សេដ្ឋកិច្ច

ចេកឆាបរាជនីល្បីរសជាតិឈ្ងុយឆ្ងាញ់ឆ្លងខេត្តពីបាត់ដំបងធ្លាយដល់ព្រៃវែង

បានផុស

៣ years មុន

នៅ

ថ្ងៃចន្ទ ១៣ មិថុនា ២០២២

ដោយ

សិប្បកម្មចេកឆាបរាជនី បានបង្កើតផលិតផលថ្មីដែលមាននៅលើទីផ្សារស្រាប់ ហើយធ្វើឱ្យមានលក្ខណៈពិសេសខុសពីគេទទួលបានការចាប់អារម្មណ៍ និងពេញនិយមច្រើនពីអតិថិជនតាំងពីខេត្តបាត់ដំបង រហូតដល់រាជធានីភ្នំពេញ និងតាមបណ្តាខេត្តមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិប្បកម្មចេកឆាបរាជនីជាសហគ្រាសជនបទ ស្ថិតនៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ដែលជាសិប្បកម្មយកចេកមកកែច្នៃ ចៀនច្រកថង់ និងវេចខ្ចប់លក់ ដែលអាចជួយចូលរួមចំណែកជួយដោះស្រាយបញ្ហាសង្គម និងតម្លៃចេកនៅលើទីផ្សារក្នុងតំបន់។

អ្នកស្រី នុន ចាន់នី ម្ចាស់សិប្បកម្មចេកឆាបរាជនី ប្រាប់កម្ពុជាថ្មីនៅថ្ងៃច័ន្ទទី ១៣ ខែមិថុនា ២០២២នេះថា អាជីវកម្មចេកឆាបរាជធានី បានចាប់ផ្ដើមដំណើរការដំបូងនៅឆ្នាំ ២០១៨ ដំបូងផ្ដើមពីការសាកល្បងរហូតក្លាយជាសិប្បកម្ម ហើយបានចុះបញ្ជីនៅក្រសួងពាណិជ្ជកម្មជាផ្លូវការនាដើមឆ្នាំ ២០២២នេះ។

សហគ្រិនស្ដ្រីរូបនេះ បានឱ្យដឹងថា សង្វាក់ផលិតកម្មរបស់ចេកឆាបរាជនីបានវិវត្តទៅរកភាពល្អប្រសើរពីមួយឆ្នាំទៅមួយឆ្នាំ ដែលពីមុនផលិតត្រឹមតែ ២០ ទៅ ៣០ គីឡូ ក្នុងមួយថ្ងៃ ខណៈឡើងដល់ ១០០ គីឡូក្នុងមួយថ្ងៃនាពេលបច្ចុប្បន្ននេះ។

អ្នកស្រី នុន ចាន់នីបញ្ជាក់ថា ដោយសារផលិតផរបស់អ្នកស្រីខុសប្លែកពីគេព្រោះប្រើការវេចខ្ចប់ដោយម៉ាស៊ីន និងលក់តម្លៃធូរថ្លៃ ត្រឹមតែ ៥០០ រៀល ក៏អាចទិញញាំបានដែរ។

អ្នកស្រី នុន ចាន់នី «យើងធ្វើការវេចខ្ចប់ប៉ោងៗ ដូចនំប៉ោង អញ្ចឹងអតិថិជន ភាគច្រើនចូលចិត្តព្រោះ មានរសជាតិផ្អែមល្មម ស្ងួត គ្មានជាតិស្កជាប់ដៃ ដល់អញ្ចឹងគេនិយមច្រើន កាលពីមុនគ្រាន់តែជារបស់បញ្ញើ អ្នកទិញ មិនប្រាកដថា គាត់ញាំទេ គាត់ទិញផ្ញើគេ តែឥឡូវគាត់ទិញញាំខ្លួនឯង»។

អ្នកស្រី នុន ចាន់នី បញ្ជាក់ថា ចេកដែលអ្នកស្រីយកមកចៀន គឺជាចេកដែលចាស់ល្អ មានគុណភាពដោយប្រើប្រាស់ប្រេងចៀន ហើយជាផលិតផលធម្មជាតិញុំពេលណាក៏បាន ដោយមានច្រើនជម្រើស និងច្រើនរសជាតិសម្រាប់អតិថិជន។

ចេកឆាបរាជនី មាន ៤ រសជាតិ ដូចជារសជាតិដើម រសជាតិផ្អែម រស់ជាតិជូរហិរ និងរសជាតិប្រៃស្លឹកក្រូច ដោយមានការវេចខ្ចប់ចងថងសម្រាប់លក់នៅតាមជនបទ និងវេចខ្ចប់តាមស្ដង់ដារសម្រាប់លក់តាមហាងកាហ្វេ និងផ្សារម៉ាត។

បច្ចុប្បន្នចេកឆាបរាជនីមានលក់នៅខេត្តបាត់ដំបង ខេត្តពោធិ៍សាត់ រាជធានីភ្នំពេញ ដែលមាននៅតាមតូបកាហ្វេ ១៤០ កន្លែង និងតូបលក់ចាប់ហួយជាច្រើន មាននៅខេត្តព្រះសីហនុ កណ្ដាល និងខេត្តព្រៃវែង ដោយកញ្ចប់ ១២០ ក្រាមលក់ក្នុងតម្លៃ ៤ ៥០០ រៀលទៅ ៥ ០០០ រៀល និងកញ្ចប់ ២៥ ក្រាមតម្លៃតែ ៥០០ រៀលប៉ុណ្ណោះ៕