នាយករដ្ឋមន្ត្រីម៉ាឡេស៊ីតែងតាំងសម្ដេចតេជោ និងលោកថាក់ស៊ីន ជាទីប្រឹក្សាផ្ទាល់ស្ដីពីអាស៊ាន

នាយករដ្ឋមន្ត្រីម៉ាឡេស៊ី លោក Anwar Ibrahim បានប្រកាសពីការតែងតាំងអតីតនាយករដ្ឋមន្ត្រីប្រទេសថៃលោក ថាក់ស៊ីន ស៊ីណាវ៉ាត្រា និងអតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ជាទីប្រឹក្សាផ្ទាល់របស់លោកក្នុងពេលដែលលោកនឹងត្រៀមធ្វើជាប្រធានអាស៊ាននៅឆ្នាំ២០២៥ខាងមុខនេះ។ នេះបើយោងតាមការចុះផ្សាយរបស់កាសែត South China Morning Post នៅថ្ងៃទី១៧ ខែធ្នូ​។

SCMP បានដកស្រង់ប្រសាសន៍របស់រដ្ឋមន្ត្រីការបរទេសម៉ាឡេស៊ីលោក Mohanmad Hasan ដែលបានលើកឡើងថា៖ «ទីប្រឹក្សាទាំង២រូបគឺលើសពីមិត្តជិតស្និទ្ធរបស់លោកនាយករដ្ឋមន្ត្រី ដែលអាចចែករំលែកទស្សនយល់ឃើញនៅពេលចាំបាច់»។

បើតាមលោក Mohamad Hasan លោក ថាក់ស៊ីន និងសម្ដេចតេជោ ហ៊ុន សែន នឹងក្លាយជាទីប្រឹក្សាផ្ទាល់ខ្លួនរបស់លោក Anwar ហើយនឹងមិនមានតួនាទីផ្លូវការណាមួយនៅក្រោមអាស៊ាននោះទេ។

គួរឱ្យដឹងផងដែរថា ម៉ាឡេស៊ីនឹងក្លាយជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) នៅឆ្នាំ ២០២៥។ ក្នុងនាមជាប្រធានម៉ាឡេស៊ីគ្រោងនឹងលើកកម្ពស់សេដ្ឋកិច្ចក្នុងតំបន់ដែលមានបរិយាប័ន្ន និងនិរន្តរភាព ពង្រឹងសន្តិភាព ស្ថិរភាព និងវិបុលភាពក្នុងតំបន់៕

ដោយ ហ៊ុន សិរីវឌ្ឍន៍