បុកគ្នាពេញទំហឹង ស្លាប់ ២ នាក់ ខណៈជិះម៉ូតូអត់ភ្លើងបំភ្លឺផ្លូវ បើកក្នុងល្បឿនលឿន មិនប្រកាន់ស្តាំ

មនុស្ស​ ០២ ​នាក់បានស្លាប់ភ្លាមៗនៅនឹងកន្លែង ក្នុងហេតុការណ៍គ្រោះថ្នាក់ចរាចរណ៍មួយ បានកើតឡើងរវាងម៉ូតូពីរគ្រឿង បុកគ្នាពេញទំហឹង ដែលបង្កឡើងដោយភាគីម៉ូតូម្ខាងបើកបរ ក្នុងល្បឿនលឿន មិនប្រកាន់ស្តាំ និងមិនមានភ្លើងបំភ្លឺផ្លូវផង។

សមត្ថកិច្ចបានឲ្យដឹងថា ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើងនៅវេលាម៉ោង ១៨ និង ១០ នាទី ថ្ងៃទី ១៩ ខែ វិច្ឆិកា ឆ្នាំ២០២១ នៅ​លើកំណាត់ផ្លូវលេខ៥៧បេ ​ស្ថិតក្នុងភូមិសាមគ្គីឃុំ​ពេជ្រចិន្តាស្រុកភ្នំព្រឹកខេត្តបាត់ដំបង។

ប្រភពនៅកន្លែងកើតហេតុបាន​ឲ្យ​ដឹង​ថា ​នៅ​មុន​ពេល​កើត​ហេតុ គេ​ឃើញ​ម៉ូតូ០១គ្រឿងម៉ាកសង់សេរីចាស់ពណ៍ក្រហម គ្មានស្លាកលេខបើកបរដោយឈ្មោះ ស្រី សុផាន់ណា ភេទ​ប្រុសអាយុ ៣៤ ឆ្នាំ រស់នៅភូមិសាមគ្គី ឃុំពេជ្រចិន្តា ស្រុកភ្នំព្រឹក ខេត្តបាត់ដំបងក្នុងល្បឿនយ៉ាងលឿន ដោយគ្មានភ្លើងបំភ្លឺផ្លូវផង និងមិនប្រកាន់ស្ដាំផង ដោយបើកបរពីទិសដៅពីលិចទៅកើត លុះមកដល់ចំណុចកើតហេតុខាងលើ ​ក៏ជ្រុលចង្កូតទៅបុក​ចំពីមុខម៉ូតូម៉ាកសង់ឌ្រីមពណ៌ខ្មៅ​សេរីឆ្នាំ២០០៧ ពាក់ស្លាកលេខ 1A.9534 បើកបរដោយ​ឈ្មោះគីម រស្មី ភេទប្រុស​អាយុ ៣៨ ឆ្នាំ ជាកម្មករស្នាក់​នៅ​បណ្តោះអាសន្នភូមិ​សាមគ្គីឃុំពេជ្រចិន្តា ស្រុកភ្នំព្រឹកខេត្តបាត់ដំបង បណ្តាល​ឲ្យ​ស្លាប់​ទាំងពីរ​នាក់​នៅ​កន្លែង​កើតហេតុតែ​ម្តង (មិនពាក់មួកសុវត្ថិភាព)។

ក្រោយពេលកើតហេតុ សមត្ថកិច្ចជំនាញបានចុះទៅធ្វើការវាស់វែងគំនូសហេតុ រួចបាននាំយកម៉ូតូដែលខូចខាតទាំង០២គ្រឿងទៅរក្សាទុក នៅអធិការដ្ឋាននគរបាលស្រុកដើម្បីរងចាំដោះស្រាយតាមផ្លូវច្បាប់។ ចំណែកសាកសពត្រូវបានប្រគល់​ឲ្យ​ខាង​សាច់ញាតិ​ យក​ទៅ​រៀបចំ​ធ្វើ​បុណ្យ​តាម​ប្រពៃណី៕

អត្ថបទ៖សៅ សារិទ្ធ