នយោបាយ

បណ្ឌិត គិន ភា៖ ការផ្ទេរអំណាចក្រោយការបោះឆ្នោត នឹងក្លាយជារឿងមិនធ្លាប់មានក្នុងប្រវត្តិសាស្ត្រកម្ពុជាជាង ៥០០ឆ្នាំ

បានផុស

២ years មុន

នៅ

ថ្ងៃអង្គារ ២៥ កក្កដា ២០២៣

ដោយ

លោកបណ្ឌិត គិន ភា អ្នកវិភាគនយោបាយមួយរូបនៅកម្ពុជា បានលើកឡើងថា ប្រសិនបើមានការផ្ទេរអំណាចភ្លាមៗក្រោយការបោះឆ្នោត នោះនឹងក្លាយជារឿងដែលមិនធ្លាប់មានក្នុងប្រវត្តិសាស្ត្រកម្ពុជាជាង ៥០០ឆ្នាំ។

ការលើកឡើង បន្ទាប់ពីការបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃទី ២៣ ខែកក្កដា ឆ្នាំ២០២៣ បានប្រព្រឹត្តិទៅដោយរលូនល្អ ដែលមានប្រជាពលរដ្ឋខ្មែរអញ្ជើញទៅបោះឆ្នោតរហូតដល់ជាង ៨៤ភាគរយ ដែលជាភាគរយដ៏ខ្ពស់មួយ។

លោកបណ្ឌិត គិន ភា បានសរសេរនៅលើគណនីហ្វេសប៊ុក កាលពីថ្ងៃទី ២៤ ខែកក្កដាថា ការបោះឆ្នោតនាថ្ងៃទី ២៣ ខែកក្កដា ឆ្នាំ ២០២៣ ជាការប្រកួតប្រជែងរវាងគណបក្សទាំង ១៨ផង និងជាការប្រកួតប្រជែងរវាងចរន្តគាំទ្រការបោះឆ្នោត និងថែរក្សាសន្លឹកឆ្នោត និងចរន្តពហិការកាបោះឆ្នោត និងបំផ្លាញសន្លឹកឆ្នោតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត គិន ភា បានសរសេរបន្តថា ការបោះឆ្នោតនេះ គឺជាការវាស់អ្នកបោះឆ្នោតខ្មែរចំពោះផែនការបន្តវេន របស់គណបក្សប្រជាជនកម្ពុជា ផងដែរ។ ផែនការបន្តវេននេះ មិនមែនជារឿងអាថ៌កំបាំងទេ ដ្បិតគណបក្សប្រជាជនកម្ពុជា បានធ្វើរឿងនេះដោយបើកចំហតាំងពីចុងឆ្នាំ ២០២១មកម្ល៉េះ ទៅតាមបែបបទ និងនីតិវិធីផ្ទៃក្នុងរបស់គណបក្សកាន់អំណាចដ៏ធំមួយនេះ។

លោកថា «ក្នុងបទសម្ភាសន៍មួយជាមួយទូរទស្សន៍ហុងកុងប៉ុន្មានថ្ងៃមុនការបោះឆ្នោត សម្ដេចតេជោ ហ៊ុន សែន បានលើកឡើងពីលទ្ធភាពនៃការផ្ទេរអំណាច បួន-ប្រាំសប្ដាហ៍ ក្រោយការបោះឆ្នោតតែម្តង។ ហើយ ជាងមួយសប្ដាហ៍មុនការបោះឆ្នោត ក៏មានការបែកធ្លាយនូវសេចក្ដីព្រាងសមាសភាពរដ្ឋាភិបាលអាណត្តិថ្មី ក្រោមការដឹកនាំរបស់ឯកឧត្ដមបណ្ឌិត ហ៊ុន ម៉ាណែត បុត្រាច្បងរបស់សម្ដេចតេជោ ហ៊ុន សែន អមដោយឧបនាយករដ្ឋមន្ត្រី និងរដ្ឋមន្ត្រី ដែលភាគច្រើនលើសលប់ ជាយុវជន និងជាកូនចៅរបស់វរជនកំពូលៗក្នុងរាជរដ្ឋាភិបាល និងគណបក្ស»។

លោកបណ្ឌិត គិន ភា ក៏បានបន្តដែរថា ការបែកធ្លាយសមាសភាពរដ្ឋាភិបាលអាណត្តិថ្មីនេះ អាចជាការសាកល្បងសមរភូមិសតិអារម្មណ៍មហាជនមួយដ៏សំខាន់ផងដែរ ហើយវាអាចត្រូវបានវិនិច្ឆ័យតាមរយៈសន្លឹកឆ្នោតរបស់ពលរដ្ឋ។ ម្យ៉ាងវិញទៀត ការផ្ទេរអំណាចជារឿងមុន និងក្រោយត្រូវធ្វើឡើងដោយជៀសមិនរួច។ តែមុននឹងផ្ទេរអំណាច គណបក្សប្រជាជនកម្ពុជា ត្រូវតែឈ្នះការបោះឆ្នោតជាមុនសិន ដោយយោងតាមលទ្ធផលបឋមក្រៅផ្លូវការ បានបង្ហាញថា គណបក្សប្រជាជនកម្ពុជា ទទួលបានអាសនៈស្ទើរតែទាំងអស់ក្នុងរដ្ឋសភាគឺ ១២០/១២៥អាសនៈ។

អ្នកវិភាគនយោបាយរូបនេះ លើកឡើងថា «បើមានការផ្ទេរអំណាចភ្លាមៗក្រោយការបោះឆ្នោតមែន ការផ្ទេរអំណាចនេះ នឹងក្លាយជារឿងដែលមិនធ្លាប់មានក្នុងប្រវត្តិសាស្ត្រកម្ពុជាជាង ៥០០ឆ្នាំ ជាពិសេស រយៈពេលជិត ១០០ឆ្នាំចុងក្រោយ, ហើយរិតតែមិនធ្លាប់មានទាល់តែសោះ ដែលការរៀបចំក្បាលម៉ាស៊ីនដឹកនាំរដ្ឋាភិបាល ដែលភាគច្រើនលើសលប់សុទ្ធតែជាយុវជន, មិនថាតែនៅកម្ពុជាទេ សូម្បីតែនៅអាស៊ីទាំងមូល ក៏មិនធ្លាប់មានបែបនេះដែរ»។

ជាងនេះទៀត លោកថា ការផ្ទេរអំណាចនៅកម្ពុជានាពេលនេះ នឹងក្លាយជាបទពិសោធន៍មួយដ៏ធំសម្រាប់ប្រទេសនានាពាក់ព័ន្ធ នឹងការរៀបចំផែនការយុវជនបន្តវេន៕