ក្រសួងមហាផ្ទៃ សម្រេចលុបឈ្មោះគណបក្សអនាគតជាតិ ចេញពីបញ្ជីគណបក្សនយោបាយ

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចលុបឈ្មោះ «គណបក្សអនាគតជាតិ» របស់លោក ឃីម ឡាគី ចេញពីបញ្ជីគណបក្សនយោបាយ នៅក្រសួងមហាផ្ទៃហើយ។ នេះបើយោងតាមសេចក្តីសម្រេច ចុះថ្ងៃទី ៧ ខែកក្កដា ឆ្នាំ ២០២២នេះ។

សេចក្តីសម្រេចចុះហត្ថលេខាដោយសម្តេចក្រឡាហោម ស ខេង បានបញ្ជាក់ថា «ត្រូវបានលុបឈ្មោះ គណបក្សអនាគតជាតិ ចេញពីបញ្ជីគណបក្សនយោបាយ បង្កើតនៅក្រសួងមហាផ្ទៃ តាមបញ្ញត្តិមាត្រា ១៩ថ្មី នៃច្បាប់ស្តីពីគណបក្សនយោបាយ»។

គួរបញ្ជាក់ថា គណបក្សអនាគតជាតិ ត្រូវបានស្នើសុំបង្កើតដោយលោក ឃីម ឡាគី ដោយបានដាក់លិខិតស្នើសុំទៅក្រសួងមហាផ្ទៃ កាលពីថ្ងៃទី ២៥ ខែតុលា ឆ្នាំ ២០២១។ បន្ទាប់មកនៅថ្ងៃទី ២៤ ខែវិច្ឆិកា ឆ្នាំ ២០២១ ក្រសួងមហាផ្ទៃ បានអនុញ្ញាតឲ្យបង្កើត។ ប៉ុន្តែលោក ឃីម ឡាគី បែរជាទៅចូលរួមជា​មួយគណបក្សភ្លើងទៀនទៅវិញ។

លោក ឃីម ឡាគី គឺជាអតីតមន្ត្រីជាន់ខ្ពស់មួយរូប ក្នុងចំណោមអតីតមន្ត្រីគណបក្សសង្គ្រោះជាតិចំនួន១១៨នាក់ ដែលត្រូវបានហាមឃាត់មិនឲ្យធ្វើសកម្មភាពនយោបាយ រយៈពេល ៥ឆ្នាំ នៅពេលដែលតុលាការកំពូល បានរំលាយគណបក្សសង្គ្រោះជាតិ កាលពីឆ្នាំ ២០១៧ ពីបទប៉ុនប៉ងផ្តួលរំលំរាជរដ្ឋាភិបាល។ ប៉ុន្តែលោក ទទួលបានសម្បទាននយោបាយឡើងវិញហើយ តាមរយៈព្រះរាជក្រឹត្យ ឡាយព្រះហស្តលេខាដោយព្រះ​មហាក្សត្រ៕

អត្ថបទ៖ កោះកែវ