ព័ត៌មានអន្ដរជាតិ
ហេតុអ្វីពេលនេះហើយ វៀតណាម នៅមិនទាន់រកបានប្រធានាធិបតីថ្មី?
បន្ទាប់ពីការប្រកាសលាលែងពីតំណែងរបស់លោក Vo Van Thuong ជាប្រធានាធិបតីកាលពីខែមីនាមក វៀតណាមមិនទាន់ជ្រើសតាំង ឬរកឃើញអ្នកស័ក្តិសមមកជំនួសតំណែងនេះជាផ្លូវការនៅឡើយទេ ខណៈបច្ចុប្បន្នប្រទេសអាស៊ានមួយនេះមានត្រឹមប្រធានាធិបតីស្ដីទីប៉ុណ្ណោះដែលកំពុងកាន់ការដោយលោកស្រី Vo Thi Anh Xuan ។
![](https://www.kampucheathmey.com/wp-content/uploads/2024/04/Vo-Van-Thuong-7.jpg)
លោក Vo Van Thuong បានដកខ្លួនចេញពីតំណែងប្រធានាធិបតីវៀតណាមកាលពីថ្ងៃទី២០ ខែមីនា ក្រោយពេលក្ដោបក្ដាប់អំណាចបានត្រឹមតែ ១ ឆ្នាំប៉ុណ្ណោះ បន្ទាប់ពីឡើងស្នងតំណែងជំនួសលោក Nguyen Xuan Phuc ហើយគិតត្រឹមពេលនេះមានរយៈពេលជាង ១ ខែមកហើយដែលកៅអីប្រធានាធិបតីវៀតណាមនៅទំនេរមិនទាន់អ្នកមានអង្គុយ ខណៈក៏មានការចាក់សួរពាក់ព័ន្ធនឹងបញ្ហាមួយនេះផងដែរ ។
ទាក់ទិននឹងឫសគល់នេះ អ្នកវិភាគបានលើកឡើងប្រាប់ទីភ្នាក់ងារព័ត៌មាន AP ថា បេក្ខភាពប្រធានាធិបតីផ្លូវការទំនងជាមិនទាន់ដល់ពេលវេលាដែលត្រូវជ្រើសរើសក្នុងពេលឆាប់ៗនេះនោះទេ ព្រោះថាប្រសិនបើប្រធានាធិបតីជ្រើសរើសបានហើយ ប៉ុន្តែរបូតទៅវិញក្នុងលក្ខខណ្ឌណាមួយនោះ ច្បាស់ណាស់វិនិយោគិនបរទេសអាចនឹងដកទុនវិនិយោគចេញពីវៀតណាម ដោយសារតែក្ដីព្រួយបារម្ភអំពីអស្ថិរភាព និងគោលនយោបាយសេដ្ឋកិច្ចដែលមិនអាចដឹងទុកជាមុនបាននៅក្នុងប្រទេសអាស៊ានមួយនេះ ។
![](https://www.kampucheathmey.com/wp-content/uploads/2024/04/Vo-Thi-Anh-Xuan-2-1024x683.jpg)
ទន្ទឹមនោះ វៀតណាមក៏កំពុងមានបញ្ហាបែកបាក់ផ្ទៃក្នុងផងដែរដែលកើតចេញពីអំពើពុករលួយ ជាពិសេសនៅក្នុងជួរគណបក្សកុម្មុយនីស្ត ទើបសម្រេចឲ្យលោកស្រី Vo Thi Anh Xuan បន្តកាន់តំណែងជាប្រធានាធិបតីស្ដីទី រហូតដល់សមាជជាតិនៅឆ្នាំ ២០២៦ ដែលជាកិច្ចប្រជុំដ៏សំខាន់របស់គណបក្ស និងជាពេលវេលាមាសក្នុងការឈ្មុសឈ្មុលរកអ្នកនយោបាយដ៏មានឥទ្ធិពលបំផុតដើម្បីស្នងតំណែងលោក Vo Van Thuong ជាផ្លូវការ ។
ម្យ៉ាងទៀត ការអូសក្រឡាមិនទាន់សម្រេចរើសប្រធានាធិបតីថ្មី ក៏អាចថាមកពីវៀតណាមនឹងប្រើកណ្ដាប់ដៃដែកកម្ចាត់មន្ត្រីពុករលួយក្នុងជួរគណបក្សកុម្មុយនីស្ត ក៏ដូចជាជួររដ្ឋាភិបាលឲ្យខ្ទេចហ្មត់សិន ស្របពេលដែលថ្មីៗនេះក៏មានការលាលែងពីតំណែងរបស់ប្រធានរដ្ឋសភាលោក Vuong Dinh Hue ផងដែរ ដោយសារតែការប្រព្រឹត្តកំហុសខុសឆ្គង អសមត្ថភាព និងបំពានបទប្បញ្ញត្តិរបស់បក្ស ហើយការបំពានរបស់លោកបានប៉ះពាល់ដល់កេរ្តិ៍ឈ្មោះរបស់បក្ស រដ្ឋ និងខ្លួនលោកផ្ទាល់ ។
ជាក់ស្ដែង ទាំងលោកប្រធានាធីបតី Vo Van Thuong និងអតីតប្រធានាធិបតី Nguyen Xuan Phuc សុទ្ធសឹងតែជាប់ក្នុងសំណុំរឿងក្ដីក្ដាប់អំពើពុករលួយ ក៏ដូចជាមិនខុសគ្នាទៅនឹងរឿងរ៉ាវរបស់លោកប្រធានរដ្ឋសភា Vuong Dinh Hue នោះដែរ ខណៈដើមចមដែលនាំឲ្យលោក Vo Van Thuong ឈានទៅដល់ការលាលែងពីតំណែង គឺដោយសារតែអតីតប្រធានាធិបតីវ័យ ៥៤ ឆ្នាំរូបនេះបានបំពានលើបទបញ្ញត្តិរបស់គណបក្ស និងការប្រព្រឹត្តកំហុសខុសឆ្គងមួយចំនួន ដែលប្រការនេះបានជះឥទ្ធិពលអវិជ្ជមានដល់មតិសាធារណៈ កិត្តិយសរបស់បក្ស រដ្ឋ និងខ្លួនលោកផ្ទាល់តែម្ដង ។
![](https://www.kampucheathmey.com/wp-content/uploads/2024/04/Vo-Van-Thuong-4-1.jpg)
ការលាលែងពីតំណែងរបស់លោក Vo Van Thuong នេះទៀតសោតគឺកើតមានឡើងប៉ុន្មានថ្ងៃប៉ុណ្ណោះ បន្ទាប់ពីប៉ូលិសវៀតណាមបានប្រកាសពីការចាប់ឃាត់ខ្លួនលើអតីតមន្ត្រីវៀតណាមម្នាក់ប្រចាំនៅខេត្ត Quang Ngai ដែលរកឃើញថាមានជាប់ពាក់ព័ន្ធនឹងអំពើពុករលួយកាលពីជាង ១០ ឆ្នាំមុន ពោលអំឡុងពេលដែលលោក Vo Van Thuong នៅកាន់ការជាប្រធានបក្សប្រចាំខេត្តមួយនេះ ។
គួរបញ្ជាក់ថា លោក Vo Van Thuong បានឡើងកាន់តួនាទីជាប្រធានាធិបតីវៀតណាមកាលពីថ្ងៃ២ ខែមីនា ឆ្នាំ២០២៣ ជំនួសតំណែងលោក Nguyen Xuan Phuc ដែលក៏បានលាលែងពីតំណែងដូចគ្នា ពាក់ព័ន្ធនឹងរឿងអាស្រូវមួយចំនួន ហើយនេះក៏ជាភាពវឹកវរមិនធ្លាប់មានផងដែរក្នុងរបត់នយោបាយសម្រាប់ប្រទេសមួយនេះ ពោលរយៈពេលត្រឹម ១ ឆ្នាំប៉ុណ្ណោះ វៀតណាមប្ដូរក្បាលម៉ាស៊ីនដឹកនាំចំនួន ២ រូបទៅហើយ ៕
![](https://www.kampucheathmey.com/wp-content/uploads/2024/04/Vo-Van-Thuong-and-Nguyen-Xuan-Phuc.jpg)
ដោយ ៖ សុខ ជីវ័ន្ត
ចុចអាន ៖ វៀតណាម តាមរកស្រ្តីដែលលក់ម្នាស់ឲ្យទេសចរបរទេស ៣ផ្លែ ២០ដុល្លារ
![](https://kampucheathmey.com/wp-content/uploads/2020/12/1-01-2-01-1.png)
-
សន្តិសុខសង្គម១ ថ្ងៃ ago
អ្នកកាសែតម្នាក់ត្រូវឃាត់ខ្លួនក្រោយដោះមីនតោនដឹកយកទៅឱ្យប៉ូលិស
-
សន្តិសុខសង្គម៣ ថ្ងៃ ago
Breaking News៖ អគ្គិភ័យកំពុងឆេះក្លឹបមួយកន្លែងនៅជិតវត្តឬស្សីសាញ់(មានវីដេអូ)
-
ព័ត៌មានជាតិ៣ ថ្ងៃ ago
ព័ត៌មានបន្ថែម៖ មានមនុស្ស៣នាក់រងរបួសក្នុងហេតុការណ៍ឆេះក្លឹប
-
ព័ត៌មានអន្ដរជាតិ១ សប្តាហ៍ ago
ការស្លាប់របស់ពិធីការនី កូរ៉េ ដោយសារតែទ្រាំទ្រសម្ពាធ និងការធ្វើបាបពីមិត្តរួមការងារលែងបាន
-
ព័ត៌មានជាតិ១ សប្តាហ៍ ago
សម្ដេចតេជោ ស្នើឱ្យតុលាការចាត់ការលើសំណុំរឿង Mr Seth អ្នករៀបចំធ្វើបាតុកម្ម ១៨ សីហា ក្រោយបុគ្គលនេះក្បត់សន្យា
-
សន្តិសុខសង្គម១ សប្តាហ៍ ago
Update! ដុំដែក៣ដុំដែលធ្លាក់បុកទម្លុះប្លង់សេផ្ទះប្រជាពលរដ្ឋ គឺកើតចេញពីផ្ទុះម៉ូទ័រស្តុកប្រេងរបស់ឧកញ៉ាម្នាក់
-
ជីវិតកម្សាន្ដ១ ថ្ងៃ ago
អតីតស្វាមី រងការចោទ កេងប្រវ័ញ្ចការស្លាប់ Barbie ខណៈមិត្តស្រីទម្លាយថា លោកនិងម្ដាយគឺជាជនបង្ក
-
ជីវិតកម្សាន្ដ១ សប្តាហ៍ ago
បានឱកាសចូលសម្តែងជាថ្មី តាចេក ស៊ូកើយអង្រឹងនៅចេតីយ៍រង់ចាំថតរឿងខ្មោច