តើបក្សណាខ្លះត្រូវបាន គ.ជ.ប ទទួលស្គាល់សម្រាប់ឈរឈ្មោះបោះឆ្នោតនាពេលខាងមុខ?  

គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចទទួលស្គាល់ផ្លូវការលើការចុះបញ្ជីគណបក្សចំនួន១៨ សម្រាប់ឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។ នេះបើផ្អែកតាមលទ្ធផលបណ្តោះអាសន្ន គិតត្រឹមថ្ងៃទី១៩ ខែឧសភា ឆ្នាំ២០២៣។

សេចក្ដីប្រកាសរបស់ គ.ជ.ប បានឲ្យដឹងថា ក្នុងដំណើរការពិនិត្យពាក្យសុំចុះបញ្ជីរបស់គណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានគណបក្សចំនួន៥ ត្រូវបាន គ.ជ.ប ចេញលិខិតជូនដំណឹងឲ្យបំពេញបន្ថែមចំណុចខ្វះ ខាត ដែលក្នុងនោះគណបក្សចំនួន៣ បានបំពេញត្រឹមត្រូវជូន គ.ជ.ប វិញ។ ដោយឡែក គណបក្សចំនួន២ទៀត មិនបានបំពេញត្រឹមត្រូវតាមលក្ខខណ្ឌ និងច្បាប់កំណត់ឡើយ ពោលគឺបក្សទាំងពីរនេះ មិនបានភ្ជាប់មកជាមួយនូវប្រកាសស្ដីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម។

បើតាម គ.ជ.ប ក្នុងដំណាក់កាលចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ មានគណបក្សចំនួន២០ បានដាក់ពាក្យសុំចុះបញ្ជីនៅ គ.ជ.ប។ ប៉ុន្តែ ជាលទ្ធផល គណបក្សចំនួន១៨ ត្រូវបាន គ.ជ.ប សម្រេចទទួលស្គាល់ជាផ្លូវការ ខណៈគណបក្សចំនួន២ គឺគណបក្សភ្លើងទៀន និងគណបក្សមហាសាមគ្គីជាតិខ្មែរ ត្រូវ គ.ជ.ប បដិសេធមិនចុះបញ្ជី។

គណបក្សទាំង១៨ ដែល គ.ជ.ប ទទួលស្គាល់សម្រាប់ការបោះឆ្នោត នៅពេលខាងមុខ រួមមាន៖ គណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ គណបក្សធម្មាធិបតេយ្យ គណបក្សកម្លាំងប្រជាធិបតេយ្យ គណបក្សសញ្ជាតិកម្ពុជា គណបក្សខ្មែរតែមួយ គណបក្សខ្មែរអភិរក្ស គណបក្សហ្វ៊ុនស៊ិនប៉ិច គណបក្សសំបុកឃ្មុំសង្គមប្រជាធិបតេយ្យ គណបក្សបំណងពលរដ្ឋ គណបក្សឯកភាពជាតិខ្មែរ គណបក្សស្ត្រីដើម្បីស្រ្តី គណបក្សខ្មែរឈប់ក្រ គណបក្សខ្មែរអភិវឌ្ឍន៍សេដ្ឋកិច្ច គណបក្សជនជាតិដើមប្រជាធិបតេយ្យកម្ពុជា គណបក្សប្រជាធិបតេយ្យមូលដ្ឋាន និងគណបក្សកសិករ។

គួរជម្រាបថា ការដាក់ និងការទទួលពាក្យសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ បានប្រព្រឹត្តទៅកាលពីថ្ងៃទី២៤ ខែមេសា ដល់ថ្ងៃទី៨ ខែឧសភា ឆ្នាំ២០២៣។ គ.ជ.ប បានពិនិត្យពាក្យសុំចុះបញ្ជីរបស់គណបក្សទាំងអស់យ៉ាងហ្មត់ចត់ និងធ្វើការសម្រេចដោយផ្អែកតាមច្បាប់ បទបញ្ជា និងនីតិវិធីសម្រាប់ការបោះឆ្នោត ដើម្បីឲ្យការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ មានតម្លាភាព ត្រឹមត្រូវ យុត្តិធម៌ ស្របតាមគោលការណ៍ប្រជាធិបតេយ្យ សេរីពហុបក្ស៕

ដោយ៖ ធឿន វ៉ាន់សុង