រដ្ឋបាលក្រុងពោធិ៍សាត់ សម្រេចផ្អាកការចរាចរណ៍​រថយន្ដធុនធំគ្រប់ប្រភេទឆ្លងកាត់គ្រប់ផ្លូវទាំងអស់ក្នុងក្រុង

រដ្ឋបាលក្រុងពោធិ៍សាត់ កាលពីយប់ថ្ងៃទី២០ ខែវិច្ឆិកា ឆ្នាំ២០២៥ បានចេញសេចក្ដីប្រកាសព័ត៌មានសម្រេចផ្អាកការចរាចរណ៍រថយន្ដធុនធំគ្រប់ប្រភេទបើកឆ្លងកាត់គ្រប់ផ្លូវទាំងអស់ក្នុងក្រុងពោធិ៍សាត់ ដើម្បីធានាសុវត្ថិភាព និងជៀសវាងគ្រោះថ្នាក់ជាយថាហេតុ។

តាមការប្រកាសព័ត៌មានរបស់រដ្ឋបាលក្រុងពោធិ៍សាត់ ការផ្អាកមិនឲ្យរថយន្ដធុនធំគ្រប់ប្រភេទឆ្លងកាត់នេះ ធ្វើឡើងដោយផ្អែកលើស្ថានភាពបច្ចុប្បន្នស្ទឹងពោធិ៍សាត់មានកម្រិតកម្ពស់ទឹកខ្ពស់ និងមានការកើនឡើងជាបន្តបន្ទាប់ក្នុងកម្រិតប្រកាសអាសន្ន ជាហេតុធ្វើឱ្យបណ្តាផ្លូវមួយចំនួនក្នុងក្រុងត្រូវបានហូរច្រោះ និងបាក់ស្រុត។ ហេតុនេះហើយដើម្បីទប់ស្កាត់ការខូចខាតផ្លូវដែលកំពុងមានបញ្ហាកាន់តែខ្លាំង ជាពិសេសធានាសុវត្ថិភាព ទ្រព្យសម្បត្តិ បង្ការ និងជៀសវាងគ្រោះថ្នាក់ដែលអាចកើតឡើងដោយយថាហេតុ ម្ចាស់រថយន្តធុនធំទាំងអស់ត្រូវផ្អាកការធ្វើចរាចរណ៍គ្រប់ផ្លូវទាំងអស់ក្នុងក្រុងពោធិ៍សាត់ជាបន្ទាន់។

គួររំលឹកថា កាលពីយប់ទាបភ្លឺថ្ងៃទី២០ ខែវិច្ឆិកា ឆ្នាំ២០២៥ សម្ពាធទឹកស្ទឹងពោធិ៍សាត់បានហក់ឡើងជាបន្តបន្ទាប់ និងមានកម្ពស់ទឹកបានកើនឡើងក្នុងកម្រិតមួយដែលត្រូវប្រកាសអាសន្ន។

បន្ទាប់ពីសង្កេតឃើញនៃស្ថានភាពទឹកបែបនេះ មន្ទីរធនធានទឹក និងឧតុនិយមខេត្តពោធិ៍សាត់ ក៏បានណែនាំឲ្យអាជ្ញាធរគ្រប់ ក្រុង ស្រុក ជាពិសេសប្រជាពលរដ្ឋរស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ ឲ្យបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុពីគ្រោះទឹកជំនន់ និងត្រៀមរកទីទួលសុវត្ថិភាពសម្រាប់ជម្លៀសប្រជាពលរដ្ឋដែលងាយរងគ្រោះ។

តាមការបញ្ជាក់ពីលោក ខូយ រីដា អភិបាលនៃគណៈអភិបាលខេត្តពោធិ៍សាត់ នាយប់ថ្ងៃទី២០វិច្ឆិកា គិតត្រឹមវេលាម៉ោង៩និង២៥នាទីយប់ ថ្ងៃទី២០ ខែវិច្ឆិកា ឆ្នាំ២០២៥ ស្ថានភាពជំនន់ទឹកភ្លៀងស្ទឹងពោធិ៍សាត់ នៅបន្តដាក់សម្ពាធ​មកលើប្រជាពលរដ្ឋដែលរស់នៅតាមដងស្ទឹង ក្នុងក្រុងពោធិ៍សាត់ និងស្រុកកណ្តៀង។ ជាវិធានការការពារ លោកអភិបាលខេត្តក៏បានដឹកនាំកម្លាំងចម្រុះ ចុះអនុវត្ត និងអន្តរាគមន៍គ្រោះទឹកជំនន់ជាបន្ទាន់ ដែលបង្កឡើងដោយជំនន់ទឹកភ្លៀងស្ទឹងពោធិ៍សាត់។

គិតត្រឹមព្រឹកថ្ងៃទី២១វិច្ឆិកានេះ ស្ថានភាពទឹកជំនន់នៅក្នុងក្រុងពោធិ៍សាត់នៅមិនទាន់មានការថមថយនៅឡើយ ខណៈរដ្ឋបាលក្រុងពោធិ៍សាត់ ក៏បានជូនដំណឹងបន្ថែមឲ្យប្រជាពលរដ្ឋបង្កើនការប្រុងប្រយ័ត្នចំពោះកំណាត់ខ្សែមួយផ្លូវចំណុចវាលរលាប សង្កាត់រលាប ដោយសារទឹកបានឡើងលិចផ្លូវទាំងស្រុងទៅហើយ៕

អត្ថបទ៖ សុខុម