ព័ត៌មានជាតិ

ប្រធានគណបក្សខ្មែរឈប់ក្រ គ្មានឈ្មោះឈរជាបេក្ខជនបោះឆ្នោតជ្រើសតាំងតំណាងរាស្រ្ត

បានផុស

២ years មុន

នៅ

ថ្ងៃអង្គារ ១៨ កក្កដា ២០២៣

ដោយ

ប្រធានគណបក្សខ្មែរឈប់ក្រ លោក ក្រវ៉ាញ ដារ៉ន មិនមានឈ្មោះឈរជាបេក្ខជនសម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី ៧ នៅថ្ងៃ ២៣ កក្ដដា ខាងមុខនេះទេ។

ថ្លែងប្រាប់ដល់សារព័ត៌មានកម្ពុជាថ្មីនៅព្រឹកនេះ លោក ក្រវ៉ាញ ដារ៉ន បានបញ្ជាក់ថា លោកទើបតែមកពីអាមេរិកនៅខែមិថុនានេះ ហើយទទួលបានព័ត៌មានថាលោកមិនមានឈ្មោះឈរជាបេក្ខជនបោះឆ្នោតជ្រើសតាំងតំណាងរាស្រ្តនីតិកាលទី ៧ នៅពេលខាងមុខនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអះអាងយ៉ាងដូច្នេះថា «ខ្ញុំសុំចុះឈ្មោះជាតំណាងរាស្រ្តគេអត់ឲ្យ។ ខ្ញុំទើបតែមកពីអាមេរិកនៅខែ ៦ នេះ អីចឹងអត់ដឹងធ្វើម៉េច»។

លោកក្រវ៉ាញ ដារ៉ន អះអាងថា បានចូលរួមបោះឆ្នោតកាលឆ្នាំ ២០១៨ នៅមណ្ឌលការិយាល័យក្នុងខណ្ឌឫស្សីកែវ។ ក្នុងនាមជាប្រធានគណបក្សនិងគ្មានឈ្មោះឈរជាតំណាងរាស្រ្ត លោកបានលើកអំណះអំណាងរបស់គណៈកម្មការរៀបចំការបោះឆ្នោតដែលថាបានខលជូនដំណឹង តែអត់មានអ្នកទទួលទូរសព្ទ។ តែលោកលើកជាចម្ងល់ បើខលមិនចូលម៉េចមិនមកទំនាក់ទំនងមកស្នាក់ការគណបក្ស។ ចឹងទេលោកក៏អត់យល់ពីនីតិវិធីធ្វើការរបស់គជបដែរ។

យ៉ាងណាមិញ ប្រធានគណបក្សខ្មែរឈប់ក្រដែលមានសញ្ជាតិអាមេរិកផងនោះបានបញ្ជាក់ថា ការបោះឆ្នោតខាងមុខនេះ បើគណបក្សខ្មែរឈប់ក្រឈ្នះឆ្នោត ក៏មានបេក្ខជនសម្រាប់ទទួលតំណែងជានាយករដ្ឋមន្រ្តី។ ជាមួយគ្នានេះលោកក៏អាចទទួលតួនាទីជារដ្ឋមន្ត្រីទី ១ ក្រោមការដឹកនាំដោយរដ្ឋាភិបាលថ្មីបើគណបក្សរបស់លោកឈ្នះឆ្នោត។

រដ្ឋសភាជាតិបានធ្វើវិសោធនកម្មច្បាប់បោះឆ្នោតជ្រើសតាំងតំណាងរាស្ត្រ ដោយមានការកែប្រែមាត្រាថ្មីចំនួន ៣ គឺមាត្រា២៣ ថ្មី មាត្រា ១៤២ ថ្មី និងមាត្រា ១៤៣ ថ្មី។ មាត្រា ២៣ ថ្មីគឺពលរដ្ឋខ្មែរដែលមានបំណងឈរឈ្មោះជាបេក្ខជនបោះឆ្នោតជ្រើសតាំងជាតំណាងរាស្ត្រ ត្រូវមានសញ្ជាតិជាខ្មែរពីកំណើត មានអាយុ ២៥ ឆ្នាំឡើងទៅ មានសិទ្ធិបោះឆ្នោតនិងមានឈ្មោះក្នុងបញ្ជីបោះឆ្នោត មានលំនៅឋានក្នុងប្រទេសកម្ពុជា មានការតែងតំាងពីគណបក្សនយោបាយ។

អ្វីដែលចាំបាច់ទៀតនោះ គឺត្រូវអនុវត្តសិទ្ធិបោះឆ្នោតដោយបានបោះឆ្នោតសកលចំនួន ២ លើកចុងក្រោយ។ រីឯមាត្រា ១៤២ ថ្មី ក៏ចែងអំពីការផាកពិន័យចំនួន ៥ លានរៀល ទៅ ២០ លានរៀល ចំពោះបុគ្គលដែលរារាំងពលរដ្ឋមិនឲ្យទៅបោះឆ្នោត ឬបំផ្លាញដល់ការបោះឆ្នោតទាំងមូល និងធ្វើឲ្យការបោះឆ្នោតទាំងមូលបាត់បង់ទំនុកចិត្ត នឹងត្រូវ គ.ជ.ប លុបឈ្មោះចេញពីបញ្ជីបោះឆ្នោត ឬដកសិទ្ធិមិនឲ្យពលរដ្ឋបោះឆ្នោតឲ្យយ៉ាងតិច ៥ ឆ្នាំ។

ចំណែកឯមាត្រា ១៤៣ ថ្មី វិញ គឺចែងអំពីការលុបបេក្ខភាពឈរឈ្មោះរបស់គណបក្សនយោបាយ និងត្រូវផាកពិន័យពី ១០ លានទៅ ៣០លានរៀល ចំពោះសកម្មភាពទាំងឡាយដែលរារាំងដល់ដំណើរការបោះឆ្នោត ដូចមានចែងក្នុងមាត្រា ១៤២ ថ្មី។ ម្យ៉ាងវិញទៀត គណបក្សនយោបាយដែលប្រព្រឹត្តសកម្មភាពបែបនោះក៏នឹងត្រូវដកសិទ្ធិចេញពីការបោះឆ្នោតជ្រើសតាំងតំណាងរាស្ត្រចំនួន ៥ ឆ្នាំយ៉ាងតិចដូចគ្នា៕