ក្រោយចេញពីបក្សខ្មែរស្រឡាញ់ជាតិ លោក ញ៉ែម អេន ត្រូវបានបក្សខ្មែររួបរួមជាតិ តែងតាំងជាបេសកជនពិសេស

លោក ញ៉ែម​ អេន​ អតីតអ្នកថតរូប នៅមជ្ឈមណ្ឌលឧក្រិដ្ឋកម្មប្រល័យពូជសាសន៍ទួលស្លែង (ស.២១) បានសម្រចចិត្តចូលរួម ជាមួយគណបក្សខ្មែររួបរួមជាតិរបស់លោក ញ៉ឹក ប៊ុនឆៃ ដោយទទួលបានតំណែង ជាបេសកជនពិសេសរបស់លោក ញឹក ប៊ុនឆៃ ប្រធានគណបក្ស។ នេះបើយោងតាមសេចក្តីសម្រេច ចុះថ្ងៃទី ១៨​ ខែកក្កដា​ ឆ្នាំ ២០២២ម្សិលមិញ។

លោក ញ៉ែម អេន បានថ្លែងប្រាប់កម្ពុជាថ្មីនាព្រឹកនេះថា ការសម្រេចចូលរួមជាមួយគណបក្សខ្មែររួបរួមជាតិ ក្រោយពីចាកចេញពីគណបក្សខ្មែរស្រឡាញ់ជាតិនោះ ដោយសារតែលោកមើលឃើញគោលនយោបាយ ក៏ដូចជាភាពនឹងនររបស់ប្រធានគណបក្សនេះ។

លោក ញ៉ែម អេន បានបញ្ជាក់ថា «ខ្ញុំឃើញប្ញសគល់នយោបាយមិនខុសគ្នាទេ សំខាន់ផ្តោតទៅលើការផ្សះផ្សាជាតិ បង្រួបបង្រួមជាតិ មិនយកខ្មែរណាជាសត្រូវ មានឯករាជ្យ មានសន្តិភាព និងអភិវឌ្ឍន៍។ ខ្ញុំចូលរួមនេះ ទីមួយ ខ្ញុំឃើញថា ឯកឧត្តម (ញឹក ប៊ុនឆៃ) ជាវរ:ជន និងជាបណ្ឌិតមួយរូប ដែលខ្ញុំគោរពគាត់ ទាក់ទងការតស៊ូ ទាក់ទងការលះបង់ពេលវេលា។ គណបក្សខ្មែររួបរួមជាតិ មានឯករាជ្យ មានសន្តិភាព និងយុត្តិធម៌ ដែលខ្ញុំអាចទទួលយកបាន»។

លោក ញ៉ែម អេន អះអាងទៀតថា គណបក្សណា ក៏មានគោលនយោបាយដែរ តែសំខាន់ថ្នាក់ដឹកនាំនឹងន អត់វាយប្រហារអ្នកដទៃ អត់ឆ្វេចឆ្វាច អត់ឆ្វេងស្ដាំ ហើយប្រសិនបើធ្វើនយោបាយ បម្រុងដុតផ្ទះគេដដែល កុំធ្វើល្អជាង។

សូមបញ្ជាក់ថា លោក ញ៉ែម អេន បានប្រកាសចាកចេញពីគណបក្សខ្មែរស្រឡាញ់ជាតិ តាមរយៈលិខិ​ត​មួយច្បាប់ ចុះថ្ងៃទី ៦ ខែកក្កដា ឆ្នាំ ២០២២ ដោយសារតែមានបញ្ហាមួយចំនួន។ លោក ញ៉ែម អេន ធ្លាប់មានតំណែងជាអភិបាលរងស្រុកអន្លង់វែង ហើយបានលាឈប់ទៅចូលរួមជាមួយអតីតគណបក្សសង្គ្រោះជាតិ, គណបក្សប្រជាជនកម្ពុជា, គណបក្សអំណាចខ្មែរ, គណបក្សខ្មែរសាធារណរដ្ឋ, គណបក្សពលកររុងរឿង, គណបក្សខ្មែរស្រឡាញជាតិ និងចុងក្រោយនេះ គណបក្សខ្មែររួបរួមជាតិ របស់លោក ញឹក ប៊ុនឆៃ៕

អត្ថបទ៖ កោះកែវ