អាជីព

មុនបានជោគជ័យ សហគ្រិនភាគច្រើន មានកំហុសធំៗ៥នេះ

បានផុស

៥ years មុន

នៅ

ថ្ងៃព្រហស្បតិ៍ ៥ វិច្ឆិកា ២០២០

ដោយ

ក្រោយពេលមានពិសោធន៍ជាច្រើនឆ្នាំនៅក្នុងអាជីវកម្ម ច្រើនដំណាក់កាល ជាលទ្ធផលសហគ្រិនជាច្រើនបានដឹងដោយផ្ទាល់នូវអ្វីដែលត្រូវធ្វើ – និងអ្វីដែលមិនត្រូវធ្វើ ចំណែកកំហុសឆ្គងខាងក្រោមភាគច្រើនពួកគេសារភាពថា ធ្លាប់បានឆ្លងកាត់ ហើយថែមទាំងបានបរាជ័យព្រោះវាពិតមែន។

១ កុំគិតថា យើងគឺជាអ្នកដំបូងក្នុងទីផ្សារដែលនឹកឃើញផ្តល់សេវាកម្មនេះ

ប្រហែលជាគិតថានេះជាអត្ថប្រយោជន៍ដ៏ធំមួយ ប៉ុន្តែ ជាធម្មតាការឈានមុខគេលើទីផ្សារមានន័យថា យើងកំពុងតែហ៊ានប្រឈមនឹងហានិភ័យទាំងអស់ព្រោះដើរទៅរកទីដែលមិនទាន់មានគេកាប់ឆ្ការ។ យើងនឹងចំណាយពេលច្រើនក្នុងការអប់រំ បញ្ចុះបញ្ចូលអតិថិជន ដែលនិយាយមិនចង់ចំណាយជាមួយសេវាកម្មថ្លៃ។ យើងត្រូវមានលទ្ធភាពទាញ មនុស្សជាច្រើនឱ្យមកចូលចិត្តប្រើសេវាកម្មយើង ដូច្នេះគំនិតរកស៊ីមិនអាចអរូប៉ីទេ ត្រូវប្រាកដថាយើងដឹងពីរបៀបដែលនឹងអាចដោះស្រាយ ពេលអាជីវកម្មនេះត្រូវរងការទិតៀន ឬចម្លងទៅរកស៊ីបន្តដោយអ្នកផ្សេងទៀតពេលយើងបានជោគជ័យ។

២ កុំគិតថាយើងគ្មានការប្រកួតប្រជែងខ្លាំង

ការគិតមើលស្រាលនេះ ជាកំហុសដែលកំពុងកើតមានឡើងយ៉ាងទូទៅ ដោយហេតុផលប្រសិនជាគំនិតល្អ មុខរបរល្អនិងសេវាកម្មល្អ អ្នកណាក៏នឹងជំនៈមកធ្វើដែរមិនមែនឯកសិទ្ធិរបស់យើងទេ។ គួរមានផែនការលក់រឹងមាំមួយ ដែលពន្យល់ពីរបៀបដែលយើងខ្លួនឯងអាចបង្កើតអតិថិជនថ្មីៗជានិច្ចនឹងចងចិត្តអតិថិជនចាស់ ជាការដែលគ្មានគូប្រជែងណាអាចមកដណ្តើមទៅបានងាយៗឡើយ។

ក្នុងនាមជាសហគ្រិន ត្រូវទទួលស្គាល់ថា មុខរបរដែលបង្កើតឡើងកាន់តែធំបញ្ហាមកឱ្យដោះស្រាយកាន់តែច្រើនទៅតាមនោះទាំងអស់ គិតចាប់តាំងពីវិនិយោគិនដៃគូ អាជ្ញាធរ បុគ្គលិក អតិថិជន គូប្រជែង។ល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៣ កុំគិតថាយើងកំពុងធ្វើអ្វីៗបានល្អលើសគេ

សហគ្រិនតែងគិតថាអ្វីដែលមុខជំនួញទៅមុខបានយ៉ាងអស្ចារ្យគឺអ្វីដែលអ្នកផ្សេងពិបាកធ្វើតាមដូច តែតាមពិត អ្នកជំនាញសេដ្ឋកិច្ចនិងសហគ្រិនភាព Cristina Farrnនៅសាកលវិទ្យាល័យHarwad លើកឡើងថា អ្វីដែលអស្ចារ្សពុំមែនភាពឯកោម្នាក់ឯងទេប៉ុន្តែគួរតែជាសង្វាក់ជាមួយគេឯង ដែលនឹងជោគជ័យ។ មានន័យថាយើងមានជោគជ័យជាមួយគេឯងហើយផ្សំគ្នាជាមួយគេឯងដែរ។ លោកស្រីថា«មនុស្សភាគច្រើនពួកគេមិនដឹងអំពីសហប្រតិបត្តិការទេ។ ផ្ទុយទៅវិញ ប្រសិនសត្រូវប្រមូលផ្តុំគ្នាមកដណ្តើមអតិថិជនយើង តាមរយៈការរួមគ្នាបញ្ចុះតម្លៃជាប្រព័ន្ធ យើងនឹងមានបញ្ហា! ក្រុមហ៊ុនដែលធ្វើបានល្អមិនខ្លាំងដូចធ្វើបានល្អជាមួយគ្នាទេ។បើចេញទៅស្វែងរកដៃគូវិនិយោគហើយយើងអួតថាពូកែអ្វីគ្រប់យ៉ាង ពួកគេនឹងស្មានបានថា យើងនេះពិតជាមិនទាន់យល់ពីដូចម្តេចហៅថាជំនួញនៅឡើយ!»

៤ កុំចេះគ្រប់រឿងតែមិនច្បាស់

យើងកំពុងរស់នៅក្នុងពិភពលោកមួយដែលមានការជំរុញខ្លាំងផ្នែកទំនាក់ទំនងនិងបណ្តាញ។ នៅពេលយើងព្យាយាមសាងសង់ទីផ្សារនិងប្រេន សម្រាប់មនុស្សគ្រប់គ្នាយើងត្រូវភ្ជាប់ទំនាក់ទំនងរកដៃគូប្រកបដោយសក្តានុពល មកជួយគ្នាជោគជ័យតំណាលគ្នា ហើយមុនពេលជួបជាមួយពួកគេសូមដឹងពីចំណុចខ្លាំងបំផុតរបស់យើងនិងចំណុចដែលខ្សោយខ្វះខាតត្រូវការគេមកបំពេញ រឿងណាមួយដែលយើងអាចធ្វើបានប្រសើរជាងអ្នកដទៃទៀតក្នុងវិស័យដដែលនេះ និងដែលវិស័យនេះមិនទាន់មាន ការយល់ដឹងចំណុចទាំងនេះជាមូលដ្ឋានគ្រឹះដែលសហគ្រិនជោគជ័យបានរហ័ស។ ចូរផ្តោតលើរង្វង់តូចសិនរហូតដល់ស្ទាត់ជំនាញ។ សហគ្រិនជាច្រើនរមែងគិតថាពួកគេត្រូវការធ្វើជាអ្នកជំនាញអ្វីគ្រប់យ៉ាង មិនថា ទីផ្សារ ទំនាក់ទំនង លក់ឬផលិត ហើយព្យាយាមឆ្លើយគ្រប់សំណួរដែលអ្នកកាសែតសួរដោយនិយាយទ្រឹស្តីនិងភាពអរូបយ៉ាងល្អ ទាំងដែលពួកគេមិនមានតម្រុយអ្វីអំណះអំណាងលើដែលខ្លួនកំពុងនិយាយផង។ ប្រសិនបើយើងចេះអ្វីមួយច្បាស់ហើយកំពុងវិនិយោគលើវានោះ នៅក្នុងរង្វង់នោះ អួតអាងលើជំនាញនោះតាមរយៈសកម្មភាពឱ្យចេញជារូបរាងសិន ច្បាស់ណាស់ អ្នកជាសហគ្រិនពិតប្រាកដ។

៥ កុំគិតថាអ្នកជំនាញរបស់យើងមិនចាកចេញ

របៀបពឹងផ្អែកណាដែលផ្តេកផ្តួលលើមនុស្សតែម្នាក់ឬពីរ តែងតែមានបញ្ហានៅពេលបុគ្គលនោះចាកចេញ។ អាជីវកម្មទាំងអស់ ត្រូវការបណ្តុះបណ្តាលបុគ្គលិកល្អ និងបន្តជំនាន់ មិនមែនយកបងប្អូនមកធ្វើទាំងគេនោះគ្មានសមត្ថភាពព្រោះខ្លាចបណ្តុះបណ្តាលមិនមែនអ្នកដែលមិនមែនញាតិពួកគេនឹងចាកចេញនោះទេ។

ចូរបង្កើតជាប្រព័ន្ធធនធានមនុស្ស Dynamicដ៏រឹងមាំមួយដែល មានមនុស្សបន្តវេនជានិច្ចពីមួយជំនាន់ហើយមួយជំនាន់ទៀត ចំណែកអ្នកដែលជាមេដឹកនាំមានតួនាទីបង្រៀននិងបណ្តុះបណ្តាលមនុស្សជំនាន់ក្រោយ។

ដោយ ៖ សុភា

ប្រភព ៖ startupbeat

Related Topics:ភាពជាអ្នកដឹកនាំ