សម្តេចតេជោ ហ៊ុន សែន នាំកូនប្រុស២រូបជួបជជែកដោយផ្ទាល់ជាមួយលោក ស៊ី ជីងពីង នៅរដ្ឋធានីប៉េកាំង

សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅព្រឹកថ្ងៃទី១០ ខែកុម្ភៈ ឆ្នាំ២០២៣នេះ បានអញ្ជើញចូលជួបសម្តែងការគួរសម និងពិភាក្សាការងារជាមួយលោក ស៊ី ជីងពីង ប្រធានាធិបតីចិន នៅរដ្ឋធានីប៉េកាំង។ អ្វីដែលជាការកត់សម្គាល់ គឺសម្តេចតេជោបាននាំកូនប្រុស២រូបទៅជួបជាមួយលោក ស៊ី ជីងពីងដែរ គឺឯកឧត្តម ហ៊ុន ម៉ាណែត បេក្ខជននាយករដ្ឋមន្រ្តីបន្តវេនរបស់គណបក្សប្រជាជនកម្ពុជា និងឯកឧត្តម ហ៊ុន ម៉ានី អ្នកតំណាងរាស្រ្តវ័យក្មេង និងជាប្រធានសហភាពសហព័ន្ធយុវជនកម្ពុជា។

សម្រាប់ឯកឧត្តម ហ៊ុន ម៉ាណែត នេះ គឺជាលើកទី២ហើយដែលសម្តេចតេជោ នាយករដ្ឋមន្រ្តី បាននាំទៅជួប និងពិភាក្សាការងារជាមួយលោកប្រធានាធិបតីចិន ស៊ី ជីងពីង នៅក្នុងប្រទេសចិន។ កន្លងមក ពោល គឺក្នុងអំឡុងខែកុម្ភៈ ដើមឆ្នាំ២០២០ សម្តេចតេជោ ហ៊ុន សែន ធ្លាប់បាននាំឯកឧត្តម ហ៊ុន ម៉ាណែត ជួបលោក ស៊ី ជីងពីង ម្តងរួចមកហើយនៅក្នុងទីក្រុងប៉េកាំង។ កាលពីពេលនោះ និងនៅពេលនេះ គឺមិនខុសគ្នាទេ លោក ស៊ី ជីងពីង បានសម្តែងទឹកមុខរីករាយ និងទទួលយ៉ាងរាក់ទាក់នូវវត្តមានរបស់សម្តេចតេជោ ហ៊ុន​ សែន និងឯកឧត្តម ហ៊ុន ម៉ាណែត ហើយបានពិភាក្សាការងារពោរពេញដោយភាពស្និតស្នាល និងមិត្តភាព។

ចំណែក ចំពោះឯកឧត្តម ហ៊ុន ម៉ានី វិញ នេះ គឺទំនងជាលើកទីមួយហើយដែលសម្តេចតេជោ ហ៊ុន សែន នាំឲ្យជួប និងពិភាក្សាការងារដោយផ្ទាល់ជាមួយលោក ស៊ី ជីងពីង នៅក្នុងប្រទេសចិន។  យ៉ាងណាក៏ដោយ ឯកឧត្តម ហ៊ុន ម៉ានី ក៏ដូចជា ឯកឧត្តម ហ៊ុន ម៉ាណែតដែរ គឺត្រូវបានមេដឹកនាំកំពូលរបស់មហាយក្សចិនចាប់អង្រួនដៃរាក់ទាក់យ៉ាងស្និតស្នាល និងប្រកដោយភាពកក់ក្តៅ។

សម្តេចតេជោ ហ៊ុន សែន រួមទាំងឯកឧត្តម ហ៊ុន ម៉ាណែត និងឯកឧត្តម ហ៊ុន ម៉ានី ព្រមទាំងមន្រ្តីជាន់ខ្ពស់រាជរដ្ឋាភិបាលកម្ពុជាជាច្រើនរូបទៀត កំពុងបំពេញទស្សនកិច្ចផ្លូវរដ្ឋនៅក្នុងប្រទេសចិន។ គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា បានចាកចេញពីកម្ពុជាទៅកាន់ប្រទេសចិនកាលពីថ្ងៃទី៩ ខែកុម្ភៈ និងវិលត្រឡប់មកដល់ប្រទេសកម្ពុជាវិញនៅថ្ងៃទី១១ ខែកុម្ភៈ​ឆ្នាំ២០២៣៕