Breaking News! គ.ជ.ប សម្រេចបដិសេធការសុំចុះបញ្ជីឈរឈ្មោះបោះឆ្នោតគណបក្សភ្លើងទៀន

នៅថ្ងៃទី១៥ ខែឧសភានេះ គណៈកម្មាធិការជាតិរៀបចំការបោះឆ្នោត បានសម្រេចបដិសេធលើពាក្យសុំចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន ក្រោយគណបក្សមួយនេះមិនបានបំពេញតាមលក្ខខណ្ឌ និងនីតិវិធី។ នេះបើតាមសេចក្តីប្រកាសបដិសេធរបស់គ.ជ.ប នៅរសៀលថ្ងៃចន្ទនេះ។

បើតាមសេចក្ដីប្រកាស គឺ គ.ជ.ប បានសម្រេចបដិសេធទាំងស្រុងចំពោះការចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន ក្រោយមិនបំពេញគ្រប់លក្ខខណ្ឌនៃច្បាប់បោះឆ្នោត ដោយមូលហេតុ គណបក្សនេះមិនបានភ្ជាប់មកជាមួយនូវប្រកាស្ដីពី ការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាពីនីត្យានុកូលកម្ម។  

បន្ទាប់ពីទទួលបានពាក្យសុំចុះបញ្ជីរបស់គណបក្សភ្លើងទៀន គណៈកម្មាធិការជាតិរៀបចំការបោះឆ្នោត បានពិនិត្យរកឃើញថា ​គណ​បក្ស​មួយ​នេះ មានការខ្វះខាតឯកសារ ពោល គឺខ្វះសេចក្តី​ចម្លង​លិខិត​បញ្ជាក់​ការ​ចុះ​បញ្ជី​គណបក្ស​នយោបាយ​នៅ​ក្រសួង​មហាផ្ទៃ​ ដែលមាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី ខេត្ត​ ក្រុង​ ស្រុក ខណ្ឌ ខណៈគណបក្សនេះ បានប្រើប្រាស់តែលិខិតថតចម្លង ប៉ុន្តែ មិនមានការបញ្ជាក់នីត្យានុកូលកម្មឡើយ។

ជាមួយគ្នានេះ គ.ជ.ប ក៏បានបដិសេធការឈរឈ្មោះរបស់លោក រ៉ុង ឈុន ជាបេក្ខជន​តំណាងរាស្ត្រ​របស់គណបក្សភ្លើងទៀន លេខរៀងទី១​ មណ្ឌលខេត្តកណ្ដាល ដោយហេតុថា លោក រ៉ុង ឈុន កំពុងជាប់ទោសទណ្ឌ ដែលមិនទាន់បានស្ដារនីតិសម្បទា​គ្រប់គ្រាន់ឡើងវិញនៅឡើយ។ ក្រោយមានបញ្ហាលើលក្ខខណ្ឌមួយចំនួននេះ គណបក្សភ្លើងទៀន ក៏បានសម្រេច​ដាក់​ឯកសារ​ពាក់ព័ន្ធ​បន្ថែមទៅកាន់ គ.ជ.ប ហើយបានសម្រេចដកឈ្មោះលោក រ៉ុង ឈុន​ ពីបញ្ជីបេក្ខជនឈរឈ្មោះការបោះឆ្នោតនៅមណ្ឌលខេត្តកណ្ដាល។

មុនការប្រកាសបដិសេធរបស់គ.ជ.ប នៅថ្ងៃនេះ គណបក្សភ្លើងទៀន ក៏ប្រកាស​ប្រមូល​ផ្តុំ​ថ្នាក់​ដឹកនាំ សមាជិក សមាជិក សកម្មជន និង​អ្នក​គាំទ្រ​របស់ខ្លួននៅ​ទូទាំង​ប្រទេស ធ្វើការតវ៉ាផងដែរ ​ក្នុង​ករណី​គណបក្ស​ភ្លើង​ទៀន​ត្រូវ​បាន​គ.ជ.ប បដិសេធ​មិន​ចុះ​បញ្ជី​គណបក្ស​សម្រាប់​ការ​បោះ​ឆ្នោត​ជ្រើស​តាំង​តំណាងរាស្រ្ត​អាណត្តិ​ទី៧ ឆ្នាំ​២០២៣។ ចំពោះការប្រកាសនេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានព្រមានចាត់វិធានការច្បាប់ចំពោះថ្នាក់ដឹកនាំគណបក្សភ្លើងទៀន ប្រសិនបើហ៊ានបង្កឲ្យមានផលប៉ះពាល់ដល់សណ្តាប់ធ្នាប់សាធារណៈ។

តាមរយៈសារសំឡេងបង្ហោះតាមបណ្តាញតេឡេក្រាម សម្តេចតេជោ បានអំពាវនាវដល់អ្នកគាំទ្រគណបក្សភ្លើងទៀន កុំចូលរួមសកម្មភាពណាមួយជាមួយមេដឹកនាំបក្សភ្លើងទៀនឲ្យសោះ និងបញ្ជាដល់អាជ្ញាធរមានសមត្ថកិច្ចទាំងអស់ត្រៀមកម្លាំង ដើម្បីអនុវត្តវិធានច្បាប់ ដោយមិនអនុញ្ញាតឲ្យក្រុមប្រឆាំង បង្កឲ្យខូចសណ្តាប់ធ្នាប់សាធារណៈ ខណៈដែលកម្ពុជា កំពុងធ្វើជាម្ចាស់ផ្ទះកីឡា​ស៊ីហ្គេមនោះឡើយ។

សម្តេច ក៏បានបញ្ជាឲ្យកម្លាំងមានសមត្ថកិច្ចគ្រប់លំដាប់ថ្នាក់ ជាពិសេសកម្លាំងប្រដាប់អាវុធ ត្រូវត្រៀមខ្លួនចាប់យកក្បាល​ម៉ាស៊ីនទាំងអស់ ទាំងថ្នាក់ជាតិ និងថ្នាក់ក្រោមជាតិរបស់គណបក្សភ្លើងទៀន ដែលហ៊ានចេញមុខប្រឆាំងធ្វើឱ្យ​ខូច​សណ្តាប់ធ្នាប់សាធារណៈ ដោយមិនអត់ឱនឱ្យទង្វើដែលគ្មានទំនួលខុសត្រូវរបស់មេដឹកនាំគណបក្សភ្លើងទៀនឡើយ៕