនៈ

៧.បញ្ជីបេក្ខជននៃគណបក្សយុវជនកម្ពុជា ទទួលបាន ៣ អាសនៈ

៨.បញ្ជីបេក្ខជននៃគណបក្សកម្ពុជានិយម ទទួលបាន ១ អាសនៈ

៩.បញ្ជីបេក្ខជននៃគណបក្សសំបុកឃ្មុំសង្គមប្រជាធិបតេយ្យ ទទួលបាន ១ អាសនៈ។

សេចក្ដីប្រកាសព័ត៌មានដដែល បានឲ្យដឹងទៀតថា គ.ជ.ប សម្រេចឲ្យអង្គភាពជំនាញផ្សព្វផ្សាយលទ្ធផលផ្លូវការ នៃការបោះឆ្នោតនេះជាសាធារណៈ នៅថ្ងៃអាទិត្យ ទី ២៦ ខែមិថុនា ឆ្នាំ ២០២២ តាមប្រព័ន្ធផ្សព្វផ្សាយព័ត៌មានរបស់រដ្ឋ និងផ្សាយតាមគេហទំព័រ និងតាមប្រព័ន្ធផ្សព្វផ្សាយព័ត៌មានសង្គមរបស់ គ.ជ.ប៕

អត្ថបទ៖ ឃួន សុភ័ក្រ