មន្ត្រីជាន់ខ្ពស់ គ.ជ.ប ៖ ក្បួនឃោសនារបស់គណបក្សប្រជាជនកម្ពុជា មានទំហំធំ និងមានអ្នកចូលរួមច្រើនជាងគេ

មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) កត់សម្គាល់ឃើញថា ក្បួនឃោសនាបោះឆ្នោតជ្រើសតាំង តំណាងរាស្រ្ដ នីតិកាលទី ៧ ក្នុងរយៈពេល ១០ថ្ងៃកន្លងមកនេះ គឺក្បួនឃោសនារបស់គណបក្សប្រជាជនកម្ពុជា មានទំហំធំ និងមានអ្នកចូលរួមច្រើនជាងគេ។ ការបញ្ជាក់នេះ បានធ្វើឡើងក្នុងកិច្ចប្រជុំជាមួយភាគីពាក់ព័ន្ធ ស្ដីពី សភាពការណ៍ទូទៅនៃការឃោសនាបោះឆ្នោត នាព្រឹកថ្ងៃទី ១១ ខែកក្កដា ឆ្នាំ ២០២៣នេះ។

លោក ហ៊ែល សារ៉ាត់ សមាជិក គ.ជ.ប បានឲ្យដឹងថា ក្នុងរយៈពេល ១០ថ្ងៃ នៃការឃោសនាបោះឆ្នោតជ្រើសតាំង តំណាងរាស្រ្ដ នីតិកាលទី ៧ កន្លងមកនេះ គឺគណបក្សនយោបាយនីមួយៗ បានធ្វើសកម្ម​ភាពឃោសនាបោះឆ្នោត តាមមធ្យោបាយផ្សេងៗ និងតាមលទ្ធភាពរៀងៗខ្លួន។

លោកបន្តថា គណបក្សនយោបាយ ដែលចូលរួមការបោះឆ្នោត បានធ្វើសកម្មភាពឃោសនាក្នុងរយៈពេល ១០ថ្ងៃកន្លងមកនេះ ដូចជា៖ ការជួបប្រជុំជាមួយអ្នកគាំទ្រ និងសកម្មជននៅទីសាធារណៈ និងតាមទីស្នាក់ការគណបក្សនយោបាយ ការចុះសួរសុខទុក្ខប្រជាពលរដ្ឋតាមខ្នងផ្ទះ ការប្រគំតន្ត្រី ការបញ្ចាំងស្លាយវីដេអូតាមទីសាធារណៈ ការចែកខិត្តបណ្ណតាមខ្នងផ្ទះ និងតាមផ្សារ ការចាក់មេក្រូផ្សព្វផ្សាយ នៅតាមទីស្នាក់ការគណបក្សនយោបាយ និងចាក់ចល័តតាមភូមិជាដើម។

ក្រៅពីនេះ ក្នុងចំណោមគណបក្សនយោបាយឈរឈ្មោះបោះឆ្នោតទាំង ១៨ មានគណបក្សចំនួន ១៥ បានធ្វើសកម្មភាពហែក្បួនឃោសនាបោះឆ្នោត នៅតាមមណ្ឌលបោះឆ្នោតនានា ដែលខ្លួនមានបញ្ជីបេក្ខជនឈរឈ្មោះ។ ក្នុងនោះ គ.ជ.ប បានកត់សម្គាល់ឃើញថា ក្បួនឃោសនារបស់គណបក្សប្រជាជនកម្ពុជា មានទំហំធំ និងមានអ្នកចូលរួមច្រើនជាងគេ។ បន្ថែមពីលើនេះ គណបក្សនយោបាយនានា ក៏បានផ្សព្វផ្សាយនូវសកម្មភាពឃោសនាបោះឆ្នោត និងសារនយោបាយរបស់ខ្លួន នៅតាមបណ្ដាញសង្គមហ្វេសប៊ុក និងបណ្ដាញសង្គមផ្សេងៗទៀត។

បើតាមលោក ហ៊ែល សារ៉ាត់ ក្នុងរយៈពេល ១០ថ្ងៃកន្លងមកនេះ ការឃោសនាបោះឆ្នោតរបស់គណបក្សន​យោ​​បាយ នៅតាមបណ្ដារាជធានី-ខេត្ត បានប្រព្រឹត្តទៅដោយរលូន មានការយោគយល់អធ្យា​ស្រ័យគ្នាខ្ពស់ មានកិច្ចសហការពីបណ្ដាភាគីពាក់ព័ន្ធនានាបានល្អប្រសើរ ដែលរក្សាបាននូវសន្តិសុខ សុវត្ថិភាព និងសណ្ដាប់ធ្នាប់របៀបរៀបរយ ក្នុងមណ្ឌលបោះឆ្នោតនីមួយៗ។

សូមជម្រាបដែរថា យុទ្ធនាការឃោសនាបោះឆ្នោតរយៈពេល ១០ថ្ងៃកន្លងមកនេះ គ.ជ.ប ទទួលបានពាក្យបណ្ដឹងចំនួន ២ប៉ុណ្ណោះ ដែលកើតឡើងនៅគណៈកម្មការរៀបចំការបោះឆ្នោតឃុំទួលពង្រ នៃខេត្តបន្ទាយមានជ័យ និងកើតឡើងនៅគណៈកម្មការរៀបចំការបោះឆ្នោតសង្កាត់ភ្នំពេញថ្មី នៃរាជធានីភ្នំពេញ៕