អាជីវករលក់ដូរក្នុងផ្សារលក់មិនដាច់ដោយសារអ្នកលក់ក្រៅផ្សារច្រើនពេក

បងប្អូនអាជីវករលក់ដូរនៅផ្សារបន្លែច្បារអំពៅបាននាំគ្នាត្អូញត្អែររឿងលក់មិនដាច់ដោយសារតែមានអ្នកលក់ដូរក្រៅផ្សារច្រើនពេក។

អាជីវករបានប្រាប់ថា ពួកគាត់លក់បន្លែលែងដាច់ចាប់តាំងពីជំងឺកូវីដ១៩ ផ្ទុះឡើងរហូតដល់បិទផ្សារហើយអនុញាតឲ្យដាក់លក់ក្រៅផ្សារពិសេសតាមចិញ្ចើមផ្លូវដើម្បីឲ្យប្រជាពលរដ្ឋមកទិញ។

លុះដល់ជំងឺកូវីដ១៩ បានធូរស្បើយអាជ្ញាធរបានសម្រេចឲ្យបើកផ្សារលក់ដូរវិញគឺមានតែអាជីវករចូលលក់ដូរវិញប៉ុន្តែម៉ូយដែលធ្លាប់មកទិញបែរជាទៅទិញនៅក្រៅផ្សារព្រោះងាយស្រួលជាងចូលទិញក្នុងផ្សារដែលតម្រូវឲ្យផ្ញើយានជំនិះមុនចូលផ្សារ។

ក្នុងនោះបងប្អូនអាជីវករបានសំណូមពរដល់អាជ្ញាធរសុំបញ្ឈប់ការអនុញាតឲ្យមានការលក់ដូរតាមចិញ្ចើមផ្លូវដោយឲ្យចូលលក់ក្នុងផ្សារវិញបើពុំដូច្នោះទេគឺបងប្អូនអាជីវករលក់ដូរក្នុងផ្សារពិតជាដាច់បាយហើយ។

ទាក់ទិននឹងបញ្ហាចំពោះមុខដែលបងប្អូនអាជីវករលក់ដូរបានត្អូញត្អែបែបនេះ លោក សាន់ ប៊ុនណា ប្រធានគ្រប់គ្រងផ្សារបន្លែច្បារអំពៅដែលមានទីតាំងស្ថិតក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញបានប្រាប់កម្ពុជាថ្មីនៅថ្ងៃទី ២៧ ខែវិច្ឆិកានេះថា តាមការលើកឡើងរបស់បងប្អូនអាជីវករគឺពិតប្រាកដមែន ព្រោះបច្ចុប្បន្នបងប្អូនលក់ដូរនៅក្នុងផ្សារ មិនដាច់ទាល់តែសោះព្រោះតែអ្នកលក់ដូរនៅផ្សារដើមគមកដាក់លក់តាមចិញ្ចើមផ្លូវបង្កដល់សណ្តាប់​ធ្នាប់ចរាចរណ៍ហើយទោះបីជាអាជ្ញាធរខិតខំរៀបចំសណ្តាប់ធ្នាប់ហាមលក់ដូរលើចិញ្ចើមផ្លូវក៏ពួកគាត់មិនស្តាប់គឺដូចជាវែកចកកណ្តាលបឹងអញ្ចឹង។

លោក សាន់ ប៊ុនណា បានសំណូមពរដល់បងប្អូនអាជីវករលក់ដូរក្នុងផ្សារសូមស្ងប់អារម្មណ៍ព្រោះអាជ្ញាធរកំពុងមានវិធានការទៅលើអ្នករំលោភយកចិញ្ចើមផ្លូវធ្វើអាជីវកម្ម៕

អត្ថបទ៖ នរា