ឯកឧត្តម ហ៊ុន ម៉ានី ណែនាំឱ្យសមាជិកបក្ស បន្តថែរក្សា សាមគ្គី និងយកចិត្តទុកដាក់តម្រូវការប្រជាពលរដ្ឋ

ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះជួយខេត្តកំពង់ស្ពឺ បានណែនាំឱ្យសមាជិក សមាជិកាគណបក្សបន្តថែរក្សានូវសាមគ្គី ឯក​ភាព​ផ្ទៃក្នុងរបស់គណបក្ស និងបន្តយកចិត្តទុកដាក់លើការថែរក្សាសុខសុវត្ថិភាព និងតម្រូវការរបស់ប្រជាជនផងដែរ។

ឯកឧត្តម ហ៊ុន ម៉ានី បានលើកឡើងក្នុងពេលដឹកនាំកិច្ចប្រជុំបូកលទ្ធផលការងារគណបក្សនៅក្នុងខែកក្កដា និងលើកទិសដៅភារកិច្ចខែសីហា ឆ្នាំ ២០២៤ នៅមន្ទីរគណបក្សខេត្តកំពង់ស្ពឺនៅថ្ងៃទី ២៧ ខែកក្កដា ឆ្នាំ ២០២៤។

ឯកឧត្តម ហ៊ុន ម៉ានី បានកោតសរសើរ និងថ្លែងអំណរគុណចំពោះ ក្រុមការងារចុះជួយមូលដ្ឋានខេត្ត-ក្រុង ស្រុក-ឃុំ-សង្កាត់ សមាជិកា សមាជិកា គណបក្សប្រជាជនជនកម្ពុជាទាំងអស់ ដែលបានពុះពារប្រឹងប្រែងរួមគ្នាក្នុងការសម្រេចការងារ និងនាំភាពឈ្នះមកជូនគណបក្សប្រជាជនជាបន្តបន្តាប់។

ឯកឧត្តម ហ៊ុន ម៉ានី មានប្រសាសន៍ថា សុខុដុមរមនីយកម្ម កម្មាភិបាលជំនាន់មុន និងកម្មាភិបាលជំនាន់ក្រោយ មានលក្ខណៈបំពេញបន្ថែមគ្នាទៅវិញទៅមក ដែលក្នុងនោះគឺក្មេងដើរលឿន តែមិនទាន់ស្គាល់ផ្លូវ តែកម្មាភិបាលជំនាន់មុនស្គាល់ផ្លូវ ហើយមានការចែករំលែក ផ្តល់ដំបូន្មានដល់កម្មាភិបាលជំនាន់ក្រោយ ដើម្បីទទួលបានជាពុទ្ធិបន្ថែមដើម្បីអនុវត្តការងារ៕