​ឯកឧត្តម ហ៊ុន ម៉ាណែត​ ចែកអ្នកវិភាគនៅកម្ពុជា​២ប្រភេទគឺវិភាគបែបវិទ្យាសាស្ត្រ​ និងស៊ីអារម្មណ៍

ឯកឧត្តម ឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោក និងជាបេក្ខភាពនាយករដ្ឋមន្រ្តីមានប្រសាសន៍ថា នៅកម្ពុជាមានអ្នកវិភាគ២ប្រភេទ គឺអ្នកវិភាគបែបវិទ្យាសាស្រ្ត និងអ្នកវិភាគបែបស៊ីអារម្មណ៍។

ការអះអាងរបស់ឯកឧត្តម ហ៊ុន ម៉ាណែត គឺបានធ្វើឡើងបន្ទាប់ពីមានការធ្វើអត្ថាធិប្បាយជាហូរហែរក្នុងន័យអវិជ្ជមានពាក់ព័ន្ធនឹងការជ្រើសរើសបេក្ខជនបន្តវេនរបស់គណបក្សប្រជាជនកម្ពុជាឥតឈប់ឈរ។

ឯកឧត្តម ហ៊ុន ម៉ាណែត មានប្រសាសន៍ថា៖ «កាលខ្ញុំនៅរៀន យើងមានតែអ្នកវិភាគតែមួយបែបទេ ឥឡូវនេះ ខ្ញុំស្តាប់យូរទៅមានអ្នកវិភាគ២បែប។ វិភាគទី១ គេហៅថា អ្នកវិភាគបែបវិទ្យាសាស្រ្ត វិភាគទី២ គេហៅថា វិភាគបែបស៊ីអារម្មណ៍»។

បើតាមឯកឧត្តម ហ៊ុន ម៉ាណែត អ្នកវិភាគបែបវិទ្យាសាស្រ្ត គឺគេប្រមូលទិន្នន័យព័ត៌មានឲ្យបានគ្រប់ជ្រុងជ្រោយ ដើម្បីវិភាគទាញយកការសន្និដ្ឋាន ឬលទ្ធផល ទើបមានភាពសុក្រឹត និងគ្រប់ជ្រុងជ្រោយ។ រីឯការវិភាគបែបស៊ីអារម្មណ៍វិញ គឺធ្វើផ្ទុយពីវិទ្យាសាស្រ្ត នោះគឺគេបានកំណត់នូវលទ្ធផលដែលគេចង់បានទុកជាមុន។

ឯកឧត្តម ហ៊ុន ម៉ាណែតបញ្ជាក់ថា ក្នុងន័យនេះបើគេកំណត់អ្វីមួយថា ខុសហើយគេនឹងទៅរកព័ត៌មានផ្សេងៗ ដើម្បីបង្ហាញឲ្យឃើញថា ពិតជាខុសមែន ហើយព័ត៌មានខុសពីអ្វីដែលគេចង់បង្គ្រប់ គឺគេទាត់ចោលព័ត៌មាននោះ។ ជារួមអ្នកវិភាគបែបស៊ីអារម្មណ៍ គឺយកអារម្មណ៍ខ្លួនឯង ដើម្បីបញ្ចេញលទ្ធផល ហើយយកការស្រាវជ្រាវ ដើម្បីមកបង្រ្គប់កិច្ចតែប៉ុណ្ណោះ។

ទោះបីជាយ៉ាងណា ឯកឧត្តម ហ៊ុន ម៉ាណែតបញ្ជាក់ថា ការអត្ថាធិប្បាយទាំងនោះ គឺជាសិទ្ធិក្នុងការបញ្ចេញទស្សនៈរបស់ពួកគាត់ ទោះបីជាគាត់ធ្វើក្នុងក្របខ័ណ្ឌនៃយុទ្ធនាការអវិជ្ជមានប្រឆាំងរូបឯកឧត្តមក៏ដោយចុះ៕