លោក សាម អ៊ីន៖ នយោបាយជ្រុលនិយម បានបណ្តុះកំហឹងស្អប់ខ្ពើមរវាងខ្មែរ និងខ្មែរ

«នយោបាយជ្រុលនិយមបង្កគ្រោះដល់នយោបាយកម្ពុជា បណ្ដាលឱ្យអស្ថិរភាព សកម្មជនត្រូវជាប់គុក ឬរត់ចោលស្រុក និងបានបណ្ដុះកំហឹងស្អប់ខ្ពើមរវាងខ្មែរ និងខ្មែរ»។ នេះ គឺជាការអះអាងរបស់លោក សាម អ៊ីន អតីតប្រធានគណៈកម្មការនាយកគណបក្សប្រជាធិបតេយ្យមូលដ្ឋាននៅលើគណនីហ្វេសប៊ុករបស់លោកនៅល្ងាចថ្ងៃទី១១ ខែកក្កដានេះ។

ការអះអាងរបស់លោក សាម អ៊ីននេះ គឺស្របពេលដែលក្រុមអតីតគណបក្សប្រឆាំង ជាពិសេស ពីខាងក្រៅប្រទេស បាន និងកំពុងសាបព្រោះ និងអនុវត្តនូវនយោបាយជ្រុលនិយម។ ជាលទ្ធផល អ្នកដែលរងគ្រោះ គឺសកម្មជន និងអ្នកគាំទ្រដែលជឿទាំងមិនបានគិតពិចារណាបានច្បាស់លាស់។ សម្រាប់លោកបណ្ឌិត សាម អ៊ីន នយោបាយជ្រុលនិយម គឺបង្កគ្រោះភ័យណាស់ដល់កម្ពុជា បណ្ដាលឱ្យអស្ថិរភាពនយោបាយ សកម្មជនប្រឆាំងជ្រុលនិយម ត្រូវជាប់គុក ឬរត់ចោលស្រុក គេចខ្លួននៅក្រៅប្រទេស។ មិនតែប៉ុណ្ណោះ វាថែមទាំងបានបណ្ដុះនូវកំហឹងឱ្យខ្មែរស្អប់ខ្មែរគ្នាឯងថែមទៀតផង។ លោកសង្កត់ធ្ងន់ថា នយោ​បាយជ្រុលនិយម គឺបង្កការរាំងស្ទះដល់ការកសាងលទ្ធិប្រជាធិបតេយ្យបែបជឿនលឿន ចាស់ទុំ និងរស់រវើកនៅកម្ពុជា។

ដោយផ្អែកលើប្រវត្តិសាស្រ្តដែលលោកបានសិក្សាកន្លងមក លោកបណ្ឌិត សាម អ៊ីន បានឃើញថា អ្នកនយោបាយខ្មែរ បានប្រព្រឹត្តកំហុសហើយទម្លាក់កំហុសនោះដាក់ឱ្យគ្នា មិនយល់ពីភូមិសាស្ត្រនយោបាយ មិនយល់ពីនយោបាយរបស់ប្រទេសមហាអំណាច មិនស្គាល់ពីទឹកចិត្តខ្មែរគ្នាឯង ទើបកម្ពុជារងគ្រោះដោយសារសង្គ្រាម កាប់សម្លាប់ខ្មែរគ្នាឯងយ៉ាងឃោរឃៅ។ ដូច្នេះហើយ លោកមានបំណង់ចង់ចូលរួមលុបបំបាត់បញ្ហានេះ។

ដំណើរទៅចូលរួមលុបបំបាត់បញ្ហានេះ គឺដំបូង លោកបណ្ឌិត សាម អ៊ីន បានចូលរួមជាមួយគណបក្សនយោ​បាយ​កណ្តាលនិយម គឺគណបក្សប្រជាធិបតេយ្យមូលដ្ឋាន។ ប៉ុន្តែ ក្រោយចូលរួមរយៈពេល៨ឆ្នាំកន្លងទៅ លោកគិតថាមិនអាចទៅរួច ទើបលោកសម្រេចចាកចេញ ហើយមករួមរស់ជាមួយគណបក្សប្រជាជនកម្ពុជាវិញ។ នេះ ដោយសារតែលោកបណ្ឌិត សាម អ៊ីន យល់យ៉ាងច្បាស់ថា គណបក្សប្រជាជនកម្ពុជា គឺមានសមត្ថភាពខ្ពស់ក្នុងការបង្ក្រាបនយោបាយជ្រុលនិយមនេះ និងថែរក្សាសន្តិភាពជូនប្រជាជាតិកម្ពុជា។

សូមជម្រាបថា លោកបណ្ឌិត សាម អ៊ីន អតីតប្រធានគណៈកម្មការនាយកគណបក្សប្រជាធិបតេយ្យមូលដ្ឋាន បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា កាលពីថ្ងៃទី ២ ខែមេសា ឆ្នាំ២០២៣។ ក្រោយស្នើសុំចូលរួមជីវភាពនយោបាយជាមួយគណបក្សកាន់អំណាច លោកបណ្ឌិត សាម អ៊ីន ត្រូវបានព្រះមហាក្សត្រតែងតាំង ជាអនុរដ្ឋលេខាធិការក្រសួងបរិស្ថាន ស្របតាមចំណេះជំនាញដែលលោកសិក្សានាពេលកន្លងមក៕

ដោយ៖ ង៉ិល ណារ៉ាត់