សម្ដេច ហ៊ុន សែន៖ សម្ព័ន្ធភាពបក្សទាំង២៨ មិនប៉ះពាល់ដល់ប្រជាធិបតេយ្យនៅកម្ពុជាទេ  

ការចងសម្ព័ន្ធភាពរវាងគណបក្សប្រជាជនកម្ពុជា ដែលជាគណបក្សកំពុងកាន់អំណាច និងបណ្ដាគណបក្សចំនួន ២៧ ទៀត ត្រូវបានសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា អះអាងថា មិនប៉ះពាល់ដល់ប្រជាធិបតេយ្យឡើយ តែសម្ព័ន្ធភាពនេះ នឹងធ្វើឱ្យប្រជាធិបតតេយ្យនៅកម្ពុជាកាន់តែល្អប្រសើរ។

ការអះអាងរបស់សម្ដេចតេជោពេលនេះ គ្រាដែលគណបក្សប្រជាជនកម្ពុជា និងគណបក្សនយោបាយចំនួន២៧ បានសម្រេចចុះហត្ថលេខាលើកិច្ចព្រមព្រៀងលើកិច្ចសហប្រតិបត្តិការ និងចងសម្ព័ន្ធភាពរួមគ្នា នៅថ្ងៃទី២៥ ខែតុលា ឆ្នាំ ២០២៣ នាស្នាក់ការកណ្ដាលគណកប្សប្រជាជនកម្ពុជា។

បើតាមសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ការចុះហត្ថលេខានៅថ្ងៃនេះ គឺគណបក្សទាំងនេះ មិនមែនជាកូនចៅរបស់គណបក្សប្រជាជនកម្ពុជាឡើយ តែជាដៃគូសហការដើម្បីផលប្រយោជន៍រួមរបស់ប្រទេសជាតិ។ នៅចំពោះមុខបណ្ដាមេដឹកនាំគណបក្សជាដៃគូ សម្ដេចតេជោ ប្រធានគណបក្សប្រជាជនកម្ពុជា បានអះអាងថា សម្ព័ន្ធភាពរវាងគណបក្សនយោបាយទាំង២៨នេះ មិនធ្វើប៉ះពាល់ដល់ប្រជាធិតេយ្យរបស់កម្ពុជាឡើយ តែផ្ទុយទៅវិញ សម្ព័ន្ធភាពមួយនេះ នឹងចូលរួមយ៉ាងសកម្មក្នុងការលើកកម្ពស់ប្រជាធិបតេយ្យនៅកម្ពុជាថែមទៀត។

សម្ដេចតេជោ លើកឡើងដូច្នេះថា៖ «វាអត់មានការប៉ះពាល់ទៅលើដំណើរការប្រជាធិបតេយ្យទេ ផ្ទុយទៅវិញ វាធ្វើឱ្យដំណើរការប្រជាធិបតេយ្យនៅកម្ពុជាកាន់តែល្អប្រសើរ នៅត្រង់ថា បណ្ដាគណបក្សនយោបាយទាំងអស់ បើទោះបីមាននយោបាយខុសគ្នា មានចំណុចខុសគ្នា ក៏ប៉ុន្តែ គេអាចមកអង្គុយជាមួយគ្នាបាន»។ សម្ដេចតេជោ សង្កត់ធ្ងន់ថា សម្ព័ន្ធភាពនេះ គឺជាដៃគូកិច្ចសហប្រតិបត្តិការដោយស្មើភាព សាមគ្គីភាព គោរពសិទ្ធិ និងស្វ័យភាពរបស់គណបក្សនីមួយៗ ដើម្បីជាផលប្រយោជន៍ជាតិ និងប្រជាជនកម្ពុជា។

សម្ដេចតេជោ ហ៊ុន សែន ក៏បានបញ្ជាក់ដែរថា សម្ព័ន្ធភាពរវាងគណបក្សប្រជាជនកម្ពុជា ដែលជាគណបក្សកាន់អំណាច ជាមួយគណកប្សនយោបាយស្ទើរជាងពាក់កណ្ដាលនៃបក្សដែលមាននៅកម្ពុជានេះ ក៏មិនបានធ្វើឡើងដើម្បីលុបបំបាត់សំឡេងប្រឆាំងនោះឡើយ ខណៈក្រុមប្រឆាំង​ ក៏កំពុងបង្កើតសម្ព័ន្ធភាពមួយ ដើម្បីប្រឆាំងផងដែរ៕