លាឈប់ទៅ! ប្រសិនបើការងារកំពុងសម្លាប់ផ្លូវចិត្ដដោយរបៀប​ ៦ យ៉ាងនេះ

លាឈប់ថ្ងៃនេះ ប្រសិនបើការងារកំពុងសម្លាប់ផ្លូវចិត្ត​ដោយរបៀបខាងក្រោម៖

១.គេងមិនលក់រាល់យប់

ស្រមៃឃើញតែ​កន្លែងការងារ ហើយ​ក្រោកមកកាលណា ខ្លាចម៉ោង ៨ ខ្លាច​ការិយាល័យ ខ្លាចមេ ខ្លាចការងារដែលតែងគរជាគំនរដូចភ្នំ ខ្លាចពាក្យ​ដែលបន្ទោសស្តី ខ្លាច​ការប្រជុំដែលគ្មាន​មាតិកា ខ្លាចឃើញមនុស្ស​ដែលមិនធ្វើការ​តែ​អែបអបទទួល​បានការសរសើរ​ ខ្លាច​ថា ខ្លួនអត់ធ្វើអីសោះ​ក៏ចាំតែ​ខុស។

២. អារម្មណ៍ឈឺរាល់ថ្ងៃ

ពីមុនអត់ចេះស្រវឹង ឥឡូវ​ល្ងាចណាក៏​ចង់កាត់សាញ។ ស្រាពីរបីកែវរាល់យប់ ព្រោះ​ពិបាកចិត្ត​រឿង​កន្លែងធ្វើការមែនទេ? ធ្វើការច្រើនម៉ោងហើយ អត់ពេលហាត់ប្រាណ គ្មាន​លុយ​ញ៉ាំអាហារ ថែមទំាង​បន្លាចក្នុងការ​គេងទៀត? គ្មានការងារណាដែលសមនឹងលះបង់សុខភាពរបស់យើង​ឡើយ។ វិលមក​ហូបបាយកក រកការងារថ្មី​ល្អជាងឆ្កួតទាន់។

៣. មានអារម្មណ៍ថាធ្លាប់លះបង់តែគ្មានតម្លៃ

មិត្តរួមការងារយ៉ាប់ ក្រុមការងារ​កេងចំណេញ ឱ្យយើង​ធ្វើម្នាក់ឯង គេឈ្លោះគ្នា​សង្គ្រាម​ក្តៅត្រជាក់ងងឹតមុខរាល់ថ្ងៃ គ្មាន​ដំណោះស្រាយ​ព្រោះ​ជម្លោះនាំំមកពីថ្នាក់លើ​តដល់ក្រោម ព្រោះទម្លាប់និយាយ​ពីក្រោយ​ខ្នងនិងបែងចែកបក្សពួក។

៤. អារម្មណ៍គ្មានការជឿនលឿន

កុំខ្ជះខ្ជាយពេលវេលាក្នុងទីតាំងដែលមិនផ្តល់ឱកាសសម្រាប់ការរីកចម្រើន។ ការលះបង់ពេលវេលានិងកម្លាំងទៅឱ្យក្រុមហ៊ុនដែលមិនគាំទ្រវឌ្ឍនភាពនៃអាជីពរបស់បុគ្គលិក ។ មិនចង់ឱ្យយើងរីកចម្រើនជាមួយ នឹងរារាំងការអភិវឌ្ឍអាជីពរបស់យើង​ក្នុងរយៈពេលវែង។

៥. មិត្តរួមការងារខ្សោយសីលធម៌ វ័យចាស់ជ្រុលឬក្មេងជ្រុល

ចាស់ពូកែត្អូញត្អែរឥតឈប់ឈរ សតិអារម្មណ៍ បើក្មេងវិញ​មិនយកចិត្ត​ទុកដាក់ ធ្វើអ្វី​ចុងដៃជើង​សប្បាយច្រើនជាងមានវិន័យ ហើយចៅហ្វាយវិញមិនដែលឃើញមុខមកដោះស្រាយ។ អារម្មណ៍​មិនសប្បាយចិត្តជាប្រចាំ ទុទិដ្ឋិនិយមនៃបរិយាកាស អាចសម្លាប់ចំណង់ចំណូលចិត្ត ប្តូរយើងពីល្អទៅជាអាក្រក់ ពី​ឧស្សាហ៍ទៅជាខ្ចិល ពីមាន​ផែនការទៅជា​បណ្តោយតាមយថាកម្ម សមនឹង​នៅទៀតដែរ?

៦. អារម្មណ៍ដែលមិនដឹងថាក្រុមហ៊ុននេះកំពុងធ្វើអ្វីឱ្យប្រាកដ

​គេពិតជា​កំពុងលូតលាស់ ឬដើរថយក្រោយ? យល់ថា ខ្លួនកំពុងតែស្ថិតនៅទីកន្លែង​មួយត្រឹមត្រូវនៃគោលដៅជីវិត ឬគ្រាន់តែគ្មានជម្រើស។ បើទម្លាប់រស់ដោយគ្មានជម្រើស ជីវិតនឹង​បែបនេះជារៀងរហូត។ ចូរផ្តល់សេរីភាព​ឱ្យខ្លួនឯងឡើង។ ​ពេលវេលាមាន​តម្លៃណាស់។ កុំបោះបង់ចោល​ពេលវេលា ក្នុងបរិយាកាស​មួយ ដែលងងឹតស្លុប​រង់ចាំ​ទទួលយកជំងឺផ្លូវចិត្ត​ និងការ​បញ្ចប់ទៅនូវ​អាជីព​ភ្លឺស្វាងរបស់អ្នក៕

ប្រែសម្រួល៖ ចម្រើន តារា

ចុចអាន៖ ហេតុផលមួយចំនួន​ដែលបុគ្គលិកគួរលាឈប់ពីមុខងារជាជាងនៅរង់ចាំទទួលលិខិតបណ្តេញចេញ

ចុចអាន៖ ទម្លាប់មិនល្អទាំង ៥ របស់ថៅកែៗដែលកំពុងធ្វើឲ្យកូនចៅរត់ចោលអស់