កម្ពុជា និង ក្រុមហ៊ុន Huawei ចង់បណ្ដុះបណ្ដាលជំនាញឌីជីថល ពីកម្រិតបឋមសិក្សា ដល់សាកលវិទ្យាល័យ

សម្ដេចធិបតី និង   លោក  លាំង ហ័រ ប្រធានក្រុមប្រឹក្សាភិបាលក្រុមហ៊ុន Huawei Technology Co., Ltd បានពិភាក្សា អំពីការបណ្ដុះបណ្ដាលធនធានមនុស្សលើជំនាញឌីជីថល ដោយក្រុមហ៊ុន Huawei បានបង្ហាញចំណាប់អារម្មណ៍លើ ការបណ្ដុះបណ្ដាល ជំនាញនេះ ដោយចាប់ផ្តើម ពីកម្រិតបឋមសិក្សា   រហូតដល់កម្រិតសាកលវិទ្យាល័យ ខណៈកន្លងមកនេះ ក្រុមហ៊ុនក៏បានសហការជាមួយដៃគូនៅតាមសាកលវិទ្យាល័យមួយចំនួននៅកម្ពុជា លើការងារបណ្ដុះបណ្ដាលធនធានមនុស្សលើវិស័យឌីជីថលផងដែរ។

ក្នុងជំនួបនាថ្ងៃទី១៤ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែតបានបញ្ជាក់ថា ការអភិវឌ្ឍលើហេដ្ឋារចនាសម្ព័ន្ធឌីជីថល  គឺមានសារៈសំខាន់ណាស់ ដែលទាមទារឱ្យរាជរដ្ឋាភិបាល និងវិស័យឯកជនធ្វើការរួមគ្នានៅក្នុងការអភិវឌ្ឍវិស័យនេះឱ្យ កាន់តែរីកចម្រើនថែមទៀត។ សម្ដេចក៏បានស្វាគមន៍ចំពោះក្រុមហ៊ុន Huawei Technology Co., Ltd ចំពោះ ការវិនិយោគលើបច្ចេកវិទ្យាថ្មីៗ និងការវិនិយោគ លើការអភិវឌ្ឍហេដ្ឋារចនាសម្ព័ន្ធឌីជីថល។ បន្ថែមពីនេះ សម្ដេចអធិបតី ក៏បានលើកទឹកចិត្តឱ្យ ក្រុមហ៊ុន Huawei Technology Co., Ltd ពិនិត្យលទ្ធភាពវិនិយោគលើវិស័យផ្សេងៗទៀត ដូចជា ការវិនិយោគ ការផលិត សម្ភារ គ្រឿងបង្គុំអេឡិក ត្រូនិកជាដើម។

ពីជំនួបលើទឹកដីរដ្ឋធានីប៉េកាំង ប្រទេសចិន សម្ដេច ហ៊ុន ម៉ាណែត ក៏បានអរគុណ ក្រុមហ៊ុន Huawei ដែល សហការជាមួយនឹងក្រសួង-ស្ថាប័នពាក់ព័ន្ធ ក្នុងការជួយកសាង និង អភិវឌ្ឍន៍ហេដ្ឋារចនាសម្ព័ន្ធ ទូរគមនាគមន៍ ក្នុងរយៈពេលជាង២ទសវត្សរ៍មកហើយ។ សម្ដេចអធិបតី  សង្ឃឹមថាក្រុមហ៊ុន Huawei Technology Co., Ltd នឹងបន្តនាំចូលបច្ចេកវិទ្យាថ្មីៗ និងទំនើបពីប្រទេសចិន មកកាន់កម្ពុជា។

សម្ដេច បានគូសបញ្ជាក់ថា រាជរដ្ឋាភិបាលកម្ពុជា នៅតែរក្សាគោលនយោបាយនៃទំនាក់ទំនង និង កិច្ចសហប្រតិបត្តិការល្អ  រវាងកម្ពុជា-ចិន និងបន្តគាំទ្រសម្របសម្រួល និង លើកទឹកចិត្តឱ្យមានការវិនិយោគកាន់តែច្រើនមកកម្ពុជា ។ សម្ដេចអធិបតី ក៏បានបញ្ជាក់អំពីសារៈសំខាន់នៃ សុខសន្ដិភាព និង ស្ថិរភាពនយោបាយនៅកម្ពុជា ដែលជាមូលដ្ឋានគ្រឹះ នៃការបង្កើន ទំនុកចិត្តដល់វិនិយោគិន នៅកម្ពុជា។

សម្តេចធិបតី បានគូសបញ្ជាក់សារ ជាថ្មីម្តងទៀតនូវជំហរស្វាគមន៍ និងការគាំទ្ររបស់រាជរដ្ឋាភិបាល ចំពោះដំណើរការអាជីវកម្ម និងវិនិយោគរបស់ក្រុមហ៊ុននៅកម្ពុជា ដែលស្របតាមតម្រូវការសង្គម-សេដ្ឋកិច្ចរបស់កម្ពុជា និងគោលនយោបាយរបស់រាជរដ្ឋាភិបាល៕