ឯកឧត្តម ហ៊ុន ម៉ាណែត៖គណបក្សប្រជាជន ជាបង្អែកដ៏រឹងមាំរបស់ប្រជាជនក្នុងការការពារ សន្តិភាព ស្ថិរភាពសង្គម

ឯកឧត្ដមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្ដាល បានថ្លែងថា គណបក្សប្រជាជនកម្ពុជា គឺជាបង្អែកដ៏រឹងមាំរបស់ប្រជាជនក្នុងការការពារសន្តិភាព ស្ថិរភាព វឌ្ឍនភាព និងវិបុលភាព។ ឯកឧត្តមបណ្ឌិត ថ្លែងបញ្ជាក់បែបនេះ  ក្នុងឱកាសប្រកាសបញ្ចូលសមាជិក-សមាជិកាយុវជនគណបក្សប្រជាជន នៅក្រុងសៀមរាប ខេត្តសៀមរាប នៅថ្ងៃទី៣ ខែកញ្ញានេះ។

ឯកឧត្តមបណ្ឌិត ហ៊ុន ម៉ាណែត លើកឡើងថា គណបក្សប្រជាជនកម្ពុជា ជាគណបក្សតែមួយគត់ដែលតែងតែបានធ្វើអ្វីៗគ្រប់យ៉ាងដើម្បីជាតិ និងប្រជាជនកម្ពុជា។ ឯកឧត្តមបណ្ឌិត សង្កត់ធ្ងន់ថា ជោគជ័យរបស់គណបក្សប្រជាជនកម្ពុជា កន្លងទៅនេះ គឺបានបង្ហាញយ៉ាងច្បាស់អំពីភាពចាស់ទុំខាងនយោបាយ។ ត្រង់ចំណុចនេះ ឯកឧត្តមបណ្ឌិត បានជំរុញដល់សមាជិក-សមាជិការបស់គណបក្សទាំងអស់ ត្រូវតែបន្តការថែរក្សាប្រពៃណីដ៏ល្អផូរផង់របស់គណបក្ស និងបន្តពង្រឹងសាមគ្គីភាពផ្ទៃក្នុងឲ្យបានល្អប្រសើរ និងមានប្រសិទ្ធភាពខ្ពស់ជានិច្ចនិរន្តរ៍។   

ឯកឧត្តមបណ្ឌិត ហ៊ុន ម៉ាណែត បានបន្ថែមថា តាមរយៈមោទនភាពនៃភាពជោគជ័យរបស់គណបក្សប្រជាជន នាពេលកន្លងមកនេះ  ក៏គឺជាការផ្ដល់នូវភាពយុតិ្តធម៌ និងសច្ចធម៌យ៉ាងពិតប្រាកដរបស់ប្រជាជនជូនចំពោះសម្ដេចតេជោ ហ៊ុន សែន ប្រមុខគណបក្សប្រជាជនកម្ពុជា  ដែលបាននិងកំពុងខិតខំប្រឹងប្រែងធ្វើពលិកម្មគ្រប់បែបយ៉ាងទាំងអស់ ដើម្បីបុព្វហេតុជាតិ និងប្រជាជន ក្នុងការលើកកម្ពស់កិត្យានុភាពកម្ពុជានៅលើឆាកអន្តរជាតិ។

ឈរលើមូលដ្ឋាននេះ ឯកឧត្តមបណ្ឌិត គូសបញ្ជាក់ថា ជាបេសកកម្មរួមរបស់សមាជិកទាំងអស់ គឺត្រូវតែបន្តការចូលរួមបម្រើប្រជាជនឲ្យអស់ពីសមត្ថភាព និងលទ្ធភាព  ពិសេស គឺការពារសុខសន្តិភាព ស្ថិរភាព និងការអភិវឌ្ឍនៅកម្ពុជាឲ្យបានគង់វង្សតរៀងទៅ៕

ដោយ៖ ធឿន វ៉ាន់សុង