ផ្លែត្រសក់ផ្អែម ឃុំអណ្តូងទឹក ខេត្តកោះកុង ចាប់ផ្ដើមចេញផលទៅទីផ្សារបណ្តើរៗហើយ

ប្រជាកសិករនៅភូមិជីត្រេះ ឃុំអណ្តូងទឹក ស្រុកបូទូមសាគរ ខេត្តកោះកុង កំពុងចាប់ផ្តើមប្រមូលផលផ្លែត្រសក់ផ្អែមរបស់ខ្លួននៅ ខែធ្នូ នេះ បន្ទាប់ពីបានប្រឹងប្រែងដាំដុះថែទាំជាង ៤ខែ ក្រោមគម្រោងស្ទៀររបស់អង្គការ Save the Children និងកិច្ចសម្របសម្រួលរបស់ រដ្ឋបាលស្រុកបូទុមសាគរ។ ផ្លែត្រសក់ផ្អែមពណ៌លឿងជាច្រើនផ្លែ កំពុងតែហុចផលល្អប្រសើរសម្រាប់ការកាត់ប្រមូលផលទៅកាន់ទីផ្សារ ឬមានឈ្នួញមកទិញដល់ផ្ទះតែម្តង មិនចាំបាច់ចំណាយពេលវេលាដឹកជញ្ចូនទៅឆ្ងាយដូចពេលមុនឡើយ។

លោក នាង ពិសិដ្ឋ អនុប្រធានការិយាល័យកសិកម្ម ធនធានធម្មជាតិ និងបរិស្ថានស្រុកបូទុមសាគរ បានឱ្យដឹងរសៀលថ្ងៃទី៩ ខែធ្នូ ឆ្នាំ២០២៣ ថា កសិករ ឡាយ រ៉ន ស្ថិតភូមិជីត្រេះ ឃុំអណ្តូងទឹក តែងតែយកចិត្តទុកដាក់បង្កបង្កើនផលត្រសក់ផ្អែមនេះ ខណៈពួកគាត់មានបទពិសោធន៍ដាំដុះជាច្រើនឆ្នាំមកហើយ។

បើតាមលោក នាង ពិសិដ្ឋ ឆ្នាំនេះគ្រួសារកសិករ ឡាយ រ៉ន ដាំដុះត្រសក់ផ្អែមរហូតដល់ ៦ ០០០ កូនឯណោះ ពោលគឺពង្រីកផ្ទៃដីដំាដុះកើនជាងឆ្នាំទៅ។ ការជោគជ័យផ្នែកកសិករនេះ ធ្វើឡើងក្រោម គម្រោងស្ទៀង នៃអង្គការ Save the Children និងកិច្ចសម្របសម្រួលរបស់ រដ្ឋបាលស្រុកបូទុមសាគរ។

គួរបញ្ជាក់ថា ផ្លែត្រសក់ផ្អែម ត្រូវបានលក់ចេញគិតជាគីឡូក្រាម ដោយក្នុង ១គីឡូក្រោមថ្លៃ ៤០០០រៀល ឬអាចលើសនេះ ដោយមានអតិថិជនបញ្ជាទិញ និងមានការទិញដល់ផ្ទះតែម្តង មិនពិបាកដឹកជញ្ចូនទៅទីផ្សារដូចពេលមុនៗឡើយ។

លោកស្រី អ៊ី នារីនេត អភិបាលរងខេត្តកោះកុង បានលើកឡើងថា ២ថ្ងៃមុននេះ លោកស្រី ប្រធានស្តីទី មន្ទីរកសិកម្ម តំណាងអង្គការដៃគូ រដ្ឋបាលស្រុកបូទុមសាគរ និងប្រជាកសិករ បានចុះពិនិត្យការកាត់ប្រមូលផលផ្លែត្រសក់ផ្អែមរបស់ប្រជាកសិករមួយគ្រួសារ ជោគជ័យចំពោះការដាំដុះជាង ៤ខែមកនេះ។

លោកស្រីអភិបាលរងខេត្តកោះកុង បានកោតសរសើរចំពោះកិច្ចប្រឹងប្រែងថែទាំដំដុះដំណាំកសិកម្មប្រភេទជាត្រសក់ផ្អែមលក់ ដើម្បីស្វែងរកប្រាក់ចំណូលមកផ្គត់ផ្គង់ជីវភាពគ្រួសារ និងបន្តជំរុញលើកទឹកចិត្តបន្តការងារលើកកម្ពស់វិស័យកសិកម្មនេះថែមទៀត។

ស្រុកបូទុមសាគរ ត្រូវបានគេចាត់ទុកថា មូលដ្ឋានស្រុកមួយមានការដាំដុះកសិកម្មជាច្រើនប្រភេទ រួមមាន៖ ឪឡឹកលឿន ខាត់ណាផ្កា ត្រសក់ទ្រើង ត្រប់ ស្ពឹក សាឡាត់ និងចិញ្ចឹមត្រី មាន់ ទា ជាដើម។ ទិន្នផលប្រមូលផលបាន បានធ្វើឱ្យជីវភាពរស់នៅរបស់ប្រជាកសិករធូរធារជាពេលមុនៗ៕

អត្តបទ៖ សិរីវឌ្ឍនៈ