នយោបាយ

អតីតសហការីទណ្ឌិត សម រង្ស៊ី៖ ជនក្បត់ជាតិបីជំនាន់ សម រង្ស៊ី មិនស័ក្តិសមជាធ្វើជាអ្នកដឹកនាំប្រទេសទេ

បានផុស

៣ ខែ មុន

នៅ

ថ្ងៃអាទិត្យ ១៥ ធ្នូ ២០២៤

ដោយ

អតីតតំណាងរាស្រ្តគណបក្សប្រឆាំង និងជាអតីតសហការីរបស់ជនក្បត់ជាតិបីជំនាន់ សម រង្ស៊ី គឺលោក កង គឹមហាក់ ដែលបច្ចុប្បន្នជាទីប្រឹក្សារាជរដ្ឋាភិបាលបានអះអាងថា ទណ្ឌិត សម រង្ស៊ី មិនស័ក្តិសមជាធ្វើជាអ្នកដឹកនាំប្រទេសកម្ពុជាទេ ដោយសារជាមនុស្សគ្មានផែនការ និងយុទ្ធសាស្រ្តជាអ្នកដឹកនាំ។

លោក កង គឹមហាក់ បានថ្លែងថា « លោក សម រង្ស៊ី មិនអាចក្លាយជាអ្នកដឹកនាំប្រទេសបានទេ ដោយសារចរិតលក្ខណៈរបស់គាត់ គាត់គ្មានផែនការធ្វើអ្វីមួយឱ្យបានច្បាស់លាស់ទេ គឺនៅពេលដែលគាត់ចង់ធ្វើអ្វីមួយ គឺគាត់និយាយគ្នាតែពីរនាក់ប្ដីប្រពន្ធគាត់ធ្វើតែម្ដង ហើយបញ្ជាអ្នកនៅក្រោមឱវាទប៉ាតណា ប៉ាតណីអ៊ីចឹងទៅ គ្មានពិភាក្សាពីគ្រោះយោបល់ជាមួយសហការីណាមួយទេ»។

លោកបន្តថា «សម រង្ស៊ី មិនដែលស្ដាប់មតិយោបល់ពីអ្នកក្រោមឱវាទ ឬមន្រ្តីជាន់ខ្ពស់ជំនិតគាត់នោះទេ នៅពេលដែលគាត់សម្រេចចិត្តពីរនាក់ប្រពន្ធគាត់ គឺសម្រេចចិត្តធ្វើ អនុវត្តយកតែម្ដង គ្មានពីណាដឹងរឿងឱ្យច្បាស់បានអនុវត្តនោះទេ ហើយពួកខ្ញុំដែលជាអ្នកនៅក្រោមបង្គាប់ការរបស់គាត់ហ្នឹង គឺរត់តាមការសម្រេចចិត្តគាត់»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមលើនេះ លោក គឹមហាក់ថា ចំពោះការរកដំណោះស្រាយភាគច្រើន គឺធ្វើមិនបានជោគជ័យទេ ដោយសារការសម្រេចចិត្តស្ងាត់ៗ ប៉ុន្ដែនៅពេលមានបញ្ហាកើតឡើង ពីរនាក់ប្ដីប្រពន្ធបានរត់ចោលស្រុកបាត់។ ចំណែកពួកលោកដែលជាអនុវត្តនៅក្នុងប្រទេស មានខ្លះជាប់គុក ខ្លះជាប់បណ្ដឹងនៅតុលាការ និងខ្លះទៀតរត់ភាសខ្លួនទៅថៃ។ ដោយលោកចាត់ទុកថា សម រង្ស៊ី មិនអាចក្លាយជាអ្នកដឹកនាំប្រទេសបានទេ។

អតីតតំណាងរាស្រ្តបក្សប្រឆាំងរូបនេះបានបន្តថា ការសម្រេចចិត្តចាកចេញពីទណ្ឌិត សម រង្ស៊ី ដោយសារគាត់មិនមានផែនការច្បាស់លាស់ដែលធ្វើឱ្យលោកអស់ជំនឿ ហើយគាត់មិនមែនជាអ្នកប្រជាធិបតេយ្យពិតប្រាកដនោះទេ។ ម្យ៉ាងទៀតរចនាសម្ព័ន្ធដឹកនាំនៅក្នុងអតីតគណបក្សប្រឆាំងមានភាពរញ៉េរញ៉ៃ គ្មានសណ្ដាប់ធ្នាប់ ហើយមានបក្ខពួកនិយមខ្លាំងណាស់ដែលពិបាកនឹងធ្វើការជាមួយគ្នា។

ទណ្ឌិត សម រង្ស៊ី នៅតែបន្តរៀបចំផែនការនៅក្រៅស្រុកដែលមានបំណងចង់ឱ្យអ្នកគាំទ្រនៅក្នុងស្រុកជាប់គុកជាបន្តបន្ទាប់ ដើម្បីសន្សំពិន្ទុដាក់បន្ទុកមកលើរាជរដ្ឋាភិបាល ហើយជំរុញឱ្យរដ្ឋបរទេសដាក់សម្ពាធណាមួយមកលើរាជរដ្ឋាភិបាល។

ចំពោះលោក គឹមហាក់ជឿជាក់ថា នៅត្រង់ចំណុចនេះរាជរដ្ឋាភិបាលបានយល់ច្បាស់ ហើយពលរដ្ឋដែលអ្នកធ្លាប់គាំទ្រ ក៏ឈប់ចាញ់បោកទណ្ឌិត សម រង្ស៊ី បន្តទៀតដែរ។ ការអំពាវនាវកៀរគរធ្វើចលនាខុសច្បាប់ផ្សេងៗទៀត មិនមានផលប្រយោជន៍ដល់ជាតិ ហើយទាញពលរដ្ឋទម្លាក់ក្នុងនយោបាយជ្រុលនិយមខុសច្បាប់។

គួររំឭកផងដែរថា សម្រាប់ដំណើរជីវិតនយោបាយរបស់លោក សម រង្ស៊ី នៅត្រង់ថា មានមន្ត្រី សកម្មជន និងអ្នកគាំទ្រ ជាពិសេសអ្នកដែលស្មោះស័្មគ្រជាមួយគាត់ និងនៅក្បែរគាត់តែងជួបប្រទះទុក្ខសោក និងក្តីវិនាសអន្តរាយដោយសារតែរូបគាត់ជាអ្នកបង្កើតឡើង។ អ្នកខ្លះស្លាប់ អ្នកខ្លះរងរបួស អ្នកខ្លះជាប់គុក អ្នកខ្លះត្រូវនិរាស ប្រាស់ព្រាត់ក្រុមគ្រួសារ និងស្រុកទេស ចំណែកអ្នកខ្លះទៀតធ្លាក់ខ្លួនក្រតោកយ៉ាក ដោយសារតែដើរតាមនយោបាយរបស់លោក សម រង្ស៊ី។

លោក សម រង្ស៊ី គឺជាអ្នកនយោបាយអាត្មានិយមមួយរូប ព្រោះតែដើម្បីផលប្រយោជន៍ និងយុទ្ធសាស្ត្រនយោបាយរបស់ខ្លួន បែរជាដើតួជាអ្នកប្រឆាំងផលប្រយោជន៍ជាតិមាតុភូមិនៅក្នុងករណីផ្សេងៗទៀត ដូចជាការជំរុញឱ្យបរទេសកាត់ផ្ដាច់ជំនួយ ដាក់ទណ្ឌកម្មផ្សេងៗ និងការជំរុញគាំទ្រឱ្យបរទេសដកប្រព័ន្ធអនុគ្រោះពន្ធផ្សេងៗពីប្រទេសកម្ពុជាជាដើម។ ការប៉ុនប៉ងគ្រប់វិធីសាស្ត្រនិងគ្រប់មធ្យោបាយរបស់លោក សម រង្ស៊ី ដើម្បីតែមហិច្ឆតាអំណាច ហើយដែលមិនបានខ្វល់ខ្វាយអំពីសុខទុក្ខប្រជាជន និងជោគវាសនាប្រទេសជាតិទាំងប៉ុន្មានខាងលើនេះ គឺជាគ្រោះថ្នាក់បំផុតសម្រាប់ប្រទេសដ៏កម្សត់មួយនេះ។ ដូច្នេះប្រជាពលរដ្ឋមិនគួរយកខ្លួនទៅពាក់ព័ន្ធជាមួយបុគ្គលរូបនេះនោះទេ៕