ការបោះឆ្នោតខាងមុខ បក្សធម្មាធិបតេយ្យដាក់ចេញគោលនយោបាយអាទិភាព៨

គណបក្សធម្មាធិបតេយ្យរបស់លោកស្រី ពោធិតី សាវត្ថី ដាក់ចេញគោលនយោបាយអាទិភាពចំនួន៨ សម្រាប់ការប្រកួតប្រជែងក្នុងការបោះឆ្នោតជ្រើសតាំងតំណាងរាស្រ្ត អាណត្តិទី៧ ដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣។

គោលនយោបាយគណបក្សធម្មាធិបតេយ្យ គឺប្រកាន់យកគោលការណ៍មាតាធិបតេយ្យ និងភាពយុត្តិធម៌ចំពោះប្រជាជនកម្ពុជាគ្រប់ស្រទាប់វណ្ណៈ ដែលក្នុងនោះ គោលនយោបាយអាទិភាពចម្បងរបស់គណបក្សនេះ គឺផ្ដោតលើការដោះស្រាយជម្លោះដីធ្លី បំបាត់អំពើពុករលួយ កំណែទម្រង់ប្រព័ន្ធតុលាការ និងដោះស្រាយបញ្ហាសង្គមផ្សេងៗ ប្រកបដោយតម្លាភាព ត្រឹមត្រូវ និងយុត្តិធម៌។

គណបក្សធម្មាធិបតេយ្យ ក៏នឹងផ្ដោតជាសំខាន់ទៅលើការងារកែទម្រង់ប្រព័ន្ធកសិកម្ម ការរៀបចំប្រព័ន្ធធារាសាស្ត្រ ដើម្បីផ្ដល់លទ្ធភាពដល់ប្រជាកសិករអាចប្រើប្រាស់ទឹកបានគ្រប់គ្រាន់ក្នុងវិស័យកសិកម្ម និងកាត់បន្ថយទឹកជំនន់។ នៅក្នុងនោះ គណបក្សនេះ ក៏សន្យាខិតខំស្វែងរកទីផ្សារសម្រាប់កសិផល និងផលិតផលផ្សេងៗ ដើម្បីលើកកម្ពស់ជីវភាពឲ្យល្អប្រសើររបស់ប្រជាកសិករ និងកម្មករ។

ទន្ទឹមនេះ គោលនយោបាយគណបក្សធម្មាធិបតេយ្យ ក៏នឹងកែទម្រង់ប្រព័ន្ធសុខាភិបាល ប្រកបដោយប្រសិទ្ធិភាពខ្ពស់ និងមានភាពល្អប្រសើរថែមទៀត ដើម្បីលើកកម្ពស់សុខភាពសាធារណៈរបស់ប្រជាជនកម្ពុជា ខណៈការកែទម្រង់លើប្រព័ន្ធអប់រំ គឺគណបក្សនេះ នឹងផ្តល់ប្រាក់កម្ចីឥតការប្រាក់សម្រាប់និស្សិតបន្តការសិក្សា ព្រមទាំងដាក់បន្ថែមម៉ោងសិក្សាលើមុខវិជ្ជាសាសនា និងគុណធម៌ ដែលបង្រៀនដោយព្រះសង្ឃ។

បន្ថែមពីលើនេះ គណបក្សធម្មាធិបតេយ្យ ដែលមានលោកស្រី ពោធិតី សាវត្ថី ជាអ្នកដឹកនាំ ក៏បានដាក់បញ្ចូលគោលនយោបាយសញ្ជាតិខ្មែរតែមួយសម្រាប់អ្នកនយោបាយកម្ពុជាផងដែរ៕

ដោយ៖ ធឿន វ៉ាន់សុង