មន្ត្រីបក្សភ្លើងទៀន ស្នើឲ្យលុបសេចក្តីសម្រេចតែងតាំងគណៈកម្មាធិការប្រតិបត្តិខេត្តសៀមរាបថ្មី

អនុប្រតិបត្តិគណបក្សភ្លើងទៀនខេត្តសៀមរាប បានដឹកនាំកម្លាំងក្រុមប្រឹក្សាជាប់ឆ្នោត និងក្រុមការងារតាមឃុំ-ស្រុក ជួបជុំនៅទីស្នាក់ការគណបក្សចាស់ ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប ដោយដង្ហែក្បួនទៅកាន់ទីស្នាក់ការគណបក្សថ្មី នៅភូមិកក្រាញ់ សង្កាត់សៀមរាប  ដើម្បីទាមទារឲ្យ លោក ទាវ វណ្ណុល ប្រធានគណបក្សភ្លើងទៀន លុបសេចក្តីសម្រេចតែងតាំង គណៈកម្មាធិការប្រតិបត្តិខេត្តសៀមរាបថ្មី ព្រមទាំងសួររកខុសត្រូវនៃការលុបសមាជិកភាពក្រុមប្រឹក្សាជាប់ឆ្នោតចំនួន ៣រូប និងប្រធានក្រុមការងារស្រុកស្វាយលើ ខេត្តសៀមរាប ផងដែរ។

លោក នឹម វ៉ាន់សំ ប្រធាន គ.ជ.ប ខេត្តសៀមរាប បានឲ្យដឹងថា ករណីនេះមិនទាន់ដល់ដំណាក់កាលដែលដោះស្រាយដោយគណៈកម្មការជាតិបោះឆ្នោតទេ គឺជាការសម្របសម្រួលផ្ទៃក្នុងរបស់ពួកគាត់។ ហើយបើមានបញ្ហាគឺអាចទាក់ទងទៅសមត្ថកិច្ចឬអាជ្ញាធរមូលដ្ឋានបាន។ លោកបន្តថា ករណីនេះលោកក៏ទទួលបានព័ត៌មានពីសមត្ថកិច្ចដែរ គឺអនុប្រតិបត្តិគណបក្សភ្លើងទៀនខេត្តសៀមរាប បានដឹកនាំក្រុមកម្លាំងក្រុមប្រឹក្សាជាប់ឆ្នោត និងក្រុមការងារតាមឃុំ-ស្រុក ជួបជុំនៅទីស្នាក់ការគណបក្សចាស់ ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប ដោយដង្ហែក្បួនទៅកាន់ទីស្នាក់ការគណបក្សថ្មី នៅភូមិកក្រាញ់ សង្កាត់សៀមរាប ក្រុង សៀមរាប ដើម្បីទាមទារឲ្យលោក ទាវ វណ្ណុល ប្រធានគណបក្សភ្លើងទៀន លុបសេចក្តីសម្រេចតែង តាំង គណៈកម្មាធិការប្រតិបត្តិខេត្តសៀមរាបថ្មី ព្រមទាំង សួររកខុសត្រូវនៃការលុបសមាជិកភាពក្រុមប្រឹក្សាជាប់ឆ្នោតចំនួន ៣រូប និងប្រធានក្រុមការងារស្រុកស្វាយលើ ផងដែរ។

សូមបញ្ជាក់ផងដែរថា នៅក្នុងហេតុការណ៍នោះគឺត្រូវបានបញ្ចប់ត្រឹមម៉ោង១០ព្រឹកថ្ងៃទី ២៧ខែមករាឆ្នាំ២០២៤ ដោយប្រធានគណបក្សភ្លើងទៀន បានចាកចេញដោយមិនទាន់មានដំណោះស្រាយ ជាមួយមន្ត្រីពាក់ព័ន្ធនៅឡើយ៕

ដោយ៖ជុន កុសល