ប្រជានេសាទកំពុងសប្បាយរកត្រី នៅទំនប់ស្ទាក់ទឹកសាលាតាអន ខេត្តបាត់ដំបង

ឆ្នាំ​នេះ​មាន​លក្ខណៈ​ខុស​ប្លែក​ពី​ឆ្នាំ​មុន ដោយសារតែនៅក្នុងស្ទឹងសង្កែ​ នាខេត្តបាត់ដំបង មានហ្វូងមច្ឆាស្ទើរតែគ្រប់ប្រភេទ យ៉ាងច្រើនសន្ធឹកសន្ធាប់ ធ្វើឱ្យប្រជានេសាទសប្បាយក្នុងការបង់សំណាញ់ចាប់ត្រីយកទៅធ្វើម្ហូប និងខ្លះយកទៅលក់ដើម្បីទទួលបានថវិកាសម្រាប់ផ្គត់ផ្គង់គ្រួសារ។

នៅប៉ុន្មានថ្ងៃចុងក្រោយនេះ គេសង្កេតឃើញថា មានមនុស្សម្នាយ៉ាងច្រើនបានធ្វើដំណើរទៅកំសាន្តនៅទំនប់ស្ទាក់ទឹកសាលាតាអន ស្ថិតក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង ដែលនៅទីនោះមានលក់ចំណី អាហារ ប្លែកៗ និងអាចគយគន់ទេសភាព និងមើលសំណង់ស្ទាក់ទឹកដ៏ធំស្គឹមស្កៃនៅកណ្ដាលស្ទឹងសង្កែ ជាពិសេសមើលប្រជានេសាទ ដែលកំពុងបង់សំណាញ់ដើម្បីចាប់ត្រីយកមកលក់។

នៅក្នុងឱកាសនោះដែរសម្រាប់អ្នកនេសាទទាំងលើគោក ក៏ដូចជានៅលើទូក គឺរកត្រីបានច្រើនសន្ធឹកសន្ធាប់ ដែលអ្នកខ្លះបានបញ្ជាក់ថាបង់តែ ៤ ទៅ ៥ សំណាញ់ គឺអាចរកត្រីបានមួយធុងធំ ហើយក្នុងនោះភាគច្រើនជាកូនត្រីរៀល និងកូនត្រីលិញ ដែលពួកគាត់អាចយកទៅឆ្អើ ឬយកទៅលក់ ព្រោះពពួកត្រីលិញ ភាគច្រើនដែលប្រជាពលរដ្ឋនិយមចូលចិត្តគឺយកទៅខ ឱ្យផុយឆ្អឹងដើម្បីទទួលទានជាមួយបបរស។

ជាមួយតម្លៃវិញ បុរសវ័យចំណាស់ម្នាក់ ឈ្មោះ សុខា បានបញ្ជាក់ថា សម្រាប់ត្រីលិញ មានតម្លៃខ្ពស់ជាងត្រីរៀល ដែលគាត់លក់នៅនឹងកន្លែងបានមួយគីឡូ ៥.០០០ រៀល ដោយឡែកត្រីរៀលគឺបានត្រឹមតែ ៤.០០០ រៀល ក្នុងមួយគីឡូក្រាម ប៉ុន្តែត្រូវវះពោះឱ្យស្អាតទើបបានតម្លៃនេះ។

លោកបានបន្ថែមថា បច្ចុប្បន្នមិនត្រឹមតែប្រជាពលរដ្ឋធ្វើដំណើរមកទិញត្រីប៉ុណ្ណោះទេ គឺថ្ងៃរសៀលឬល្ងាច ភាគច្រើនប្រជាពលរដ្ឋគឺមកអង្គុយទទួលទាននំចំណីដែលមានដាក់លក់ជាហូរហែ នៅក្បែរទំនប់ស្ទាក់ទឹកនេះ ដើម្បីស្រូបយកខ្យល់អាកាសដល់បរិសុទ្ធផង និងគយគន់មើលប្រជានេសាទដែលកំពុងបណ្ដែតខ្លួននៅលើទូកនេសាទកណ្ដាលជលសាផងដែរ ដែលទំនប់ស្ទាក់ទឹកសាលាតាអននេះ ឆ្លងកាត់ដងស្ទឹងសង្កែ ដែលបានផ្សារភ្ជាប់ពីឃុំព្រែកហ្លួង ទៅឃុំពាមឯក ក្នុងស្រុកឯកភ្នំ ខេត្តបាត់ដំបង៕

អត្ថបទ : សោ និយមរ័ត្ន