គណបក្ស ៨ ដាក់បេក្ខជនប្រកួតប្រជែងទាំង ២៥ មណ្ឌលរាជធានី-ខេត្ត

ក្នុងចំណោមគណបក្ស១៨ ដែលបានចុះបញ្ជីគណបក្សឈរឈ្មោះ និងបញ្ជីបេក្ខជនឈរឈ្មោះសម្រាប់ការបោះឆ្នោតជាតិ អាណត្តិទី៧ ឆ្នាំ២០២៣ គឺមានតែគណបក្សចំនួន៨ប៉ុណ្ណោះ បានដាក់បេក្ខជនប្រកួតប្រជែងនៅ២៥លើ២៥ មណ្ឌលរាជធានី-ខេត្ត ទូទាំងប្រទេស។

បើតាមគណៈកម្មាធិការជាតិរៀបចំការបោះឆ្នោត (គ.ជ.ប) គណបក្សចំនួន៨ ដែលបានដាក់បញ្ជីបេក្ខជនឈរឈ្មោះទាំង២៥មណ្ឌល រួមមាន៖ គណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ គណបក្សធម្មាធិបតេយ្យ គណបក្សសញ្ជាតិកម្ពុជា គណបក្សខ្មែរតែមួយ គណបក្សហ្វ៊ុនស៊ិនប៉ិច និងគណបក្សខ្មែរឈប់ក្រ។

រីឯគណបក្សជនជាតិដើមប្រជាធិបតេយ្យកម្ពុជា បានដាក់បញ្ជីបេក្ខជនឈរឈ្មោះប្រកួតប្រជែងសម្រាប់ការបោះឆ្នោតជ្រើសតាំងតំណាងរាស្ត្រ ឆ្នាំ២០២៣នេះ នៅ២២មណ្ឌល គណបក្សស្ត្រីដើម្បីស្ត្រី ដាក់បេក្ខជនឈរឈ្មោះ១៨មណ្ឌល ខណៈគណបក្សកម្លាំងប្រជាធិបតេយ្យ និងគណបក្សប្រជាធិបតេយ្យមូលដ្ឋាន ដាក់បេក្ខជនឈរឈ្មោះ១២មណ្ឌល។

សម្រាប់គណបក្សបំណងពលរដ្ឋ ដាក់បេក្ខជនឈរឈ្មោះបោះឆ្នោតនៅ៩មណ្ឌល គណបក្សកសិករ ដាក់បេក្ខជនឈរឈ្មោះបោះឆ្នោតនៅ៨មណ្ឌល ហើយគណបក្សចំនួន៣ផ្សេងទៀត គឺគណបក្សឯកជាតិខ្មែរ គណបក្សខ្មែរអភិវឌ្ឍន៍សេដ្ឋកិច្ច និងគណបក្សខ្មែរអភិរក្ស បានដាក់បេក្ខជនឈរឈ្មោះបោះឆ្នោតនៅ៧មណ្ឌល។ ដោយឡែក គណបក្សដែលបានចុះបញ្ជីបេក្ខជនឈរឈ្មោះតិចជាងគេ គឺគណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ ដែលមានត្រឹមតែ៦មណ្ឌលឈរឈ្មោះបោះឆ្នោតប៉ុណ្ណោះ៕

ដោយ៖ ធឿន វ៉ាន់សុង