ជប៉ុននឹងបង្កើតការិយាល័យសេនានុព័ន្ធយោធាប្រចាំកម្ពុជានៅខែមីនាខាងមុខ

នាយសេនានុព័ន្ធជប៉ុនប្រចាំកម្ពុជា ដែលមាននិវេសនដ្ឋាននៅរដ្ឋធានីហាណូយ បានជម្រាបប្រាប់អគ្គមេបញ្ជាការទ័ពកម្ពុជាថា ប្រទេសជប៉ុននឹងបង្កើតឱ្យមានការិយាល័យសេនានុព័ន្ធប្រចាំកម្ពុជានៅខែមីនាខាងមុខ ជាលទ្ធផលនៃការរឹតចំណងទំនាក់ទំនងដែលជឿទុកចិត្តគ្នាទៅវិញទៅមករវាងប្រទេសទាំងពីរ។

នាយការិយាល័យសេនានុព័ន្ធជប៉ុន លោកវរសេនីយ៍ឯក ស៊ីស៊ីហារ៉ា ម៉ាសានាអូ (ISHIHARA Masanao) បានលើកឡើងក្នុងជំនួបជម្រាបលាអគ្គមេបញ្ជាការទ័ពកម្ពុជានាយឧត្តមសេនីយ៌ វង្ស ពិសេន នាព្រឹកថ្ងៃទី២០ ខែកុម្ភៈនេះថា ជាង ៣ឆ្នាំមកនេះ រាជរដ្ឋាភិបាលជប៉ុន និងកម្ពុជា បានបន្តពូនជ្រុំទំនាក់ទំនង និងកិច្ចសហប្រតិបត្តិការរវាងប្រទេសទាំងពីរកាន់តែរឹងមាំខ្លាំងក្លា រហូតដំឡើងកម្រិតក្នុងភាពជាដៃគូយុទ្ធសាស្រ្តគ្រប់ជ្រុងជ្រោយ ជប៉ុន-កម្ពុជា ក្នុងនោះបញ្ហាសន្តិសុខក៏ត្រូវបានពង្រឹងផងដែរ ហើយនៅខែមីនា ខាងមុខប្រទេសជប៉ុននឹងបង្កើតឲ្យមានការិយាល័យសេនានុព័ន្ធជប៉ុនប្រចាំនៅព្រះរាជាណាចក្រកម្ពុជា។

អគ្គមេបញ្ជាការទ័ពនាយឧត្តមសេនីយ៌ វង្ស ពិសេន បានកោតសរសើរចំពោះកិច្ចខិតខំប្រឹងប្រែងរបស់នាយការិយាល័យសេនានុព័ន្ធជប៉ុន ក្នុងការជួយពង្រឹងវិស័យកងទ័ពប្រទេសទាំងពីរ កម្ពុជា-ជប៉ុន ឲ្យមានការរីកចម្រើនរឹងមាំជាបន្តបន្ទាប់ ក្នុងនោះការជួយបណ្ដុះបណ្ដាលនៅប្រទេសជប៉ុន និងការហ្វឹកហ្វឺនដល់កងកម្លាំងកងទ័ពមួកខៀវកម្ពុជាផងដែរ។ លោកជឿជាក់ថា កងទ័ពប្រទេសទាំងពីរនឹងបន្តពង្រឹងពង្រីកទំនាក់ទំនង កិច្ចសហប្រតិបត្តិការកាន់តែទូលំទូលាយ តាមរយៈការបណ្តុះបណ្តាលធនធានមនុស្ស ការផ្លាស់ប្តូរទស្សនកិច្ចគ្រប់កម្រិត ការផ្លាស់ប្តូរព័ត៌មានទប់ស្កាត់អំពើភេរវកម្ម ឧក្រិដ្ឋកម្មឆ្លងដែននានា កិច្ចសហប្រតិបត្តិការការងារមនុស្សធម៌ និងសង្គ្រោះគ្រោះមហន្តរាយ។

អនុព័ន្ធយោធា (DA) គឺជាសមាជិកនៃកងកម្លាំងប្រដាប់អាវុធ ដែលបម្រើការក្នុងស្ថានទូតតំណាងជាតិរបស់ពួកគេ អនុព័ន្ធយោធាទទួលបានឋានៈការទូត និងអភ័យឯកសិទ្ធិ ដែលទទួលខុសត្រូវចំពោះគ្រប់ទិដ្ឋភាពនៃទំនាក់ទំនងយោធា និងការពារជាតិជាមួយប្រទេសដែលបានដាក់ទូត ព្រមទាំងអាចធ្វើការធ្វើការលើបញ្ហាសុវត្ថិភាពផ្សេងទៀតដូចជាចំណាកស្រុក និងបញ្ហាយុត្តិធម៌៕

អត្ថបទដោយ ហ៊ុន សិរីវឌ្ឍន៍